ພິທີສາຍຮູບເງົາຮອບປະຖົມມະລຶກ “ເທດສະການຮູບເງົາດີເດັ່ນຈີນທົ່ວປະເທດລາວ” ປະຈຳປີ 2018 ໂດຍຈັດຂຶ້ນໃນວັນທີ 2 ພະຈິກ 2018 ທີ່ຫໍວັດທະນະທຳແຫ່ງຊາດ ໂດຍເປັນກຽດເຂົ້າຮ່ວມຂອງທ່ານ ບົວເງິນ ຊາພູວົງ ຮອງລັດຖະມົນຕີກະຊວງຖະແຫຼ່ງຂ່າວ,ວັດທະນະທຳ ແລະທ່ອງທ່ຽວ(ຖວທ), ທ່ານ ຈ້າວເສິງກ່າງ ທີ່ປຶກສາການເມືອງສະຖານທູດ ສປ ຈີນປະຈຳລາວ ພ້ອມບັນດາແຂກຖືກເຊີນ ແລະ ນັກສະແດງທີ່ມີຊື່ສຽງສອງຝ່າຍລາວ-ຈີນເຂົ້າຮ່ວມ.
ງານຄັ້ງນີ້ ຈັດຂຶ້ນໂດຍວິທະຍຸສາກົນແຫ່ງປະເທດຈີນ CRI ປະຈຳລາວ ແລະກົມຮູບເງົາ ພາຍໃຕ້ການຊີ້ນຳຂອງສະຖານທູດ ສປ ຈີນປະຈຳລາວ ແລະ ກະຊວງ ຖວທ ມີຈຸດປະສົງເພື່ອຮັດແໜ້ນແລກປ່ຽນການພົວພັນລະຫວ່າງສອງປະເທດ ໂດຍສະເພາະແມ່ນສ້າງຄວາມສະໜິດສະໜົມເຊິ່ງກັນແລະກັນ. ນອກນັ້ນຍັງຖືເອົາເປັນກິດຈະກໍາໜຶ່ງໃນການຮ່ວມມືທາງດ້ານວັດທະນະທໍາທີ່ມີຂີດໝາຍສໍາຄັນ.
ສໍາລັບຮູບເງົາທີ່ນຳມາສາຍຄັ້ງນີ້ ແມ່ນໄດ້ພາກເປັນພາສາລາວ ທັງໝົດມີ 3 ເລື່ອງຄື: ເລື່ອງບໍ່ມີຄຳວ່າຍອມ, ຍຸດທະການທະເລແດງ ແລະທີມສາວເຈົ້າວາຍຸ ໃນນັ້ນ ໄດ້ເຊີນນັກພາກສິລະປິນ ແລະ ນັກສະແດງທີ່ມີຊື່ສຽງລະດັບແນວໜ້າຂອງປະເທດລາວມາຮ່ວມພາກສຽງເຊັ່ນ: ໜຶ່ງ super one, ໄກ່ overdance, ນູ່ນີ ກຸມພົນພັກດີ, ບ໋ອບ ຟຣີແມນ, ເທເລີ້, ວິນລີ້, ໂຕ່ໂຕ້, ບາບີ້, ສັກ ວົງເຊວ ແລະ ມີນັກພາກຜູ້ມີປະສົບການອີກຫຼາຍທ່ານເຂົ້າຮ່ວມພາກ.
ຫຼັງຈາກ ຈັດສາຍຢູ່ໃນນະຄອນຫຼວງວຽງຈັນສຳເລັດແລ້ວ ໃນລະຫວ່າງເດືອນພະຈິກຫາເດືອນທັນວາ ຍັງຈະໄປສາຍໃນຕ່າງແຂວງອີກເປັນຕົ້ນ ແຂວງສະຫວັນນະເຂດ,ຈຳປາສັກ,ອັດຕະປື,ວຽງຈັນ,ໄຊຍະບູລີ,ຊຽງຂວາງ ແລະຫົວພັນ ໂດຍຜູ້ເຂົ້າຊົມຈະບໍ່ໄດ້ເສຍຄ່າໃດໆທັງນັ້ນ.