ໃນວັນທີ 22 ກຸມພາ 2019 ທີ່ຫ້ອງຮັບແຂກທະນາຄານແຫ່ງ ສປປ ລາວ, ໄດ້ມີການຈັດຕັ້ງພິທີມອບ-ຮັບໃບຍ້ອງຍໍຂັ້ນທະນາຄານແຫ່ງ ສປປ ລາວ ໃຫ້ແກ່ຜູ້ອໍານວຍການທະນາຄານ ເມແບັງ ໂດຍການໃຫ້ກຽດມອບຂອງທ່ານ ສອນໄຊ ສິດພະໄຊ ຜູ້ວ່າການທະນາຄານແຫ່ງ ສປປ ລາວ ແລະ ຮັບໂດຍທ່ານ ລິມ ໄວ ຮຸງ (Lim Wai Hoong) ຜູ້ອໍານວຍການທະນາຄານ ເມແບັງສາຂາລາວ ໂດຍຊ່ອງໜ້າຂອງພະນັກງານທັງ 2 ຝ່າຍ.
ການມອບ-ຮັບໃບຍ້ອງຍໍໃນຄັ້ງນີ້ ແມ່ນເປັນການຍ້ອງຍໍທະນາຄານເມແບັງໂດຍສະເພາະທ່ານ ລິມ ໄວ ຮຸງ ທີ່ໄດ້ມີການປະກອບສ່ວນເຂົ້າໃນການພັດທະນາເສດຖະກິດ – ສັງຄົມຂອງ ສປປ ລາວ ຊຶ່ງນັບແຕ່ທ່ານໄດ້ຮັບຕໍ່າແໜ່ງເປັນຜູ້ອໍານວຍການທະນາຄານ ເມແບັງສາຂາລາວໃນປີ 2008 ໂດຍທ່ານໄດ້ລະດົມແຫຼ່ງທຶນຈໍານວນໜຶ່ງ ເພື່ອສົ່ງເສີມການດໍາເນີນທຸລະກິດທະນາຄານ ແລະ ນອກນີ້ໃນປີ 2013 ທ່ານໄດ້ເປັນເຈົ້າການຊຸກຍູ້ໃນການປະກອບສ່ວນເຂົ້າໃນການຊ່ວຍເຫຼືອສັງຄົມທາງດ້ານການສຶກສາ-ສາທາລະນະສຸກ ຊຶ່ງມີມູນຄ່າຫຼາຍກ່ວາ 200 ລ້ານກີບ ແລະຍັງໄດ້ປະກອບສ່ວນເຂົ້າຊ່ວຍເຫຼືອບໍລິຈາກເງິນຈໍານວນ 2 ແສນລິງກິດ (ສະກຸນເງິນຕາມາເລເຊຍ) ຫຼື ທຽບເທົ່າ 400 ລ້ານກ່ວາກີບ ໂດຍຜ່ານອົງການ MERCY ປະເທດມາເລເຊຍ ເພື່ອຊ່ວຍເຫຼືອໃຫ້ແກ່ຜູ້ປະສົບໄພນໍ້າຖ້ວມທີ່ເມືອງ ສະໜາມໄຊ, ແຂວງອັດຕະປື ແລະຊ່ວຍສ້າງຫໍພັກຍິງໃຫ້ແກ່ໂຄງການຕໍ່າຫູກ ຢູ່ແຂວງຊຽງຂວາງ ທີ່ໄດ້ສໍາເລັດໃນປີ 2018.
ທະນາຄານ ເມແບັງເປັນກຸ່ມທີ່ໃຫ້ບໍລິການທາງການເງິນຊັ້ນນຳຂອງອາຊີ ແລະ ເມແບັງເປັນທະນາຄານທີ່ໃຫ້ບໍລິການໃນພາກພື້ນມາຕັ້ງແຕ່ປີ 1960 ຊຶ່ງໃນປີດຽວກັນກໍ່ໄດ້ເປີດສາຂາຢູ່ປະເທດສິງກະໂປ, ບຣຼູໄນຊຶ່ງຫຼັກໆແລ້ວແມ່ນຢູ່ໃນບັນດາປະເທດອາຊຽນແລະຍັງເປັນກຸ່ມທະນາຄານທີ່ໃຫ້ບໍລິການໃນທັງໝົດ 10 ປະເທດສະມາຊິກອາຊຽນ;ເມແບັງເປັນທະນາຄານຂອງປະເທດມາເລເຊຍຊຶ່ງປັດຈຸບັນໄດ້ຈັດຢູ່ໃນອັນດັບ 1 ຂອງປະເທດມາເລເຊຍແລະຢູ່ຈັດຢູ່ໃນ 5 ອັນດັບຕົ້ນຂອງອາຊີຕາເວັນອອກ, ມີສາຂາຫຼາຍກວ່າ 2.400 ສາຂາໃນ 20 ປະເທດ ແລະມີພະນັກງານຫຼາຍກວ່າ 45 ພັນຄົນ.
ທະນາຄານເມແບັງສາຂາລາວໄດ້ເປີດໃຫ້ບໍລິການຢ່າງເປັນທາງການໃນວັນທີ 5 ເດືອນພະຈິກປີ 2012, ມີສຳນັກງານຕັ້ງຢູ່ບ້ານຫັດສະດີເມືອງຈັນທະບູລີນະຄອນຫຼວງແລະ ສືບຕໍ່ຂະຫຍາຍທຸລະກິດໂດຍການເປີດສາຂາທີ 2 ທະນາຄານເມແບັງສາຂາໜອງດ້ວງໃນວັນທີ7 ມີນາປີ2016 ມີສຳນັກງານຕັ້ງຢູ່ບ້ານໜອງດ້ວງເໜືອເມືອງສີໂຄດຕະບອງນະຄອນຫຼວງວຽງຈັນເຊິ່ງການບໍລິການທຸລະກຳທາງການເງິນມີການຝາກ-ຖອນ; ການສະໜອງສິນເຊື່ອໄລຍະຍາວ; ການສະໜອງສິນເຊື່ອທາງການຄ້າ; ການແລກປ່ຽນເງິນຕາ; ການໂອນເງິນ ແລະ ການບໍລິການ ຕູ້ ATM.