“ກິ່ນປາກ” ເປັນບັນຫາທີ່ຄົນເຮົາບໍ່ປາຖະໜາ ທັງຜູ້ທີ່ເປັນເອງ ແລະ ຜູ້ທີ່ຢູ່ອ້ອມຂ້າງ ດັ່ງນັ້ນ ຜູ້ທີ່ມີກິ່ນປາກ ຈຶ່ງພະຍາຍາມຫາທາງອອກທຸກວິທີທາງ ເພື່ອທີ່ຈະແກ້ໄຂບັນຫາກິ່ນປາກ ໂດຍສາເຫດຂອງກິ່ນປາກ ມາຈາກອາຫານທີ່ເຮົາກິນແລ້ວໄປສະສົມໃນປາກ ແລະ ແຂ້ວ ເມື່ອບໍ່ໄດ້ຮັບການທຳຄວາມສະອາດທີ່ດີ ກໍ່ຈະເຮັດໃຫ້ເກີດບັນຫາກິ່ນປາກຕາມມາ ນອກຈາກການຮັກສາຄວາມສະອາດຜົ້ງປາກແລະແຂ້ວ ດ້ວຍການໃຊ້ຢາຖູແຂ້ວໃຫ້ສະອາດ ບໍ່ມີເສດອາຫານຄ້າງໃນປາກ ຈະຊ່ວຍລະງັບກິ່ນປາກໄດ້ໃນລະດັບໜຶ່ງ ການເລືອກກິນອາຫານບາງຢ່າງຍັງຊ່ວຍລະງັບກິ່ນປາກໄດ້ເຊັ່ນ:
1. ໝາກນາວ: ກົດຊີຕຣິກໃນໝາກນາວ ມີຄຸນສົມບັດສາມາດຂ້າເຊື້ອແບັກທີເລຍໃນຜົ້ງປາກໄດ້ ແລະ ເພີ່ມປະລິມານນ້ຳລາຍ ຊ່ວຍລ້າງແບັກທີເລຍດ້ວຍການກິນນ້ຳໝາກນາວ ແລະ ສາມາດເອົາເປືອກມາຫຍ້ຳ ຈະຊ່ວຍໃຫ້ແບັກທີເລຍທີ່ເຮັດໃຫ້ມີກິ່ນປາກຫຼຸດລົງໄດ້.
2. ໂຢເກິດ: ໂປຣໃບໂອຕິກ ທີ່ຢູ່ໃນໂຢເກິດ ຈະຊ່ວຍໃຫ້ລະບົບຂັບຖ່າຍເຮັດວຽກໄດ້ດີຂຶ້ນເຮັດໃຫ້ບໍ່ມີສານພິດຕົກຄ້າງໃນຮ່າງກາຍ ແລະ ກຳຈັດກິ່ນປາກໄດ້.
3. ໝາກນັດ: ຊ່ວຍຕ້ານການອັກເສບ ແລະ ເພີ່ມພະລັງງານຍ່ອຍໂປຣຕີນອຸດົມດ້ວຍໂບຣເມລິນ ມີວິຕາມິນ B ກົດໂຟລິກໂພແທັດຊຽມ ໂຊດຽມ ແລະ ແມັກນີຊຽມເປັນສານອາຫານທີ່ສຳຄັນຂອງຮ່າງກາຍ.
4. ໝາກແອັບເປິລ: ອຸດົມດ້ວຍໂພແທັດຊຽມ ທາດເຫຼັກ ແມັກນີຊຽມ ວີຕາມິນB1 B2 ແລະ B6 ຊ່ວຍລ້າງສານພິດອອກຈາກຕັບ ແລະ ໝາກໄຂ່ຫຼັງ ຍັງມີສານຕ້ານອະນຸມູນອິດສະລະ ກົດຢູລິກ ກົດແທນນິກ ແລະ ເສັ້ນໃຍເພັກຕິນ ຮັກສາຄວາມສະອາດກະເພາະອາຫານແລະລຳໄສ້ໄດ້ດີທີ່ສຸດ.
5. ໝາກອາໂວກາໂດ: ນວນຂອງໝາກອາໂວກາໂດ ຈະຊ່ວຍກຳຈັດອາຫານທີ່ເສດເຫຼືອຕົກຄ້າງຢູ່ໃນລຳໄສ້ໃຫຍ່ ເຊິ່ງເປັນສາເຫດສຳຄັນຂອງກິ່ນປາກ ແລະ ຍັງເປັນອາຫານທີ່ອຸດົມດ້ວຍວິຕາມິນຫຼາຍຊະນິດ ເປັນສານຕ້ານອະນຸມູນອິດສະຫຼະ ທີ່ຊ່ວຍຢັບຢັ້ງເຮັດໃຫ້ຮ່າງກາຍໜຸ່ມກ່ອນໄວ.
6. ໝາກກ້ຽງ: ນອກຈາກອຸດົມດ້ວຍວິຕາມິນC ແລ້ວ ຍັງຊ່ວຍຫຼຸດການອັກເສບ ປ້ອງກັນເຊື້ອແບັກທີເລຍຊ່ວຍຮັກສາຄວາມສົມດູນແບັກທີເລຍໃນລຳໄສ້ ແລະ ຫຼຸດອາການທ້ອງຜຸ ເຊິ່ງເປັນສາເຫດຂອງກິ່ນປາກ.
Cr.https:www.vientianemai.net/khao/18359.html
ຮູບພາບ: https://www.samunpri.com