ພິທີສະເຫລີມສະຫລອງ ວັນຄູແຫ່ງຊາດ ຄົບຮອບ 24 ປີ ທີ່ ຄະນະເສດຖະສາດ ມະຫາວິທະຍາໄລແຫ່ງຊາດ (ມຊ), ໂດຍການເປັນປະທານ ຂອງ ທ່ານ ນາງ ແສງເດືອນ ຫລ້າ ຈັນທະບູນ, ກໍາມະການສູນກາງພັກ ລັດຖະມົນຕີ ກະຊວງສຶກສາທິການ ແລະ ກິລາ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ນາງ ແສງເດືອນ ກ່າວວ່າ: ມື້ນີ້, ເປັນມື້ທີ່ມີຄວາມໝາຍ ແລະ ຄວາມສຳຄັນເປັນຢ່າງຍິ່ງ ທີ່ໄດ້ມີການສະເຫລີມສະຫລອງ ວັນຄູແຫ່ງຊາດຄົບຮອບ 24 ປີ, ຂໍສົ່ງຄວາມຮັກແພງ, ຄວາມຢື້ຢາມຖາມຂ່າວອັນອົບອຸ່ນ ແລະ ອວຍພອນອັນປະເສີດມາຍັງພະນັກງານ, ນັກສຶກສາ, ຄູ-ອາຈານ ທຸກຖ້ວນໜ້າ ທັງອະດີດ ແລະ ປັດຈຸບັນ. ຄູໝາຍ ເຖິງຜູ້ປະຕິບັດໜ້າທີ່ສິດສອນ, ຖ່າຍທອດຄວາມຮູ້, ສຶກສາອົບຮົມຄົ້ນຄົ້ວວິໄຈ, ຊຸກຍູ້ສົ່ງເສີມ ແລະ ຊ່ວຍເຫລືອນັກຮຽນ-ນັກສຶກສາ ຫລາຍຮູບແບບ. ເພາະສະນັ້ນ, ຄູຈຶ່ງຖືກຂະໜານນາມວ່າ ຄູ ຄືແມ່ ພິມຂອງຊາດ, ຄູແມ່ນພໍ່ແມ່ຄົນທີ 2, ຄູ ຄືວິສະ ວະກອນແຫ່ງດວງວິນຍານ ແລະ ອື່ນໆ. ທຸກຄໍາເວົ້າລ້ວນແຕ່ຊີ້ໃຫ້ເຫັນວ່າ ຄູມີຄວາມໝາຍຄວາມສຳຄັນລົ້ນເຫລືອ ຫາທີ່ປຽບບໍ່ໄດ້ຕໍ່ການສຶກສາ, ຕໍ່ການພັດທະນາຊັບພະຍາກອນມະນຸດ ກໍ່ຄື ການພັດທະນາປະເທດຊາດ.
ໃນໄລຍະຜ່ານມາ, ກະຊວງສຶກສາທິການ ແລະ ກິລາ ກໍຄື ອຳນາດການປົກຄອງທ້ອງຖິ່ນ, ຜູ້ບໍລິຫານການສຶກສາແຕ່ລະຂັ້ນ ທັງພາກລັດ ແລະ ເອກະຊົນ ໄດ້ມີຄວາມພະຍາຍາມສູງ ໃນການເອົາໃຈໃສ່ພັດທະນາການສຶກສາ, ທັງດ້ານປະລິມານ ແລະ ຄຸນນະພາບ, ໄດ້ຂະຫຍາຍຕາໜ່າງການສຶກສາ ໄປທົ່ວທຸກທ້ອງຖິ່ນ, ເຂດພູດອຍຫ່າງໄກຫລອກຫລີກ, ສ້າງໂອກາດສິ່ງອໍານວຍຄວາມສະດວກ ໃຫ້ປະຊາຊົນ ໄດ້ມີລະດັບຄວາມຮູ້ຈົບປະຖົມ ແລະ ມັດທະຍົມສຶກສາຕອນຕົ້ນ, ບໍາລຸງດ້ວຍຄວາມ ຮັບຜິດ ຊອບສູງ ເຫັນວ່າຄຸນນະພາບຂອງນັກສຶກສາ ໃນທຸກລະດັບ, ທຸກຊັ້ນ ທຸກສາຍ ກໍໄດ້ຮັບການພັດ ທະນາດີຂຶ້ນເປັນກ້າວໆ.
Cr.KPL
