ງານຕະຫຼາດນັດສິນຄ້າລາວ – ໄທໄດ້ຈັດຂຶ້ນຫວ່າງບໍ່ດົນມານີ້, ຢູ່ທີ່ເດີນສະໜາມຫຼວງແຂວງໄຊຍະບູລີ. ໂດຍໃຫ້ກຽດເຂົ້າຮ່ວມ ມີທ່ານ ນາງ ບຸນພັກ ອິນທະປັນຍາ ຮອງເຈົ້າແຂວງໄຊຍະບູລີ ທ່ານ ບັນນະສານ ຈັນທະລະສົມສັກ ເລຂາທິການສະມາຄົມລາວ – ໄທ ເພື່ອມິດຕະພາບ ມີການນໍາຂອງແຂວງ ຂອງເມືອງ ຕະຫຼອດຮອດພໍ່ ແມ່ປະຊາຊົນ ນັກທຸລະກິດ ແລະ ຊາວຄ້າຂາຍທັງພາຍໃນ ແລະ ຕ່າງປະເທດເຂົ້າຮ່ວມ.
ທ່ານ ບຸນຊູ ວິໄລສັກ ຮອງຫົວໜ້າພະແນກອຸດສາຫະກໍາ ແລະ ການຄ້າແຂວງໄຊຍະບູລີ ໄດ້ກ່າວວ່າ: ການຈັດງານຕະຫຼາດນັດ ແລະ ວາງສະແດງສິນຄ້າລາວ – ໄທ ເພື່ອເປັນການສ້າງຂະບວນການປະກອບສ່ວນໃນກິດຈະກໍາໜຶ່ງຂອງງານທອດກະຖິນ ພະຣາສະທານຂອງເຈົ້າຊີວິດ ແຫ່ງຣາຊະອານາຈັກໄທໄທ ຈະໄດ້ຈັດຂຶ້ນໃນລະຫວ່າງວັນທີ 17 – 18 ພະຈິກນີ້ ທີ່ເດີ່ນສະໜາມຫຼວງຂອງແຂວງໄຊຍະບູລີ.
ອີກດ້ານໜຶ່ງກໍ່ເພື່ອເປັນການສ້າງເງື່ອນໄຂເອື້ອອໍານວຍສົ່ງເສີມໃຫ້ຜູ້ປະກອບການທຸລະກິດ, ຜູ້ຜະລິດສິນຄ້າຢູ່ໃນແຕ່ລະທ້ອງຖິ່ນ ທັງພາຍໃນ ແລະ ຕ່າງເທດ ໄດ້ມີໂອກາດພົບປະແລກປ່ຽນບົດຮຽນການຊື້ຂາຍສິນຄ້າຂອງຕົນທີ່ຜະລິດມາ ແລະ ຖອດຖອນບົດຮຽນເຊິ່ງກັນ ແລະກັນໃນຂະບວນການຜະລິດສິນຄ້າຂອງຕົນເອງໃຫ້ມີການຂະຫຍາຍຕົວທາງດ້ານປະລິມານ ແລະ ຄຸນນະພາບພ້ອມທັງສ້າງໂອກາດໃຫ້ຫົວໜ່ວຍທຸລະກິດຕ່າງໆໄດ້ໂຄສະນາສິນຄ້າໃຫ້ສັງຄົມ ກໍ່ຄືຜູ້ບໍລິໂພກໄດ້ຮັບຮູ້ ແລະ ເຂົ້າໃຈກ່ຽວກັບຜະລິດຕະພັນຂອງຕົນເອງຢ່າງກວ້າງຂວາງ ໂດຍລວມແລ້ວການຈັດງານແລກປ່ຽນສິນຄ້າລາວ – ໄທໃນງານທອດກະຖິນພະຣາດສະທານຂອງເຈົ້າຊິວິດແຫ່ງຣາສະອານາຈັກ ໃນຄັ້ງນີ້. ໄດ້ມີຮ້ານວາງສະແດງສິນຄ້າທັງພາຍໃນ ແລະ ຕ່າງປະເທດທັງໝົດ 40 ກວ່າຮ້ານເຊິ່ງມີມູນຄ້າ 1 ຕື້ກວ່າກີບ. ໃນນີ້ມີຮ້ານມາຈາກບັນດາເມືອງອ້ອມຂ້າງແຂວງ ແລະ ຕ່າງແຂວງ 27 ຮ້ານ ແລະ ມາຈາກຕ່າງປະເທດ 10 ຮ້ານ. ໃນໂອກາດນີ້ ທ່ານ ຮອງເຈົ້າແຂວງພ້ອມດ້ວຍການນໍາ ແລະ ແຂກເຂົ້າຮ່ວມໄດ້ພ້ອມກັນລັ່ນຄ້ອງ ແລະ ຕັດແຖບຜ້າເປີດຕະຫຼາດນັດວາງສະແດງແລກປ່ຽນສິນຄ້າລາວ – ໄທ ຢ່າງເປັນທາງການ ແລະ ຈະໄດ້ດໍາເນີນໄປຈົນເຖິງວັນທີ 19 ພະຈິກ 2018 ຈະສໍາເລັດລົງ.
Cr.Midialaos