ໜ່ວຍຮາກຖານຊາວໜຸ່ມ ກອງຄຸ້ມຄອງພາຫະນະ ແລະ ການຂັບຂີ່ ນະຄອນຫຼວງວຽງຈັນ ໄດ້ຈັດພິທີປະກາດເປັນໜ່ວຍຊາວໜຸ່ມ 4 ບຸກ ເປັນຄັ້ງທີ IV ຂື້ນຢ່າງເປັນທາງການຢູ່ທີ່ສະໂມສອນຂອງກອງຄຸ້ມຄອງພາຫະ ນະ ແລະ ການຂັບຂີ່ ນະຄອນຫຼວງວຽງຈັນ ພາຍໃຕ້ການເປັນປະທານ ຂອງສະຫາຍ ນາງ ສຸລິນທອນ ສິງທິພານີ ເລຂາຄະນະບໍລິຫານງານຊາວໜຸ່ມ ປປລ ກອງຄຸ້ມຄອງພາຫະນະ ແລະ ການຂັບຂີ່ ນະຄອນຫຼວງວຽງຈັນ ໂດຍໃຫ້ກຽດເຂົ້າຮ່ວມຂອງສະຫາຍ ນວນໄຊ ພະໄຊສົມບັດ ເລຂາໜ່ວຍພັກ ຫົວໜ້າກອງຄຸ້ມຄອງພາຫະນະ ແລະ ການຂັບຂີ່ນະຄອນຫຼວງວຽງຈັນ ສະຫາຍ ອະນຸສອນ ວົງຄໍາສອນ ຮອງເລຂາຄະນະບໍລິຫານງານຊາວໜຸ່ມ ປປລ ນະຄອນຫຼວງວຽງຈັນ ມີສະມາ ຊິກຊາວໜຸ່ມ ແລະ ແຂກຖືກເຊີນເຂົ້າຮ່ວມຢ່າງພ້ອມພຽງ.
ໃນພິທີດັ່ງກ່າວສະຫາຍ ນາງ ສຸລິນທອນ ສິງທິພານີ ເລຂາຄະນະບໍລິຫານງານຊາວໜຸ່ມ ໄດ້ຮັບກຽດຜ່ານບົດສະຫຼຸບເພື່ອສັງເກດຕີລາຄາຄືນການຈັດຕັ້ງປະຕິບັດຕາມແຜນການສ້າງໜ່ວຍຊາວໜຸ່ມ 4 ບຸກ ໃນໄລຍະ 1 ປີຜ່ານມາ ຜ່ານການປະເມີນຜົນຕົວຈິງສົມທຽບກັບມາດຖານໃນແຕ່ລະດ້ານສາມາດປະຕິບັດໄດ້ຄື: ດ້ານແນວຄິດ ບຸກໄດ້ 95%, ດ້ານການຝຶກຝົນຫຼໍ່ຫຼອມຕົນເອງໄດ້ 95%,ດ້ານການຈັກຕັ້ງໄດ້ 95%, ດ້ານການສ້າງວິຊາໍຊີບ ແລະ ສ້າງວຽກງານທໍາໄດ້ 95% ຕໍ່ຜົນຂອງການປະເມີນໃນແຕ່ລະດ້ານນັ້ນ ເຫັນວ່າໜ່ວຍປະຕິບັດໄດ້ລື່ນຄາດໝາຍທີ່ແຜນການໄດ້ວາງໄວ້ ຈິ່ງໄດ້ປະກາດມອບນາມຍົດເປັນໜ່ວຍຊາວໜຸ່ມຕົວແບບ ຕາມເນື້ອໃນຂໍ້ແຂ່ງຂັນ 4 ບຸກ ຕາມຂໍ້ຕົກລົງ ສະບັບເລກທີ 015/ຄຊປປລ. ລົງວັນທີ 8/1/2019.
ນອກນັ້ນ ຄະນະໜ່ວຍຍັງໄດ້ເອົາໃຈໃສ່ ໃນການປັບປຸງກົງຈັກການຈັດຕັ້ງ ເຊິ່ງປະຈຸບັນມີສະມາຊິກຊາວໜຸ່ມ ປປລ ຜູ້ທີ່ມີຜົນງານດີເດັ່ນໃນການຈັດຕັ້ງປະຕິບັດຂໍ້ແຂ່ງຂັນ 4 ບຸກ ປະຈຳປີ 2018 ມີຈໍານວນ 31 ສະຫາຍ ຍິງ 19 ສະຫາຍ ພ້ອມນັ້ນ ວຽກງານຄະບວນການຄະນະໜ່ວຍຍັງໄດ້ເອົາໃຈໃສ່ຊີ້ນຳ-ນຳພາ ສະມາຊິກເຂົ້າຮ່ວມທຸກຂະບວນການເຄື່ອນໄຫວຕ່າງໆຂອງຊາວໜຸ່ມຢ່າງຟົດຟື້ນໂດຍຕິດພັນກັບຂະບວນການແຂ່ງຂັນຮັກຊາດ ແລະ ພັດທະນາ ຢ່າງເປັນຂະບວນ.
Hits: 10
