ໃນປັດຈຸບັນ ອຳນາດການປົກຄອງນະຄອນຫຼວງວຽງຈັນ ພວມເລັ່ງຊຸກຍູ້ສົ່ງເສີມໃຫ້ປະຊາຊົນ ກໍ່ຄືຊາວກະສິກອນນຳເອົາສາລີອາຫານສັດ ມາເປັນພືດເສດຖະກິດ ເພື່ອຍົກລະດັບຊີວິດການເປັນຢູ່ໃຫ້ນັບມື້ດີຂຶ້ນ ໂດຍເຂດເມືອງຈຸດສຸມ ນວ ໄດ້ກຳນົດເອົາ 4 ເມືອງຄື: ເມືອງນາຊາຍທອງ ໄຊທານີ ປາກງື່ມ ແລະ ເມືອງສັງທອງ.
ທ້າຍອາທິດຜ່ານມາ, ພະແນກກະສິກຳ ແລະ ປ່າໄມ້ ນວ ໄດ້ຈັດກອງປະຊຸມສົ່ງເສີມປູກສາລີອາຫານສັດເປັນສິນຄ້າ ຂຶ້ນທີ່ສຳນັກງານປົກຄອງ ນວ ມີທ່ານ ສິນລະວົງ ຄຸດໄພທູນ ເຈົ້າຄອງ ນວ ພ້ອມດ້ວຍພາກສ່ວນທີ່ກ່ຽວຂ້ອງແລະຜູ້ປະກອບການເຂົ້າຮ່ວມ.
ເພື່ອສົ່ງເສີມໃຫ້ຊາວກະສິກອນ ທຳການຜະລິດສາລີອາຫານສັດ ສະໜອງໃຫ້ພຽງພໍກັບຄວາມຮຽກຮ້ອງຕ້ອງການຂອງສັງຄົມ ໂດຍສະເພາະສະໜອງໃຫ້ 2 ໂຮງງານຜະລິດຫົວອາຫານສັດຄື: ບໍລິສັດ ຊີພີ ແລະ ບໍລິສັດ ນິວໂຮບ ເຂດກວມລວມໄຊເຊດຖາ ທີ່ທັງສອງບໍລິສັດມີຄວາມຕ້ອງການວັດຖຸດິບ ກໍ່ຄືສາລີແຂງ ນຳໄປຜະລິດເປັນຫົວອາຫານສັດໃຫ້ໄດ້ 11.770 ໂຕນຕໍ່ປີ ປັດຈຸບັນສາລີແຂງມີລາຄາຄ້ຳປະກັນຢູ່ທີ່ 2.200 ກີບຕໍ່ກິໂລຕໍ່ເມັດ ແລະ 1.000 ກີບຕໍ່ກິໂລຕໍ່ຝັກ ຖືວ່າເປັນລາຄາທີ່ເໝາະສົມກັບສະພາບເສດຖະກິດໂດຍລວມ.
Cr.KPL