ພິທີເປີດຂະບວນຄາລາວານລົດທ່ອງທ່ຽວສູ່ເມືອງວຽງໄຊ-ຖານທີ່ໝັ້ນຂອງການປະຕິວັດລາວໄ ດ້ມີຂຶ້ນໃນຕອນເຊົ້າຂອງວັນທີ 28 ພະຈິກນີ້, ຢູ່ທີ່ເດີ່ມພະທາດຫຼວງວຽງຈັນ, ໂດຍການເຂົ້າຮ່ວມຂອງ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ຂະບວນຄາລາວທ່ອງທ່ຽວດັ່ງກ່າວແມ່ນຈະເດີນທາງອອກຈາກນະຄອນຫຼວງວຽງຈັນໄປຍັງແຂວງບໍລິຄໍາໄຊ, ຊຽງຂວາງ ແລະແຂວງຫົວພັນ ເພື່ອເຂົ້າຮ່ວມພິທີສະເຫຼີມສະຫຼອງວັນສ້າງຕັ້ງເມືອງວຽງໄຊ-ຖານທີ່ໝັ້ນຂອງການປະຕິວັດລາວຄົບຮອບ 50 ປີ, ຊຶ່ງຂະບວນຄາລະວານຄັ້ງນີ້ມີຜູ້ເຂົ້າທັງໝົດ 528 ທ່ານຈາກພາກລັດຂັ້ນສູນກາງແລະທ້ອງຖິ່ນລວມທັງອົງການຈັດຕັ້ງມະຫາຊົນແລະພາກເອກະຊົນມີຈໍານວນລົດເຂົ້າຮ່ວມຂະບວນຄາລາວານ 110 ຄັນ.
ການຈັດຂະບວນຄາລາວານລົດທ່ອງທ່ຽວສູ່ເມືອງວຽງໄຊແຂວງຫົວພັນຄັ້ງນີ້ ເພື່ອເປັນການສຶກສາຮຽນຮູ້ ແລະເຜີຍແຜ່ຄວາມເອກອ້າງທະນົງໃຈຕໍ່ມູນເຊື້ອປະຫວັດສາດການຕໍ່ເສື້ອອັນຍືດເຍື້ອຍາວນານພິລະອາດຫານຂອງປະຊາຊົນບັນດາເຜົ່າ ແລະວິລະກຳອັນລໍ້າເລີດຂອງບັນດາວິລະຊົນ, ນັກຮົບແຂ່ງຂັນໃນພາລະກິດຕໍ່ສູ່ປົດປ່ອຍຊາດ, ການປົກປັກຮັກສາແລະພັດທະນາປະເທດຊາດໃນໄລຍະຜ່ານມາພາຍໃຕ້ການນໍາພາຂອງພັກປະຊາຊົນປະຕິວັດລາວ.ພ້ອມນີ້ກໍ່ເປັນການລະນຶກ ແລະສະແດງຄວາມຮູ້ບຸນຄຸນຢ່າງເລິກເຊິ່ງຕໍ່ຜົນງານ ແລະຄຸນງາມຄວາມດີອັນໃຫຍ່ຫລວງຂອງບັນດາຜູ້ນຳທີ່ເຄົາລົບຮັກບັນດານັກຮົບຜູ້ອາດຫານທຸກຫມູ່ເລົ່າພ້ອມທັງພໍ່ແມ່ປະຊາຊົນທີ່ເສຍສະຫລະເລືອດເນື້ອໃນການຕໍ່ສູ້ເພື່ອປະເທດຊາດ ແລະປະຊາຊົນເຮົາ.
ທັງເປັນການຮຽນຮູ້ຄຸນສົມບັດສິນທຳປະຕິວັດ,ທັດສະນະແລະອຸດົມຄະຕິຂອງການປະຕິວັດລວມທັງແບບແຜນການນຳແລະແບແຜນການດຳລົງຊິວິດຂອງຜູ້ນຳຮຸ່ນກ່ອນ, ສ້າງຄວາມເອກອ້າງທະນົງໃຈຕໍ່ຜົນສຳເລັດແຫ່ງການຕໍ່ສູ້ກູ້ຊາດ, ການປົກປັກຮັກສາແລະພັດທະນາສ້າງສາປະແທດຊາດ, ເພີ່ມທະວີຄວາມສາມັກຄີເປັນເອກະພາບ, ເສີມຂະຫຍາຍມູນເຊື້ອຮັກຊາດ, ມູນເຊື້ອຕໍ່ສູ້ອົງອາດກ້າຫານແລະມູນເຊື້ອສາມັກຄີພາຍໃຕ້ການນຳພາຂອງພັກ.ພ້ອມດຽວກັນນີ້ຂະບວນຄາລາວານລົດທ້ອງທ່ຽວຄັ້ງນີ້ຍັງເປັນການປຸກລະດົມຂົນຂວາຍແລະສ້າງຂະບວນການໂຄສະນາສົ່ງເສີມປີທ້ອງທ່ຽວລາວ 2018 “ລາວທ່ຽວລາວ”ໂດຍສະເພາະຢູ່ຖານທີ່ຫມັ່ນຂອງການປະຕິວັດລາວກໍ່ຄືການດຶງດູດນັກທ່ອງທ່ຽວໃຫ້ຢ້ຽມຢາມທ່ຽວຊົມບັນດາແຂວງພາກເໜືອໃຫ້ນັບມື້ຫຼາຍຂຶ້ນ ແລະເປັນຂະບວນຟົດຟື້ນແນໃສ່ຊຸກຍູ້ການພັດທະນາເສດຖະກິດ-ສັງຄົມຂອງທ້ອງຖິ່ນປະກອບສ່ວນໃນການຫຼຸດຜ່ອນຄວາມທຸກຍາກຂອງປະຊາຊົນເທື່ອລະກ້າວ.
