ການປະດິດຈາກສິ່ງຂອງທີ່ເຫຼືອໃຊ້່ທີ່ສູນການຄ້າ ລາວ-ໄອເຕັກ, ກົມເຕັກໂນໂລຊີ ແລະນະວັດຕະກຳ, ກະຊວງວິທະຍາສາດ ແລະເຕັກໂນໂລຊີ ຮ່ວມກັບ ສູນກາງຊາວໜຸ່ມປະຊາຊົນປະຕິວັດລາວ ຈັດກິດຈະກຳປະກວດແນວຄິດສ້າງສັນເຕັກໂນໂລຊີ ແລະນະວັດຕະກຳ ຈາກການນຳໃຊ້ສິ່ງຂອງທີ່ເຫຼືອໃຊ້, ພາຍໃຕ້ຄຳຂວັນ ເຕັກໂນໂລຊີເພື່ອການການຮ່ວມມືພັດທະນາແບບຍືນຍົງ ເພື່ອສະເຫຼີມສະຫຼອງວັນວິທະຍາສາດແຫ່ງຊາດ (12ຕຸລາ) ກໍ່ຄືເປັນງານສັບປະດາວິທະຍາສາດ ເຕັກໂນໂລຊີ ແລະນະວັດຕະກຳ.
ໃນກິດຈະກຳປະກວດຄັ້ງນີ້ ມີບັນດານັກວິທະຍາສາດໜຸ່ມ ກໍ່ຄື ນ້ອງນັກຮຽນຈາກສະຖາບັນຕ່າງໆໄດ້ສົ່ງຜົນງານເຂົ້າປະກວດ ຈຳນວນ 15 ພາກສ່ວນ ຊຶ່ງໄດ້ຄັດເລືອກຈາກຄະນະກຳມະການຈຳນວນ 54 ພາກສ່ວນ. ຜົນການແຂ່ງຂັນປາກົດວ່າສິ່ງປະດິດ “ເຄື່ອງໃຊ້ໃນຊີວິດປະຈຳວັນ” ທີ່ນຳໃຊ້ກະຕຸກນໍ້າດື່ມທີ່ໃຊ້ແລ້ວ ມາປະດິດເປັນເສື້ອຊູຊີບ ຈາກທີມ PG Purify Group, ໂຮງຮຽນ ນິລະດາ ໄດ້ລາງວັນທີ 1 ໄດ້ຮັບຂັນລາງວັນ ພ້ອມເງິນສົດຈຳນວນ 3 ລ້ານກີບ, ລາງວັນທີ 2 ແມ່ນທີມ ຈາກໂຮງຮຽນຊ້າງນ້ອຍ ຈາກການສົ່ງຜົນງານ ໄດໂນເສົາພູເຂົາໄຟຂີ້ເຫຍື້ອຫຼຸດພາວະໂລກຮ້ອນ, ໄດ້ຮັບຂັນລາງວັນພ້ອມເງິນສົດ 2,5 ລ້ານກີບ, ລາງວັນທີ 3 ແມ່ນທີມ ຊາວໜຸ່ມທົ່ວໄປ ຈາກການສົ່ງຜົນງານ ປ່ຽນເສດເຈ້ຍໃຫ້ການເປັນຄຳ ໄດ້ຮັບຂັນລາງວັນ ພ້ອມເງິນ 2 ລ້ານກີບ, ພ້ອມນັ້ນ ຍັງມີລາງວັນຊົມເຊີຍ ຈຳນວນ 3 ທີມ ໄດ້ແກ່ ນັກສຶກສາຈາກພາກວິຊາ ວິສະວະກຳໄຟຟ້າ, ຄະນະວິສະວະກຳສາດ, ວິທະຍາໄລ ສິນລະປະສຶກສາ ແລະ ສະຖາບັນ ວິຈິດສິນ ແຫ່ງຊາດ ໄດ້ຮັບເງິນສົດ ທີມລະ 7 ແສນກີບ.
ເພື່ອເປັນການສົ່ງເສີມ ຫົວຄິດປະດິດສ້າງ ຂອງນັກວິທະຍາສາດໜຸ່ມ ໃຫ້ກາຍເປັນຜູ້ທີ່ປະດິດສ້າງເພື່ອນຳຜົນງານດັ່ງກ່າວນຳໃຊ້ເຂົ້າໃນຊີວິດປະຈຳວັນ ແລະ ສາມາດນຳເອົາຜົນງານດັ່ງກ່າວໄປແຂ່ງຂັນໃນລະດັບຊາດ ແລະສາກົນໄດ້. ພ້ອມນັ້ນ, ກໍ່ໄດ້ແນໃສ່ການຊຸກຍູ້ສົ່ງເສີມການຖ່າຍທອດ, ການຄົ້ນຄວ້າ, ການປະດິດສ້າງ, ການນຳໃຊ້ເຕັກໂນໂລຊີ ແລະນະວັດຕະກຳ ເພື່ອປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງປະເທດເຮົາໃນອະນາຄົດ.