ມອບ-ຮັບສູນຂໍ້ມູນດິຈິຕ໋ອນ ທີ່ນຳໃຊ້ພະລັງງານຢ່າງມີປະສິດທິພາບ

ທ່ານ ແກ້ວນະຄອນ ໄຊສຸລຽນ ຫົວໜ້າກົມເຕັກໂນໂລຊີດິຈິຕ໋ອນ, ກະຊວງວິທະຍາສາດ ແລະເຕັກໂນໂລຊີ ເຊັນຮັບສູນຂໍ້ມູນດິຈິຕ໋ອນ ທີ່ນຳໃຊ້ພະລັງງານຢ່າງມີປະສິດທິພາບ ຂອງ ສປປ ລາວ ທີ່ໂຮງແຮມຄາວພາຊາ

ໂຄງການນີ້ ພັດທະນາໂດຍອົງການພັດທະນາພະລັງງານໃໝ່ ແລະເຕັກໂນໂລຊີອຸດສະຫະກຳ (NEDO) ຕັ້ງຢູ່ບ້ານດອນຕິ້ວ ເມືອງໄຊທານີ ນະຄອນຫຼວງວຽງຈັນ ຊຶ່ງເປັນໂຄງການ ຊ່ວຍເຫຼືອລ້າຈາກລັດຖະບານຍີ່ປຸ່ນ ດ້ວຍມູນຄ່າ 20 ລ້ານກວ່າໂດລາສະຫະລັດ ແລະມີການປະກອບທຶນສົມທົບຈໍານວນໜຶ່ງຈາກຝ່າຍລາວ

ທ່ານ ແກ້ວນະຄອນ ກ່າວວ່າ ໄດ້ດໍາເນີນສຶກສາຄວາມເປັນໄປໄດ້ໃນຕົ້ນປີ 2014 ເຖິງທ້າຍປີ 2015 ແລະໃນຕົ້ນປີ 2016 ໄດ້ຖືກຮັບຮອງ ແລະອະນຸມັດໃຫ້ມີການຈັດຕັ້ງປະຕິບັດ. ເພື່ອສ້າງເງື່ອນໄຂໃຫ້ ສປປ ລາວ ໄດ້ມີການນໍາໃຊ້ເຕັກໂນໂລຊີທີ່ທັນສະໄໝ ຕາມແນວທາງຫັນເປັນອຸດສະຫະກຳ ແລະທັນສະໄໝ ໂດຍສະເພາະ ເພື່ອພັດທະນາພື້ນຖານໂຄງລ່າງສູນຂໍ້ມູນດິຈິຕ໋ອນແຫ່ງຊາດ (Data Center) ທີ່ມີເຕັກໂນໂລຊີທັນສະໄໝ, ມີຄວາມປອດໄພ ແລະໄດ້ມາດຕະຖານສາກົນ.
ພ້ອມດຽວກັນນັ້ນ ໂຄງການຍັງຊ່ວຍສົ່ງເສີມການພັດທະນາອຸດສະຫະກຳເຕັກໂນໂລຊີດິຈິຕ໋ອນ ແບບຍືນຍົງ ແລະເປັນມິດຕໍ່ສິ່ງແວດລ້ອມ, ຫຼຸດຜ່ອນທາດອາຍກາກໂບນີກ CO2 ຊຶ່ງເປັນໂຄງການຄັ້ງທຳອິດຂອງ ສປປ ລາວ ທີ່ນອນຢູ່ໃນຂອບ JCM.

ນອກຈາກນີ້ ໃນພິທີ ຍັງມີການມອບຫຼຽນກາແຮງງານໃຫ້ແກ່ຜູ້ບໍລິຫານ, ຫົວໜ້າກົມ, ຫົວໜ້າພະແນກຂອງອົງການ NEDO, ບໍລິສັດໂຕໂຢຕ້າຊູໂຊະ, ບໍລິສັດ IIJ ທັງໝົດຈໍານວນ 5 ທ່ານ ແລະມອບໃບຍ້ອງຍໍ້ຈາກລັດຖະບານ ໃຫ້ 4 ບໍລິສັດຄື: ບໍລິສັດໂຕໂຢຕ້າຊູໂຊະ, ບໍລິສັດ IIJ, ບໍລິສັດ MUMSS ແລະ ບໍລິສັດ TTNI