ປະເພນີແຫ່ຜາສາດເຜີ້ງເປັນພິທີກຳທາງສາສະໜາ ແມ່ນວັດທະ ນະທຳອັນດີງາມ ທີ່ສະແດງເຖິງຄວາມພາກພຽນ ການປະດິດຄິດສ້າງ ແລະ ການເຕົ້າໂຮມຄວາມສາມັກຄີຂອງປະຊາຊົນລາວບັນ ດາເຜົ່າໂດຍສະເພາະແມ່ນປະຊາຊົນຊາວນະຄອນຫຼວງວຽງຈັນ ທີ່ສືບທອດກັນມາແຕ່ບູຮານນະການ ໂດຍແຕ່ລະປີໄດ້ມີການຈັດຂຶ້ນໃນວັນຂຶ້ນ 14 ຄໍ່າເດືອນສິບສອງຂອງງານສະເຫຼີມສະຫຼອງບຸນນະມັດສະການພະທາດຫຼວງ ເພື່ອເປັນການສືບສານວັດທະ ນະທຳອັນດີງາມໃຫ້ຄົງຢູ່ກັບປະຊາຊົນລາວຕະຫຼອດໄປ.
ໃນຕອນບ່າຍມື້ນີ້, ໄດ້ຈັດຂະບວນແຫ່ຜາສາດເຜີ້ງໃນບຸນນະມັດສະການພະທາດຫຼວງປະຈຳປີ ພສ 2561 ຂຶ້ນທີ່ພະທາດຫຼວງ ໂດຍມີພະສົງສາມະເນນ ການນຳພັກ-ລັດ ແລະ ມວນຊົນຊາວນະຄອນຫຼວງເຂົ້າຮ່ວມຢ່າງເປັນຂະບວນຄືກຄື້ນມ່ວນຊື່ນ.
ການແຫ່ຜາສາດເຜີ້ງໃນປີນີ້ ໄດ້ເຄື່ອນຍ້າຍຂະບວນແຫ່ຢູ່ວັດໜອງບອນ ແລ້ວເຂົ້າສູ່ກົມມະລຽນພະທາດຫຼວງເບື້ອງທິດຕາ ເວັນອອກ ໃນນັ້ນນຳໜ້າດ້ວຍຂະບວນແຫ່ຂອງພະສົງ ສຳມະ ເນນ ການນຳພັກ-ລັດເຊິ່ງນຳໂດຍທ່ານ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ ພ້ອມດ້ວຍການນຳນະຄອນຫຼວງ ອົງ ການຈັດຕັ້ງມະຫາຊົນ ເຖົ້າແກ່ແນວໂຮມ ຕາມດ້ວຍຂະບວນດົນ ຕີພື້ນເມືອງ ຂະບວນຂອງບັນດາເມືອງຕ່າງໆ ສຳນັກງານ-ອົງການ ແລະ ປະຊາຊົນລາວບັນດາເຜົ່າ ໂດຍຂະບວນການແຫ່ຜາສາດເຜີ້ງໄດ້ເຄື່ອນຜ່ານປະຕູໂຂງດ້ານສະໜາມຫຼວງ ແລ້ວແຫ່ອ້ອມພະທາດ 3 ຮອບ ຈາກນັ້ນກໍ່ໄດ້ຖວາຍຜາສາດເຜິ້ງ ຟັງທຳມະເທສະໜາ1ກັນ ແລະ ກາບໄຫວ້ຊັກກະລະບູຊາພະທາດຫຼວງແລ້ວຖືເປັນການສິ້ນສຸດພິທີ ສຳລັບວັນທີ 22 ພະຈິກ 2018 ເວລາ 7:00 ໂມງເຊົ້າ ທີ່ເດີ່ນພະທາດຫຼວງ ໄດ້ມີພິທີໃສ່ບາດ ຕອນບ່າຍເວລາ 13:30 ໂມງມີພິທີແຫ່ລູກຄີ ແລະ ກີລາຕີຄີ ຢູ່ເດີ່ນສະໜາມຫຼວງ ສ່ວນຕອນຄ່ຳມີວຽນທຽນ ຈູດບັ້ງໄຟດອກ ແລະ ຄົບງັນມ່ວນຊື່ນຕາມປະເພນີ.
#insidelaos
Cr.Vientianemai