ພະແນກຊັບພະຍາກອນທຳມະຊາດ ແລະ ສິ່ງແວດລ້ອມ ນະຄອນຫລວງວຽງຈັນ, ຮ່ວມກັບ ຂະແໜງການກ່ຽວຂ້ອງ ຈັດກອງປະຊຸມປືກສາຫາລື ວຽກງານການ ຄຸ້ມຄອງກິດຈະການລ້ຽງປາກະຊັງ ແລະ ຮ້ານອາຫານເຮືອນແພ ທີ່ດຳເນີນທຸລະກິດຢູ່ໃນສາຍນ້ຳງື່ມ ເພື່ອຕິດຕາມແກ້ໄຂບັນຫາ ຜົນກະທົບຕໍ່ສິ່ງແວດລ້ອມ ແລະ ການລົງທຶນ ໃຫ້ຖືກຕ້ອງຕາມລະບຽບການ.
ກອງປະຊຸມປຶກສາຫາລື ກ່ຽວກັບວຽກງານການຄຸ້ມຄອງ ກິດຈະການລ້ຽງປາກະຊັງ ແລະ ຮ້ານອາຫານເຮືອແພ ທີ່ດຳເນີນທຸລະກິດຢູ່ໃນສາຍນ້ຳງື່ມ ເຂດເມືອງໄຊທານີ ນະຄອນຫລວງວຽງຈັນ, ເພື່ອແກ້ໄຂບັນຫາ ຈັດລະບຽບໃນການລ້ຽງປາກະຊັງ ຂອງກຸ່ມທຸລະກິດ ທີ່ສົ່ງຜົນກະທົບຕໍ່ຄຸນນະພາບນໍ້າ ກໍຄື ການດຳລົງຊີວິດຂອງປະຊາຊົນ ທີ່ອາໃສຢູ່ສາຍນ້ຳງື່ມ ເຂດກຸ່ມທ່າງ່ອນ ເຊັ່ນ: ມີການຖິ້ມປາຕາຍ, ຂີ້ເຫຍື້ອຊະຊາຍຕາມແຄມນ້ຳ ເຮັດໃຫ້ມີຜົນກະທົບ ຕໍ່ສິ່ງແວດລ້ອມ ແລະ ອື່ນໆ.
ທຸລະກິດເຮືອນແພ ໄດ້ຮັບຄວາມນິຍົມຫລາຍພໍສົມຄວນ ກຸ່ມທ່າງ່ອນມີທັງໝົດ 9 ກິດຈະການ ກິດຈະການ ເຮືອນແພ ລາວເດີມ ແລະ ເຮືອແພ ອຸ່ນຄຳ ປະກອບມີແພນຳທ່ຽວ 13 ລຳ, ກິດຈະການແມ່ນ ເປັນຂອງຄົນລາວ 100% ນອກນັ້ນ ຍັງມີກິດຈະການລ້ຽງ ປາກະຊັງຂອງຄົນຈີນ ປະກອບ ມີ ຟາມ ປາກະຊັງ ອາຮົວ, ອາລ່ຽງ, ອາເຊີນ, ເປັງຊັງ ເກີນ, ຈູນຮູ, ອາເຊີນມິງ ແລະ ຟາມປາກະຊັງ ລິນຮຸຍ ໃນນັ້ນລວມມີ 405 ກະຊັງ ມີປາຫລາຍກວ່າ 1 ລ້ານໂຕ.
Cr.KPL