ພິທີເຊັນບົດບັນທຶກຄວາມເຂົ້າໃຈ ເພື່ອສືບຕໍ່ຂະຫຍາຍຄວາມຮ່ວມມື ໃນການພັດທະນາບຸກຄະລາກອນ ເພື່ອຕອບສະໜອງຄວາມຕ້ອງການ ຂອງຕະຫລາດແຮງງານ ໃນຂະແໜງອຸດສາຫະກຳ ໄຟຟ້າພະລັງງານນໍ້າ ລະຫວ່າງບໍລິສັດໄຟຟ້ານໍ້າເທີນ 2 ແລະ ວິທະຍາໄລເຕັກນິກ ລາວ-ເຢຍລະມັນ ໄດ້ຕົກລົງເຫັນດີ ທີ່ຈະສືບຕໍ່ຮ່ວມມື ເພື່ອສ້າງບຸກຂະລາກອນ ໃຫ້ມີຄວາມຮູ້ຄວາມສາມາດ ໃຫ້ແກ່ຂະແໜງໄຟຟ້າພະລັງງານນໍ້າ ໃນໄລຍະຍາວ.
ສອງຝ່າຍ ຈະຮ່ວມມືກັນ ເພື່ອສ້າງແຜນປະຕິບັດການ ໃຫ້ບັນລຸຕາມຄວາມຕ້ອງການທາງດ້ານແຮງງານ ຂອງຂະແໜງໄຟຟ້າພະລັງງານນໍ້າ, ເຊິ່ງຈະໄດ້ສະໜັບສະໜູນ ແລະ ພັດທະນາຄູ່ມື, ອຸປະກອນການສິດສອນ ເພື່ອອຳນວຍຄວາມສະດວກ ໃນການຈັດຕັ້ງປະຕິບັດ ການຮຽນ-ການສອນ ຫລັກສູດໃໝ່ ຂອງສາຂາວິຊາໄຟຟ້າ ແລະ ກົນຈັກ ໃຫ້ມີປະສິດທິພາບ, ສະໜັບສະໜູນທຶນການສຶກສາໄລຍະຍາວ ໃນລະດັບຊັ້ນສູງ ໃຫ້ແກ່ນັກຮຽນ ທີ່ມາຈາກ ແຂວງ ຄຳມ່ວນ ທີ່ສົນໃຈຮຽນໃນສາຂາວິຊາໄຟຟ້າພະລັງງານນໍ້າ ແລະ ກົນຈັກ ( 7 ທຶກການສຶກສາ ໃນໄລຍະ 3 ປີ), ສະໜອງການຝຶກອົບຮົມດ້ານ ວິຊາທີ່ເໝາະສົມ ໃຫ້ພະນັກງານໄຟຟ້ານໍ້າເທີນ 2, ແລກປ່ຽນການຝຶກງານ ຂອງນັກສຶກສາ ( 3 ຄົນຕໍ່ປີ ) ແລະ ຝຶກອົບຮົມໃຫ້ຄູ-ອາຈານ ( 2 ຄົນຕໍ່ປີ ), ແລກປ່ຽນຄວາມຮູ້ດ້ານວິຊາການ ແລະ ປະສົບການຕົວຈິງ ລະຫວ່າງພະນັກງານ ຂອງບໍລິສັດໄຟຟ້ານໍ້າເທີນ 2 ກັບ ບັນດາຄູ-ອາຈານ ແລະ ນັກສຶກສາ ຂອງ ວິທະຍາໄລ ເຕັກນິກລາວ-ເຢຍລະມັນ ໂດຍຜ່ານກິດຈະກຳ “ວັນໄຟຟ້າພະລັງງານນໍ້າ” ທີ່ຈັດຂຶ້ນໃນທຸກໆປີ.
Cr.KPL
Hits: 16
