ລັດຖະບານຍີ່ປຸ່ນສະໜອງທຶນຊ່ວຍເຫຼືອລ້າໃຫ້ ສປປ ລາວ ມູນຄ່າ 320.997 ໂດລາ ເທົ່າກັບ 25,5 ຕື້ກວ່າກີບ ເຂົ້າໃນໂຄງການຈັດຕັ້ງການບໍລິການດ້ານສຸຂະພາບປາກ, ແຂ້ວ ໃນ 4 ແຂວງເຊັ່ນ: ແຂວງວຽງຈັນ, ບໍລິຄຳໄຊ, ຄຳມ່ວນ ແລະແຂວງສະຫວັນນະເຂດ.
ພິທີເຊັນສັນຍາໂຄງການຊ່ວຍເຫຼືອດັ່ງກ່າວແມ່ນໄດ້ຈັດຂຶ້ນໃນວັນທີ 13 ກຸມພາ 2019 ທີ່ນະຄອນຫຼວງວຽງຈັນ ຊຶ່ງຕາງໜ້າໂດຍ ທ່ານ ທາເຄຊິ ຮິຄິຮາຣະ ເອກອັກຄະຣາຊະທູດຍີ່ປຸ່ນປະຈຳລາວ ແລະທ່ານ ທາຄາຊິ ມິຢາຕະ ຫົວໜ້າອົງການຊ່ວຍເຫຼືອສາກົນທາງດ້ານການສຶກສາທັນຕະກຳແຫ່ງປະເທດຍີ່ປຸ່ນ,ທ່ານ ດຣ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ ພ້ອມດາແຂກພາກສ່ວນກ່ຽວຂ້ອງທັງສອງຝ່າຍເຂົ້າຮ່ວມ.
ປະເທດລາວ ເປັນປະເທດດຽວໃນອາຊີຕາເວັນອອກສຽງໃຕ້ທີ່ບໍ່ມີລະບົບສຳລັບພະຍາບານທັນຕະກຳສະນັ້ນຈຶ່ງມີການຊ່ວຍສົ່ງເສີມກິດຈະກຳການບໍລິການດ້ານສຸຂະພາບຜົ້ງປາກ ແລະແຂ້ວ ສຳລັບໂຄງການຊ່ວຍເຫຼືອສາກົນທາງດ້ານການສຶກສາທັນຕະກຳແຫ່ງປະເທດຍີ່ປຸ່ນທີ່ໄດ້ມອບທຶນຊ່ວຍເຫຼືອລ້າຄັ້ງນີ້ຈຳນວນ 320.997 ໂດລາ ເທົ່າກັບ 25,5 ຕື້ກວ່າກີບ ເພື່ອສ້າງຕັ້ງສູນຝຶກອົບຮົມສົ່ງເສີມສຸຂະພາບປາກ ແລະແຂ້ວໃນນະຄອນຫຼວງວຽງຈັນແລ້ວໃຫ້ໄປຝຶກອົບຮົມຖ່າຍທອດໃຫ້ຄວາມຮູ້ພະຍາບານທົ່ວໄປໃນ 4 ແຂວງເປົ້າໝາຍເຊັ່ນ: ແຂວງວຽງຈັນ, ບໍລິຄຳໄຊ, ຄຳມ່ວນ ແລະ ແຂວງສະຫວັນນະເຂດ ເພື່ອເປັນການຈັດຕັ້ງການບໍລິການເພື່ອສົ່ງເສີມຊ່ວຍຫຼຸດຈຳນວນການຕິດເຊື້ອພະຍາດປາກ ແລະ ແຂ້ວໃນຂອບເຂດປະເທດ ພ້ອມນັ້ນອົງການດັ່ງກ່າວຍັງໄດ້ມອບລົດເມຂົນສົ່ງໃນການຈັດຝຶກອົບຮົມຕົວຈິງກ່ຽວກັບການພະຍາບານທົ່ວໄປໃນບັນດາ 4 ແຂວງອີກດ້ວຍ.
Hits: 2
