ພິທີປະກາດການແຕ່ງຕັ້ງຮອງຫົວໜ້າພະແນກການເງິນ ຈັດຂຶ້ນທີ່ພະແນກການເງິນແຂວງຄຳມ່ວນ ໃນມື້ນີ້, ໂດຍເປັນກຽດເຂົ້າຮ່ວມຂອງທ່ານ ບຸນໂຈມ ອຸບົນປະເສີດ ຮອງລັດຖະມົນຕີກະຊວງການເງິນ, ທ່ານ ພົວ. ສົມແຄນ ອັບປະສອນ ຄະນະປະຈຳພັກແຂວງ, ຫົວໜ້າກອງບັນຊາການທະຫານແຂວງຄຳມ່ວນ, ມີບັນດາກົມ ມາຈາກກະຊວງ, ພະແນກການອ້ອມຂ້າງແຂວງ ຕະຫຼອດເຖິງພະນັກງານໃນຂົງເຂດການເງິນແຂວງເຂົ້າຮ່ວມ.
ໃນພິທີທ່ານ ນາງ ມຸນທາ ລັດຖະຈັກ ຮອງຫົວໜ້າຄະນະຈັດຕັ້ງແຂວງໄດ້ຂຶ້ນຜ່ານຂໍ້ຕົກລົງຂອງທ່ານ ເຈົ້າແຂວງໆຄຳມ່ວນ ວ່າດ້ວຍການແຕ່ງຕັ້ງຮອງຫົວໜ້າພະແນກການເງິນແຂວງຄຳມ່ວນ ໂດຍແຕ່ງຕັ້ງທ່ານ ປອ. ສົມສະອາດ ອຸ່ນສີດາ ຮອງຫົວໜ້າກົມສະສົມແຫ່ງລັດກະຊວງການເງິນ ເປັນຮອງຫົວໜ້າພະແນກການເງິນ ແຂວງຄຳມ່ວນ.
ໃນໂອກາດດັ່ງກ່າວ ທ່ານ ບຸນໂຈມ ອຸບົນປະເສີດ ກໍ່ໄດ້ໂອ້ລົມຕໍ່ຄະນະນຳ ກໍ່ຄືພະນັກງານລັດຖະກອນ ໃນຂົງເຂດການເງິນແຂວງ ຈົ່ງໄດ້ພ້ອມກັນເອົາໃຈໃສ່ສູ້ຊົນປະຕິບັດການເກັບລາຍຮັບແຜນງົບປະມານໃຫ້ບັນລຸຕາມ ຄາດໝາຍ, ເອົາໃຈໃສ່ດຳເນີນການໂຄສະນາເຜີຍແຜ່ກົດໝາຍໃຫ້ທົ່ວເຖິງ ພ້ອມທັງນຳໃຊ້ມາດຕະການຕໍ່ກົດໝາຍ ເພື່ອຄຸ້ມຄອງເສດຖະກິດ, ຄຸ້ມຄອງງົບປະມານການເງິນ, ດຳເນີນການກວດກາ, ຄຸ້ມຄອງການນຳເຂົ້ານ້ຳມັນເຊື້ອໄຟ ເພື່ອແກ້ໄຂສ່ອງຫວ່າງການລົບຫຼີກເສຍອາກອນ, ປັບປຸງ ແລະ ພັດທະນາບຸກຄະລາກອນໃຫ້ມີຄຸນນະພາບ, ມີຄວາມຮັບ ຜິດຊອບທາງດ້ານການເມືອງ ແລະ ວິຊາສະເພາະສູງຂຶ້ນ ພ້ອມທັງເອົາໃຈໃສ່ຕື່ມຕໍ່ນະໂຍບາຍປະຢັດ ເພື່ອປະຢັດ ລາຍຈ່າຍທີ່ບໍ່ຈຳເປັນ ແລະ ຮຽກຮ້ອງຕໍ່ທ່ານທີ່ຖືກແຕ່ງຕັ້ງໃໝ່ ຈົ່ງສຸມ ຈິດໃຈປະກອບ ສ່ວນຈັດຕັ້ງປະຕິບັດ ແລະ ຊີ້ນໍາ-ນຳພາຂົງເຂດວຽກງານການເງິນຂອງແຂວງໃຫ້ມີຄວາມກ້າວໜ້າ ແລະ ບັນລຸຕາມຄາດໝາຍທີ່ວາງໄວ້.
#insidelaos
Cr.Midia Laos
