ສສຊ ປະກອບຄຳເຫັນໃສ່ຮ່າງກົດໝາຍ ສຳນັກງານຜູ້ຕາງໜ້າ ສປປ ລາວ ຢູ່ຕ່າງປະເທດ

​ໃນ​ວາລະ​ດຳ​ເນີນ​ກອງ​ປະຊຸມ ສະ​ໄໝ​ສາມັນ​ເທື່ອ​ທີ 6 ຂອງ​ສະ​ພາ​ແຫ່ງ​ຊາດ ຊຸດ​ທີ VIII ​ໃນມື້​ວານນີ້, ບັນດາ​ສະມາ​ຊິກ ​ສະພາ​ແຫ່ງ​ຊາດ (ສສຊ) ​ໄດ້​ສຸມ​​ໃສ່​ປະກອບ​ຄຳ​ຄິດ​ຄຳ​ເຫັນ​ ໃສ່​ຮ່າງ​ກົດໝາຍ​ວ່າ​ດ້ວຍ​ ສຳນັກງານ​ຜູ້ຕາງໜ້າ ​ແຫ່ງ ສປປ ລາວ ປະຈຳຢູ່​ຕ່າງປະ​ເທດ ​ເຊິ່ງ​ເປັນ​ກົດໝາຍ​ສ້າງ​ໃໝ່ ທີ່​ສະ​ເໜີ​ໂດຍ​ທ່ານ ສະ​ເຫລີ​ມ ​ໄຊ​ກົມມະ​ສິດ ລັດຖະມົນຕີ​ກະຊວງ​ການ​ຕ່າງປະ​ເທດ, ກົດໝາຍ​ສະບັບດັ່ງກ່າວ, ປະກອບ​ມີ 10 ພາກ, 12 ໝວດ, 65 ມາດຕາ.

ໃນ​ກອງ​ປະຊຸມ ບັນດາ ສສຊ ​ໄດ້​ສຸມ​ໃສ່​ປະກອບ​ຄຳ​ຄິດ​ຄຳ​ເຫັນ ​ໃສ່​ຮ່າງ​ກົດໝາຍ​ສະບັບ​ດັ່ງ ກ່າວ, ຕາມ​ຄຳ​ຖາມເຈາະ​ຈີ້ມ ​ຂອງ​ປະ​ເທດ​ກອງ​ປະຊຸມ ຢ່າງ​ກົງ​ໄປ​ກົງ​ມາ ​ເຊິ່ງ​ໂດຍ​ລວມ​ແລ້ວ ​ແມ່ນ​ເຫັນ​ດີ​ເປັນ​ເອກະ​ພາບ ​​ເປັນ​ພື້ນຖານ ​ທາງ​ດ້ານ​ໂຄງ​ສ້າງ ​ແລະ ​ເນື້ອ​ໃນ ​ແຕ່ຍັງ​ມີ ສສຊ ບາງ​ເຂດ ​ໄດ້​ສະ ​ເໜີ​ໃຫ້​ມີ​ການ​ປັບປຸງ​ເນື້ອ​ໃນ​ບາງ​ໝວດ​, ບາງມາ​ດຕາ ໂດຍ​ສະ​ເພາະ

ມາດ​ຕາ​ທີ 2 ທີ່​ເວົ້າ​ກ່ຽວ​ກັບ​ສຳນັກງານ​ຜູ້ຕາງໜ້າ ​ແຫ່ງ ສປປ ລາວ​ ປະຈຳ​ຢູ່​ຕ່າງປະ​ເທດ

ມາດຕາ 3 ກ່ຽວ​ກັບການ​ອະທິບາຍ​ຄຳ​ສັບ

ມາດຕາ​ທີ 4 ກ່ຽວ​ກັບນະ​ໂຍບາຍ​ຂອງ​ລັດ ​ຕໍ່​ສຳນັກງານ​ຜູ້ຕາງໜ້າ

ມາດຕາ​ທີ 5 ກ່ຽວ​ກັບ​ການຈັດ​ຕັ້ງ ​ແລະ ​ເຄື່ອນ​ໄຫວ​ຂອງ​ສຳນັກງານ​ຜູ້ຕາງໜ້າ

ມາດຕາ 8 ສິດ ​ແລະ ໜ້າ​ທີ່​ຂອງ​ສຳນັກງານ​ຜູ້​ຕາງ​ໜ້າ

​ແລະ ມາດຕາທີ 10 ກ່ຽວ​ກັບ​ການ​ຮັບ​ໃຊ້​ ການ​ພັດທະນາ​ ເສດຖະກິດ​ ຂອງ​ຊາດ ​ແລະ ມາດ​ຕາ​ອື່ນໆ.

ບັນ​ດາ ສສຊ ​ໄດ້ສະ​ເໜີ ​ໃຫ້ຕັດ​ອອກ, ​ເພີ່ມ​ໃສ່ ບາງ​ເນື້ອໃນ, ບາງ​ຄຳ​ສັບ​ ​ແລະ ອະທິ​ບາຍບາງຄຳ​ສັບ ທີ່​ເຫັນ​ວ່າ​ຍັງ​ບໍ່​ທັນ​ສອດຄ່ອງ, ຖືກຕ້ອງ​, ຊັດ​ເຈນ ​​ແນ​ໃສ່​ເຮັດ​ໃຫ້​ກົດໝາຍ​ສະບັບ​ດັ່ງກ່າວ, ມີ​ເນື້ອ​ໃນ​ຄົບ​ຖ້ວນ, ສົມບູນ ​ແລະ ສອດ​ຄອງ​ຕາມ​ແນວທາງນະ​ໂຍບາຍ ຂອງ​ພັກ, ລັດ ວາງ​ອອກ.

ພ້ອມ​ນັ້ນ, ບັນດາ​ ສສຊ ຍັງ​ໄດ້​ສະ​ເໜີ​ໃຫ້ ​ພາກສ່ວນ​ກ່ຽວຂ້ອງ ​ເພີ່ມ​ທະວີ​ໃນ​ການ​ຄຸ້ມ​ຄອງ ຄົນ​ລາວ​ໄປ​ສຶກສາ​ຕໍ່, ​ໄປ​​ເຮັດວຽກ, ​ໄປສ້າງ​ຄອບຄົວ ຢູ່​ຕ່າງປະ​ເທດ; ພ້ອມ​ທັງ ສະ​ເໜີ​ໃຫ້​​ເພີ່ມ​ທະວີ ຊອກ​ຫາ​ຊ່ອງ​ທາງ ​ເພື່ອ​ດຶງ​ດູດ​ເອົາ​ຄົນ​ລາວ ຢູ່​ຕ່າງປະ​ເທດ ທີ່​ຍັງ​ບໍ່​ມີ​ສັນຊາດ ກັບ​ຄືນ​ມາຢູ່​ລາວ ​ແລະ ບັນຫາສຳຄັນອື່ນໆຈຳນວນໜຶ່ງ.

#insidelaos

ຮູບ​ປະ​ກອບ: https://www.moj.gov.la

Cr.KPL