ກະຊວງ ໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ຮ່ວມກັບ ຫ້ອງວ່າການສຳນັກງານ ນາຍົກລັດຖະມົນຕີ ຈັດສຳມະນາ“ການຫັນເປັນທັນສະໄໝ ທາງດ້ານດີຈີຕອນ ໃນ ສປປ ລາວ ເພື່ອເປັນການແລກປ່ຽນຄວາມຮູ້, ປະສົບການ ແລະ ລະດົມຄວາມຄິດຕໍ່ການຮ່າງ ທິດທາງນະໂຍບາຍ ແລະ ເປົ້າໝາຍທາງດ້ານເຕັກນິກ ຂອງທຸກຂະແໜງການ, ທັງເປັນສົ່ງເສີມ ແລະ ຮອງຮັບການໃຫ້ການ ຫັນເປັນດີຈີຕອນຂອງລາວ ໃຫ້ມີການຂະຫຍາຍຕົວຢ່າງຍືນຍົງ ແລະ ກາຍເປັນ ເຄຶ່ອງມື ທີ່ສໍາຄັນໃນການຊຸກຍູ້ ການພັດທະນາ ເສດຖະກິດ-ສັງຄົມຂອງຊາດ ໃຫ້ເຂັ້ມແຂງ ແລະ ທັນກັບຍຸກສະໄໝ.
ທ່ານ ທັນສະໄໝ ກົມມະສິດ, ລັດຖະມົນຕີ ກະຊວງ ປທສ ໃຫ້ຮູ້ວ່າ: ການຫັນເປັນທັນສະໄໝ ເປັນວຽກງານໜຶ່ງທີ່ພັກ ແລະ ລັດຖະບານ ໃຫ້ຄວາມສຳຄັນ ສະແດງອອກໃນມະຕິກອງປະຊຸມໃຫຍ່ຄັ້ງທີ X ຂອງພັກ ໄດ້ມີທິດໃຫ້ເລັ່ງຜັນຂະຫຍາຍການນຳໃຊ້ ICT ເຂົ້າໃນທຸກຂະແໜງການ ເພື່ອຫັນເປັນທັນສະໄໝ. ການຫັນເປັນທັນສະໄໝ ທາງດ້ານດີຈີຕອນ ແມ່ນການນຳໃຊ້ເຕັກໂນໂລຊີ ການສື່ສານ ຂໍ້ມູນຂ່າວສານ (ICT) ເຂົ້າເປັນກົນໄກສຳຄັນ ໃນການຊຸກຍູ້ການປະຕິຮູບ ຂະບວນການຜະລິດ, ການດຳເນີນທຸລະກິດ, ການຄ້າ-ການບໍລິການ, ການສຶກສາ, ສາທາລະນະສຸກ, ການບໍລິຫານລັດ, ລວມທັງ ກິດຈະກໍາ ທາງເສດຖະກິດ ແລະ ສັງຄົມອື່ນໆ. ທັງນີ້ກໍຈະນໍາໄປສູ່ ການປະຕິຮູບພື້ນຖານຂອງການບໍລິການ, ການດຳເນີນທຸລະກິດ ແລະ ສ້າງມູນຄ່າເພີ່ມຂຶ້ນ ໃຫ້ແກ່ຜູ້ຊົມໃຊ້ ລວມທັງການປະຕິຮູບ ພື້ນຖານການຜະລິດ ເພື່ອກ້າວໄປສູ່ອຸດສະຫະກຳ 4.0 ເປັນຕົ້ນ ການນໍາໃຊ້ ICT (e-Government, IoT, Big Data, AI, ແລະ ອື່ນ) ເຂົ້າໃນທຸກຂະແໜງການຂອງລັດ ເພື່ອຮັບໃຊ້ປະຊາຊົນ ເຊັ່ນ ການຊຳລະພາສີ ອາກອນຕ່າງໆ ຜ່ານມືຖື, ຜ່ານເວັບໄຊ, ການສົ່ງເສີມໃຫ້ປະຊາຊົນໃຫ້ເຂົ້າເຖິງຂໍ້ມູນຂ່າວສານ, ການບໍລິການ ຜ່ານທາງອິນເຕີເນັດ ແລະ ນຳໃຊ້ໄອຊີທີໃຫ້ເກີດ ຜົນປະໂຫຍດສູງສູດ.
ການສຳມະນາຄັ້ງນີ້ ໄດ້ມີການເຜີຍແຜ່, ປະກອບສ່ວນຄຳຄິດຄຳເຫັນ, ແລກປ່ຽນບົດຮຽນ ແລະ ປະສົບການ ທາງດ້ານເຕັກໂນໂລຊີ ແລະ ນະໂຍບາຍ ໃນການຫັນເປັນດີຈີຕອນ, ພ້ອມທັງຍົກໃຫ້ເຫັນ ສະພາບການ ຄຸ້ມຄອງນໍາໃຊ້ໄອຊີທີ, ແຜນຍຸດທະສາດການພັດທະນາ ໄອຊີທີ, ທິດທາງ ແລະ ແຜນການຫັນວຽກງານ ລັດຖະບານເປັນດີຈີຕອນ ຢູ່ ສປປ ລາວ, ສິ່ງທ້າທາຍດ້ານຄວາມປອດໄພ ທາງໄຊເບີໃນການສ້າງ ເສດຖະກິດດີຈີຕອນ ຢູ່ປະເທດ ແລະ ບັນຫາສຳຄັນອື່ນໆ.
#insidelaos
Cr.KPL
