ຕາມການລາຍງານຂ່າວຊິນຫົວ ຂອງທາງການ ສ.ປ ຈີນ ເມື່ອວັນອາທິດຜ່ານມາວ່າ: ບໍລິສັດດ້ານວິສະວະກຳຂອງຈີນ ໄດ້ສະຫຼອງຄວາມສຳເລັດໃນການຂຸດເຈະອຸໂມງແຫ່ງທຳອິດ ທີ່ມີໄລຍະທາງຫຼາຍກວ່າ 1,000 ແມັດ ຕາມເສັ້ນທາງລົດໄຟສາຍ ລາວ-ຈີນ ໃນອຸໂມງນາເຕີຍ ໝາຍເລກ 1 ຫ່າງຈາກນະຄອນຫຼວງວຽງຈັນໄປທາງເໜືອ ປະມານ 360 ກິໂລແມັດ ຕັ້ງຢູ່ໃນພື້ນທີ່ຂອງແຂວງຫຼວງນ້ຳທາ ເຊິ່ງມີຊາຍແດນຕິດກັບຈີນ.
ທ່ານ ຫວງ ຊົ່ງເຫວິນ ເຈົ້າໜ້າທີ່ລະດັບສູງຂອງບໍລິສັດກໍ່ສ້າງທາງລົດໄຟໝາຍເລກ 5 (CREC 5) ທີ່ເບິ່ງແຍງຮັບຜິດຊອບການກໍ່ສ້າງອຸໂມງແຫ່ງນີ້, ໃຫ້ລາຍລະອຽດກັບສຳນັກຂ່າວຊິນຫົວວ່າ ການກໍ່ສ້າງອຸໂມງນາເຕີຍ ໝາຍເລກ 1 ເລີ່ມຂຶ້ນຕັ້ງແຕ່ວັນທີ່ 3 ມິຖຸນາ 2017 ເປັນໄລຍະທາງທັງໝົດ 1,158 ແມັດ.
“ອຸໂມງແຫ່ງນີ້, ຂຸດເຈາະຜ່ານຊັ້ນຫີນອ່ອນຕະຫຼອດທາງຂອງພູ ມີຄວາມຍາກລຳບາກໃນບາງສ່ວນຂອງການກໍ່ສ້າງ ແລະສົ່ງຜົນຕໍ່ໄລຍະເວລາໃນການຂຸດເຈາະ”
ໃນເດືອນທັນວາ ປີກາຍນີ້, ອຸໂມງຢູ່ບ້ານສົມສະນຸກ ໝາຍເລກ 2 ທີ່ມີຄວາມຍາວ 301 ແມັດ ໃນແຂວງວຽງຈັນ ພາຍໃຕ້ການດຳເນີນງານຂອງບໍລິສັດ Sino Corporation Engineering Bureau 15 Co., Ltd. ເປັນອຸໂມງແຫ່ງທຳອິດ ທີ່ຂຸດເຈາະສຳເລັດ ພ້ອມເສັ້ນທາງລົດໄຟສາຍ ລາວ-ຈີນ ແລະກາຍເປັນອຸໂມງຖະໜົນ ແລະທາງລົດໄຟແຫ່ງທຳອິດໃນປະຫວັດສາດລາວ.
ເສັ້ນທາງລົດໄຟສາຍລາວ-ຈີນ ໄດ້ຮັບການສົ່ງເສີມຈາກຜູ້ນຳຂອງສອງປະເທດ ວ່າເປັນໂຄງການເຊື່ອມຕໍ່ໂຄງຂ່າຍລະຫວ່າງປະເທດ ເຊິ່ງເລີ່ມກໍ່ສ້າງມາຕັ້ງແຕ່ເດືອນທັນວາ ປີ 2016 ແລະການກໍ່ສ້າງອຸໂມງ, ຂົວ, ຖະໜົນ ແລະສ່ວນອື່ນໆປະສົບຜົນສຳເລັດດ້ວຍດີ.
ທາງລົດໄຟສາຍລາວ-ຈີນ ມີຄວາມຍາມທັງໝົດຫຼາຍກວ່າ 414 ກິໂລແມັດ ທີ່ປະກອບດ້ວຍຂົວ ແລະອຸໂມງ ປະມານ 60% ເຊື່ອມຕໍ່ລະຫວ່າງດ່ານບໍ່ຫານ-ບໍ່ເຕັນ ທາງພາກເໜືອຂອງລາວ ກັບນະຄອນຫຼວງວຽງຈັນ.
ສ່ວນຄວາມໄວຂອງລົດໄຟນັ້ນ, ອອກແບບໄວ້ທີ່ 160 ກິໂລແມັດຕໍ່ຊົ່ວໂມງ ແລະເສັ້ນທາງນີ້, ຈະດຳເນີນການຢ່າງເຕັມລະບົບ ໃນເດືອນທັນວາ ປີ 2021.
ທີ່ມາ: https://www.mgronline.com