ພິທີຖະແຫຼງຂ່າວງານເທສະການອາຫານລາວປະຈຳປີ 2019, ຊຶ່ງຈະຈັດຂຶ້ນໃນລະຫວ່າງວັນທີ 23-26 ມັງກອນ, ຢູ່ເດີ່ນສວນເຈົ້າອານຸວົງບໍລິເວນແຄມຂອງ (ຕໍ່ໜ້າດຈັນ), ເມືອງຈັນທະບູລີນະຄອນຫຼວງວຽງຈັນ, ໄດ້ຈັດຂຶ້ນ ທີ່ສະພາການຄ້າແລະອຸດສາຫະກຳແຫ່ງຊາດ, ໂດຍການເຂົ້າຮ່ວມຂອງທ່ານນາງຈັນທະຈອນວົງໄຊປະທານສະມາຄົມນັກທຸລະກິດແມ່ຍິງ, ປະທານຄະນະກຳມະການຈັດງານ, ທ່ານນາງບົວຈັນສີຫານາດຮອງປະທານສູນກາງສະຫະພັນແມ່ຍິງລາວ, ທ່ານນາງແສງແກ້ວພຸດທະວົງຮອງຫົວໜ້າພະແນກຄຸ້ມຄອງກອງທຶນສົ່ງເສີມທຸລະກິດຂະໜາດນ້ອຍ ແລະກາງ, ທ່ານດາວອນຈັນທະວົງຮອງປະທານສະພາການຄ້າ ແລະອຸດສາຫະກຳແຫ່ງຊາດ, ທ່ານຈັນສະໝອນຜອງຈັນທາຫົວໜ້າຝ່າຍການຕະຫຼາດບໍລິສັດເບຍລາວ.
ທ່ານນາງຈັນທະຈອນວົງໄຊກ່າວວ່າ: ງານເທສະການອາຫານລາວປີ 2019 ນີ້ແມ່ນເພື່ອສືບຕໍ່ຊຸກຍູ້ແລະສົ່ງເສີມຫົວໜ່ວຍທຸລະກິດຂອງແມ່ຍິງນັບທັງການຜະລິດ, ການປູກພືດກະສິກຳ, ລ້ຽງສັດ, ປຸງແຕ່ງ, ທຸລະກິດຮ້ານອາຫານການຮງແຮມແລະອື່ນໆທັງຢູ່ນະຄອນຫຼວງວຽງຈັນແລະທ້ອງຖິ່ນ, ຕ່າງແຂວງໃຫ້ໄດ້ມີໂອກາດມາວາງສະແດງແລະຂາຍຜະລິດຕະພັນຂອງຕົນ, ພ້ອມກັນນັ້ນຍັງເປັນການສ້າງໂອກາດໃຫ້ຜູ້ປະກອບການແມ່ຍິງທັງຫຼາຍມີໂອກາດໄດ້ແລກປ່ຽນບົດຮຽນ, ປະສົບການໃນການພັດທະນາຜົນຜະລິດຂອງຕົນໃຫ້ສາມາດຕອບສະໜອງໄດ້ຕາມຄວາມຕ້ອງການຂອງຕະຫຼາດໃນຍຸກປະຈຸບັນ, ທັງປຸກລະດົມໃຫ້ຜຜູ້ປະກອບການແມ່ຍິງມີຄວາມຄິດແບບໃໝ່ໃນການຜະລິດເປັນສິນຄ້າແລະສາມາດຂາຍອອກສູ່ຕະຫຼາດສາກົນ, ເປັນການສ້າງເຄືອຂ່າຍການຄ້າຢ່າງກວ້າງຂວາງໃນຂອບເຂດທົ່ວປະເທດແລະເພື່ອເປັນການໂຄສະນາເຜີຍແຜ່ອາຫານພື້ນເມືອງແບບລາວໆຈາກຜະລິດຕະພັນປອດສານພິດທີ່ດີຕໍ່ສຸຂະພາບ.
ສຳລັບງານໃນຄັ້ງນີ້ມີຮ້ານມາວາງສະແດງທັງໝົດ 180 ຮ້ານ, ໃນນັ້ນເປັນຮ້ານຂອງຜູ້ໃຫ້ການສະໜັບສະໜູນທັງໝົດ 32 ຮ້ານ, ຮ້ານສຳລັບຫົວໜ່ວຍທຸລະກິດຂອງແມ່ຍິງຈາກພາຍໃນແລະຕ່າງປະເທດທົ່ວໄປມີ 148 ຮ້ານ, ສະເພາະ 180 ຮ້ານນັ້ນປະກອບມີຮ້ານອາຫານ 140 ຮ້ານ, ຮ້ານຫັດຖະກຳ, ກະສິກຳ 20 ຮ້ານ, ຈາກປະເທດອາຊຽນແລະສະຖານທູດຕ່າງໆ 2 ຮ້ານແລະຈາກເຄືອຂ່າຍໜຶ່ງຕຳບົນ-ໜຶ່ງຜະລິດຕະພັນຂອງປະເທດເພື່ອນບ້ານ (ໄທ) 18 ຮ້ານ, ຊຶ່ງປີນີ້ແມ່ນຈະມີຫຼາຍຢ່າງທີ່ພິເສດໂດຍສະເພາະອາຫານເອກະລັກຂອງພາກເໜືອ, ພາກກາງແລະພາກໃຕ້ມາຮ່ວມວາງສະແດງແລະຂາຍ, ນອກນັ້ນຍັງມີບໍລິການກວດສຸຂະພາບຟີ, ຝຶກອົບຮົມວິທີເຮັດເຂົ້າໜົມ, ສາທິດປຸງແຕ່ງອາຫານພື້ນເມືອງລາວແລະການແບ່ງປັນຄວາມຮູ້ກ່ຽວກັບການລິເລີ່ມເຮັດທຸລະກິດຈາກເຈົ້າຂອງຮ້ານອາຫານແຊບອີຫຼີອີກດ້ວຍ.