ກົມສິລະປະການສະແດງ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ຈັດຝຶກອົບຮົມການຟ້ອນລຳວົງລາວ ຄັ້ງທີ I ໃນວັນທີ 28 ກັນຍາ 2018 ທີ່ຫໍວັດທະນະທຳແຫ່ງຊາດ ໂດຍມີສຳມະນາກອນ ຈາກບັນ ດາກົມກອງ ອ້ອມຂ້າງກະຊວງທັງ ຍິງ-ຊາຍ ເຂົ້າຮ່ວມ. ທັງນີ້ ກໍເພື່ອເປັນການອະນຸລັກ, ເຜີຍແຜ່ ແລະ ໂຄສະນາວັດທະນະທຳລາວ ໂດຍສະເພາະແມ່ນການຟ້ອນລຳວົງລາວ ເຊິ່ງລຳວົງລາວໄດ້ສະເໜີເຂົ້າເປັນມໍລະ ດົກນາມມະທຳ ຕໍ່ອົງການອຸຍແນສໂກ ເຂົ້າເປັນມໍລະດົກໂລກໃນປີ 2018.
ທ່ານ ຄຳພວງ ອິນທະວົງສີ ສິລະປິນແຫ່ງຊາດ, ຫົວໜ້າກົມສິລະປະການສະແດງ ໄດ້ກ່າວວ່າ: ປະເທດລາວ ເປັນປະເທດທີ່ມີຄວາມອຸດົມຮັ່ງມີ ທາງດ້ານວັດທະນະທຳ, ມໍລະດົກວັດທະນະທຳທີ່ເກົ່າແກ່ ແລະ ຕິດພັນກັບວິຖີຊີວິດ ການເປັນຢູ່ຂອງຄົນລາວ ຕັ້ງແຕ່ອະດີດຈົນເຖິງປັດຈຸບັນ ທີ່ບໍ່ມີວັນຈືດຈາງ ນັ້ນກໍຄື ການຂັບ-ລຳ ແຕ່ເໜືອຮອດໃຕ້, ຈັງຫວະ ແລະ ທຳນອງຂັບ-ລຳ ແມ່ນເອກະລັກສະເພາະຕົວຂອງແຕ່ລະທ້ອງຖິ່ນ, ຈະແມ່ນງານ ສັງສັນ ຢູ່ໃນລະດັບໃດກໍຕາມ ເມື່ອມີສຽງຂັບ-ລຳດັງຂຶ້ນທຸກໆຄັ້ງກໍຈະມີຜູ້ໄປຟ້ອນນຳ, ແຕ່ໄລຍະຜ່ານມາ ລີລາທ່າຟ້ອນປະກອບໃສ່ລຳແຕ່ລະແບບ ແມ່ນຍັງບໍ່ທັນເປັນເອກະພາບກັນ ແລ້ວແຕ່ຜູ້ຈະຟ້ອນຕາມໃຈຂອງໃຜລາວ.
ສະນັ້ນເພື່ອໃຫ້ຜູ້ຮຽນບໍ່ເກີດຄວາມສັບສົນວ່າ ຈະເອົາທ່າໃດ ຫລື ແບບຟ້ອນໃດຈຶ່ງຈະຖືກຕ້ອງ ເພື່ອຄວາມເປັນເອກະພາບກັນໃນສັງຄົມນັ້ນ, ຊຸດອົບຮົມຄັ້ງນີ້ ຈຶ່ງໄດ້ນຳເອົາການຟ້ອນລຳວົງລາວ ຈຳນວນ 4 ຈັງຫວະ ມາຝຶກ ສອນເຊັ່ນ: ຟ້ອນລຳວົງທ່າເຊີນຊວນ, ຟ້ອນລຳວົງທ່າຕັ່ງຫວາຍ, ຟ້ອນລຳວົງທ່າສາລະວັນ ແລະ ເຕັ້ນບາສະລົບລາວ.
Cr.KPL
Hits: 12
