ຄະນະທີມງານກົມຄຸ້ມຄອງການທ່ອງທ່ຽວຮ່ວມກັບພະແນກຖະແຫຼ່ງຂ່າວວັດທະນະທຳ ແລະ ທ່ອງ ທ່ຽວ ແຂວງໄຊຍະບູລີ, ເປີດກອງປະຊຸມປັບປຸງຍົກລະດັບຄຸນນະພາບການບໍລິການໃຫ້ແກ່ຜູ້ປະກອບການທຸລະກິດໂຮງແຮມ ແລະ ເຮືອນພັກ, ຂຶ້ນໃນຕອນເຊົ້າຂອງວັນທີ 6 ກຸມພາ 2019 ຢູ່ທີ່ຫ້ອງປະຊຸມຂອງພະແນກ ຖວທ ແຂວງ, ໂດຍການເປັນກຽດເຂົ້າຮ່ວມຂອງທ່ານ ບຸນທະວີ ບຸນຊູຮັກ ຮອງຫົວໜ້າພະແນກຖະແຫຼງຂ່າວວັດທະນະທຳ ແລະ ທ່ອງທ່ຽວແຂວງ, ມີທ່ານ ໄຊສົມບັດ ບຸນນະຜົນ ຮອງຫົວໜ້າກົມຄຸ້ມຄອງການທ່ອງທ່ຽວ ກະຊວງຖະແຫຼ່ງຂ່າວວັດທະນະທຳ ແລະ ທ່ອງທ່ຽວ, ພ້ອມດ້ວຍທີມງານກົມຄຸ້ມຄອງການທ່ອງທ່ຽວ, ມີຫົວໜ້າ, ຮອງຫົວໜ້າຂະແໜງທ່ອງທ່ຽວ, ພະນັກງານວິຊາການ ແລະ ຜູ້ປະກອບການທຸລະກິດໂຮງແຮມ, ເຮືອນພັກ ແລະ ແຂກຖືກເຊີນຕະຫຼອດຮອດພະແນກການ, ກົມກອງທີ່ກ່ຽວຂ້ອງເຂົ້າຮ່ວມ.
ໃນກອງປະຊຸມຜູ້ເຂົ້າຮ່ວມໄດ້ຮັບຟັງການບັນຍາຍວິທີການກວດກາກຳນົດມາດຖານສະຖານທີ່ພັກໂຮງແຮມ, ເພື່ອເປັນການກຳນົດລະດັບມາດຖານຂອງສະຖານທີ່ພັກແຮມ, ຮັບປະກັນຄຸນນະພາບ ແລະ ມາດຕະຖານຂອງລະດັບການໃຫ້ບໍລິການດ້ານສະຖານທີ່ພັກແຮມໃຫ້ນັກທ່ອງທ່ຽວ, ການພັດທະນາສະຖານທີ່ພັກແຮມຄື: ໂຮງແຮມ, ຣິສອດ ແລະ ເຮືອນພັກ, ໃຫ້ມີຄຸນນະພາບ ແລະ ມີມາດຕະຖານທີ່ສອດຄ່ອງກັບມາດຕະຖານອາຊຽນກໍຄືມາດຕະຖານສາກົນ, ຈັດລະດັບຂອງສະຖານທີ່ພັກແຮມຕາມມາດຕະຖານຂອງຜະລິດຕະພັນ ແລະ ການບໍລິການແນ່ໃສ່ຊຸກຍູ້, ສົ່ງເສີມດ້ານຄຸນນະພາບໃຫ້ນັບມື້ນັບສູງຂຶ້ນ, ສ້າງເງື່ອນໄຂອຳນວຍຄວາມສະດວກໃຫ້ແກ່ການຈັດຕັ້ງ ແລະ ການເຄື່ອນໄຫວຂອງຫົວໜ່ວຍທຸລະກິດພັກແຮມໃຫ້ມີຄວາມຍຶນຍົງ ແລະ ການເປັນອຸດສາຫະກຳການທ່ອງທ່ຽວທີ່ທັນສະໄໝ, ໂຮງແຮມລະດັບການໃຫ້ບໍລິການແຕ່ 1 ດາວ – 5 ດາວ, ຣີສອດລະດັບການໃຫ້ບໍລິການແຕ່ 1 ດາວ – 5 ດາວ, ເຮືອນພັກລະດັບການບໍລິການໃຫ້ບໍລິການແຕ່ 1 ດອກຈຳປາ – 3 ດອກຈຳປາ,
ຈຸດປະສົງ ເພື່ອເປັນການກະກຽມຄວາມພ້ອມໃຫ້ແກ່ງານມະຫາກຳບຸນຊ້າງທີ່ຈະຈັດຂຶ້ນໃນລະຫວ່າງວັນທີ 23 – 28 ກຸມພາ 2019 ນີ້ ແລະ ເພື່ອຮັບຮອງນັກທ່ອງທ່ຽວທີ່ເຂົ້າມາທ່ຽວຊົມງານມະຫາກຳບຸນຊ້າງ ແລະ ງານບຸນປະເພນີຕ່າງໆທີ່ທາງແຂວງໄຊຍະບູລີໄດ້ຈັດຂຶ້ນ, ພ້ອມນີ້ບັນດາຜູ່ເຂົ້າຮ່ວມພ້ອມກັບທີມງານຈາກກົມຄຸ້ມຄອງການທ່ອງທ່ຽວຍັງໄດ້ພ້ອມກັນລົງປະຕິບັດຕົວຈິງ, ເພື່ອກວດກາມາຕະຖານເງື່ອນໄຂຂອງສະຖານທີ່ພັກແຮມ, ໂຮງແຮມ, ຣີສອດ ແລະ ເຮືອນພັກຕື່ມອີກ.
ທີ່ມາ: Midia Laos