Friday, July 11, 2025
Kbank Laos โอน รับ จ่าย

​ເຮຍ ເກຍ ​ກຽມມອບໂຄງການ​ລຶບ​ລ້າງ​ຄວາມ​ທຸກ​ຍາກ​ ໃຫ້​​​ພາກລັດ​ຄຸ້ມ​ຄອງ

ທີ​ມງານຈາກພະ​ແນ​ກກະສິກຳ ​ແລະ ປ່າ​ໄມ້ ແຂວງສະຫວັນນະເຂດ ໄດ້ລົງເກັບກຳຂໍ້ມູນກ່ຽວກັບການຈັດ​ຕັ້ງ​ປະຕິບັດກິດຈະກຳຕ່າງໆ ຂອງໂຄງການລຶບ ລ້າງຄວາມທຸກຍາກ (ລຶບລ້າງຄອບຄົວຄົນຂໍທານ) ຢູ່ບ້ານ ຄໍາປ່າແໜ ​ແລະ ບ້ານປ່າກ້ວຍ ເມືອງຈຳພອນ ແຂວງສະຫວັນນະເຂດ ​ເພື່ອ​​ເຮັດ​ບົດສະຫລຸບ​ລາຍ​ງານ ກ່ອນຈະມອບ​ໃຫ້​ພາກ​ລັດ​ຄຸ້ມ​ຄອງ​ດູ​ແລ​ຕໍ່​ໄປ​ໃນ​ມໍ່ໆ​ນີ້. ພາຍຫລັງທີ່ປະຊາຊົນທັງສອງບ້ານ ສາມາດ​ມີ​ເຂົ້າ​ກິນ​ຕະຫລອດ​ປີ, ມີ​ລາຍ​ຮັບ​, ມີ​ຫລາຍໆ​ສິ່ງ​ເປັນ​ຂອງ​ໂຕ​ເອງ ​ແລະ ມີຊີວິດການເປັນຢູ່ດີຂຶ້ນ ຈາກການສະໜັບສະໜູນຈາກ ເຈົ້າຂອງໂຮງງານຜະລິດນ້ຳດື່ມ ແລະ ນ້ຳກ້ອນໂລມາຄຳ, ລວມທັງພາກລັດນຳອີກ.

​ໂຄງການລຶບລ້າງຄວາມທຸກຍາກ ​ແມ່ນມີເປົ້າໝາຍ​ເພື່ອຊ່ວຍເຫລືອບັນດາຄອບຄົວທຸກຍາກ ຈຳນວນທັງໝົດ 77 ຄອບຄົວ ລວມມີ 400 ກວ່າ​ຄົນ ຢູ່ພາຍໃນສອງບ້ານດັ່ງກ່າວ ທີ່ບໍ່ມີລາຍຮັບ, ບໍ່ມີວຽກເຮັດງານທຳ, ບໍ່ມີໄຮ່ນາ-ຮົ້ວສວນທີ່​ສາມາດ​ທຳ​ການ​ຜະລິດ​ໄດ້ ຫລື ແມ່ນແຕ່ເຂົ້າກິນໃນແຕ່ລະວັນ ຈົນເຮັດໃຫ້ເຂົາ ເຈົ້າຢຶດອາຊີບຂໍທານ ເພື່ອຫາລ້ຽງຊີບ, ລ້ຽງຄອບຄົວ ເປັນເວລາຫລາຍສິບປີມາ​ແລ້ວ. ການຈັດຕັ້ງປະຕິບັດໂຄງການດັ່ງກ່າວ ແມ່ນເລີ່ມແຕ່ປີ 2016 ​ເຊິ່ງມີການຈັດສັນທີ່ດິນ, ປຸກເຮືອນເຄິ່ງຖາວອນ, ສະໜອງເຂົ້າກິນ, ຈັດສັນເນື້ອທຳການຜະລິດ, ປູກຝັງ, ລ້ຽງສັດ, ສະໜອງແນວພັນພືດ-ສັດ, ປັບປ່ຽນລະບົບນິເວດ​ໃນ​ຂອບ​ເຂດຂອງ​ບ້ານ, ທັງຝຶກອົບຮົມທາງດ້ານເຕັກນິກ, ພັດ ທະນາແນວຄິດ, ນຳພາ​ປະຊາຊົນ​ລົງມື​ເຮັດ​ຕົງວຈິງ ແລະ ອຶ່ນໆ ເພື່ອເຮັດໃຫ້ປະຊາຊົນເຫລົ່ານີ້ມີຊີວິດທີ່ດີຂຶ້ນ, ສາມາດເຂົ້າເຖິງການສຶກສາ ​ແລະ ສາທາລະນະສຸກ, ຫັນຈາກແນວຄິດຂໍທານມາທຳມາຫາກິນດ້ວຍ​ຕົນ​ເອງ ແລະ ກ້າວໄປສູ່ການມີອາຊີບທີ່ໝັ້ນຄົງ ແລະ ມີສະພາບແວດລ້ອມທີ່ອຸດົມ ສົມບູນ.

ໂຄງການນີ້ເກີດຂຶ້ນ ຍ້ອນມີນັກທຸລະກິດລາວຄົນໜຶ່ງຊື່ທ່ານ ເກຍ ອູສິດທິເດດ ເຊິ່ງເປັນເຈົ້າຂອງໂຮງງານຜະລິດນ້ຳດື່ມ ແລະ ນ້ຳກ້ອນໂລມາຄຳ ຢູ່​ແຂວງ​ສະຫວັນ​ນະ​ເຂດ ຍອມຈ່າຍເງິນສ່ວນຕົວເກືອບ 15 ຕື້ກີບ, ຍອມ​ເສຍສະຫລະ​ເວລາ, ​ເຫື່ອ​ແຮງ ​​ເພື່ອ​ພາ​ປະຊາຊົນລົງມື​ເຮັດ​ຕົວ​ຈິງ​ກັບ​ຄົນ​ຈົນ​ກວ່າ​ເຂົາ​ເຈົ້າ​ຈະ​ເຮັດ​ເປັນ, ມີ​ຄວາມ​ຊຳນານ, ມີ​ແນວ​ຄິດ​ໝັ່ນ​ທ່ຽງ, ຮູ້​ຢາກ​ເຮັດ​ຢາກ​ໄດ້​ ​ແລະ ເຮັດທຸກວິທີທາງ ເພື່ອໃຫ້ປະຊາຊົນທຸກຍາກເຫລົ່ານີ້ມີການດຳລົງຊີວິດທີ່ດີ. 

ໂອກາດນີ້​, ທ່ານ ເກຍ ອູສິດທິເດດ ກ່າວວ່າ: ເຖິງແມ່ນວ່າຈະມອບໂຄງການນີ້ໃຫ້ອຳນາດການປົກຄອງແຂວງ​ແລ້ວ​ກໍ​ຕາມ ຕົນເອງກໍຍັງຈະໄປມາຫາສູ່, ສືບຕໍ່ໃຫ້ການຊ່ວຍເຫລືອ ແລະ ເກັບຊື້ຜົນຜະລິດຕ່າງໆທີ່ປະຊາຊົນຜະລິດ ຫລື ຫາມາໄດ້ຕາມ​ຄວາມ​ຮຽກຮ້ອງ​ຕ້ອງການ​ຂອງ​ປະຊາ ຊົນ. ​ເນື່ອງຈາກ​ວ່າຄວາມ​ສຳພັນ​ລະຫວ່າງຕົນເອງ ​ແລະ ປະຊາຊົນ​ສອງ​ບ້ານ​ດັ່ງກ່າວປຽບ​ສະ​ເໝືອນ​ພໍ່​ກັບ​ລູກ ​ແລະ ​​ບໍ່​ສາມາດ​ຕັດ​ແຍກ​ອອກ​ຈາ​ກກັນ​ໄດ້.

ທີ່​ມາ: ຂ​ປ​ລ

InsideLaos
InsideLaoshttp://insidelaos.com
Online Journalists at insidelaos.com.

More from author

Related posts

Latest posts

ປະຫວັດບຸນເຂົ້າພັນສາ

ວັນບຸນເຂົ້າພັນສາ ໃນປີນີ້ ແມ່ນກົງກັບ ວັນທີ 20 ກໍລະກົດ 2024 ຫຼື ຂຶ້ນ 15 ຄໍ່າ ເດືອນ 8 ລາວ ຊຶ່ງເປັນມື້ທີ່ຊາວພຸດທະສາສະໜາ ຈະໄດ້ພ້ອມກັນນຳພາຄອບຄົວອອກໄປຟັງທຳມະເທສະໜາ ແລະ ໄດ້ມີການກະກຽມສິ່ງຂອງຕ່າງໆ ເພື່ອໄປທຳບຸນໃນມື້ເຂົ້າພັນສາ

ຢ່າມົວເຮັດວຽກຈົນລືມໄປທ່ຽວ ກັບ 5 ສະຖານທີ່ທ່ຽວໃນລະດູຝົນ

ເມື່ອເວົ້າເຖິງລະດູຝົນແລ້ວ ຫຼາຍຄົນອາດຄິດວ່າ ບໍ່ເໝາະສຳລັບການທ່ອງທ່ຽວ ຫຼື ແຄ້ມປິ້ງ ເພາະຝົນເຮັດໃຫ້ການເດີນທາງລຳບາກ, ປຽກ ແລະ ເປື້ອນ ແຕ່ຮູ້ບໍ່ວ່າຊ່ວງຝົນນີ້ລະ ເປັນອີກລະດູການທີ່ໜ້າທ່ຽວທີ່ສຸດໂດຍສະເພາະທ່ຽວທຳມະຊາດ ເພາະເຮົາຈະໄດ້ສຳຜັດກັບອາກາດທີ່ເຢັນສະບາຍ, ໃບໄມ້ທີ່ຂຽວງາມ, ໝອກທີ່ຈາງໆ ໃນຍາມເຊົ້າ, ຝົນຝອຍທີ່ຍ້ອຍລົງມາ ເຮັດໃຫ້ຮູ້ສຶກດີ ຜ່ອນຄາຍໄດ້ຫຼາຍທີ່ສຸດ.

“ວັດໂຕະໂມະ” ເມືອງປະທຸມພອນ ແຂວງຈຳປາສັກ

ວັດໂຕະໂມະ ທີ່ຕັ້ງຢູ່ບ້ານໂຕະໂໝະທ່າ, ເມືອງປະທຸມພອນ, ແຂວງຈຳປາສັກ ແມ່ນກຸ່ມສະຖານບູຮານ ທີ່ຕັ້ງຢູ່ທາງທິດຕາເວັນອອກຂອງແມ່ນໍ້າຂອງ ແລະ ຢູ່ຫ່າງຈາກວັດພູໄປທາງທິດຕາເວັນ ອອກສ່ຽງໃຕ້ 11ກມ ຮ່ອງຮອຍຂອງສະຖານບູຮານແຫ່ງນີ້ໄດ້ກະແຈກກະຈາຍຢູ່ຕາມພັກທັງສອງທີ່ໄດ້ຮັບການກໍ່ສ້າງຂື້ນຢູ່ໃນ ກາງປ່າທີ່ເຕັມໄປດ້ວຍຕົ້ນໄມ້ໃຫຍ່, ເທິງແຄມຝັ່ງຫ້ວຍນ້ຳໂຕະໂມະ ທີ່ເປັນອີກສາຂາໜຶ່ຂອງແມ່ນໍ້າຂອງ. ວັດໂຕະໂມະເປັນວັດ ແຫ່ງດຽວຂອງຊາວຂະແມທີ່ຕັ້ງຢູ່ທາງຝັ່ງຊ້າຍຂອງແມ່ນ້ຳຂອງ.