ໃນວັນທີ 7 ມັງກອນ 2019 ທີ່ສະໂມສອນບ້ານຊົມຊື່ນ ເມືອງບໍລິຄັນ ໄດ້ຈັດພິທີປະກາດເປີດປ້າຍກາໝາຍສິນຄ້າ ກຸ່ມນ້ຳອ້ອຍກ້ອນ ບ້ານຊົມຊື່ນ ເມືອງບໍລິຄັນ ໜຶ່ງເມືອງໜຶ່ງຜະລິດຕະພັນ (ODOP) ແຫ່ງຊາດ ໃຫ້ກຽດເຂົ້າຮ່ວມໂດຍທ່ານ ພັກສົມດີ ວົງສາວັນດີ ຮອງຫົວໜ້າພະແນກອຸດສາຫະກໍາ ແລະການຄ້າແຂວງ, ທ່ານ ສະຫວນ ສະຫວ່າງ ຮອງເຈົ້າເມືອງບໍລິຄັນ, ມີບັນດາຄະນະກຳມະການຄັດເລືອກໂອດັອບຂັ້ນແຂວງ-ເມືອງ ພ້ອມດ້ວຍແຂກຖືກເຊີນ ແລະ ອຳນາດການປົກຄອງບ້ານຕະຫຼອດຮອດພໍ່ແມ່ປະຊາຊົນເຂົ້າຮ່ວມ.
ການຈັດຕັ້ງວຽກງານສົ່ງເສີມການຜະລິດເປັນສິນຄ້າ ເປັນວຽກງານໜຶ່ງ ທີ່ມີຄວາມສໍາຄັນ ໃນການພັດທະນາເສດຖະກິດ-ສັງຄົມ ທີ່ເປັນພື້ນຖານໂຄງລ່າງຂອງແຂວງ ທັງນັ້ນເພື່ອນໍາເອົາວຽກງານສົ່ງເສີມການຜະລິດເປັນສິນຄ້າ ລົງຊຸກຍູ້ຕິດພັນກັບວຽກງານສາມສ້າງ ໂດຍການສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະສ້າງບ້ານເປັນຫົວໜ່ວຍພັດທະນາ ເພື່ອເຮັດໃຫ້ໄດ້ແນວນັ້ນ ຈຶ່ງແນໃສ່ກຸ່ມການຜະລິດຫົວໜ່ວຍທຸລະກິດ, ກຸ່ມຜູ້ປະກອບການທີ່ມີທ່າແຮງຢູ່ທ້ອງຖິ່ນ ຂັ້ນບ້ານ, ເມືອງ ໃຫ້ໄດ້ໃຊ້ຫົວຄິດປະດິດສ້າງ ມູນເຊື້ອສືບທອດແຕ່ປູຍ່າຕາຍາຍເປັນທ່າແຮງ ທັງເປັນການສ້າງວຽກເຮັດງານທໍາໃຫ້ແກ່ພໍ່ແມ່ປະຊາຊົນ, ສ້າງເສດຖະກິດຢູ່ທ້ອງຖິ່ນໃຫ້ເຂັ້ມແຂງ, ເຊິ່ງປັດຈຸບັນທົ່ວແຂວງມີ 13 ຫົວໜ່ວຍຜະລິດຕະພັນ ເປັນສິນຄ້າໂອດັອບທີ່ໄດ້ຮັບການນໍາໃຊ້ກາໝາຍໂອດັອບແຫ່ງຊາດແລ້ວ 7 ຫົວໜ່ວຍ ແລະກຸ່ມນ້ຳອ້ອຍກ້ອນ ກາໜຶ່ງດວງໃຈ ບ້ານຊົມຊື່ນ ເມືອງບໍລິຄັນ ແມ່ນເປັນຫົວໜ່ວຍທີ່ 8.
ທ່ານ ຄຳສະຫວາດ ລາດບັນດິດ ຫົວໜ້າກຸ່ມຜະລິດນ້ຳອ້ອຍກ້ອນ ບ້ານຊົມຊື່ນໃຫ້ຮູ້ວ່າ: ບ້ານ ຊົມຊື່ນ ແມ່ນມີເງື່ອນໄຂຫຼາຍຢ່າງໃນການດຳລົງຊີວິດໃນຮູບແບບຊາວກະສິກອນ ເພາະວ່າພູມສັນຖານສອງຝັ່ງແມ່ນ້ຳງຽບລ້ວນແຕ່ເປັນດິນຮາມພຽງ ແລະອຸດົມສົມບູນ ເໝາະແກ່ການປູກຝັງ ແລະລ້ຽງສັດ ສະນັ້ນປະຊາຊົນສ່ວນຫຼາຍຈຶ່ງຍືດຖືອາຊີບເປັນຊາວກະສິກອນເຊັ່ນ: ປູກກ້ວຍ, ອ້ອຍ, ສາລີ ແລະອື່ນໆ. ນອກນັ້ນການປູກອ້ອຍຂອງພໍ່ແມ່ປະຊາຊົນນອກຈາກຜະລິດເປັນນ້ຳອ້ອຍແລ້ວ ຍັງໄດ້ມີການປັບປຸງເປັນນ້ຳອ້ອຍກ້ອນສົ່ງຂາຍຕາມທ່ອງຕະຫຼາດ, ຈາກນັ້ນຫຼາຍປີຕໍ່ມາເຫັນວ່າໄດ້ຂາຍຫຼາຍຂຶ້ນທຸກປີເຮັດໃຫ້ພໍ່ແມ່ປະຊາຊົນສ່ວນຫຼາຍຫັນມາປູກອ້ອຍເປັນອາຊີບຫຼັກ ແລະເຮັດເປັນນ້ຳອ້ອຍກ້ອນຂາຍມີລາຍໄດ້ດີເຮັດໃຫ້ເສດຖະກິດຄອບຄົວມີຢູ່ມີກິນ ສາມາດຫຼຸດພຸ້ນອອກຈາກຄວາມທຸກຍາກໄດ້ຢ່າງຖາວອນ, ມາຮອດປະຈຸບັນໃນກຸ່ມຜະລິດນ້ຳອ້ອຍກ້ອນມີ 18 ຄອບຄົວ