ໂຄງການກໍ່ສ້າງເຂື່ອນໄຟຟ້າເຊລະນອງໜຶ່ງຕັ້ງຢູ່ຂອບເຂດເມືອງພີນ ແຂວງສະຫວັນນະເຂດ ທີ່ຫ່າງຈາກຊາຍແດນເຂດເມືອງນອງ ໄປທາງທິດຕາເວັນຕົກປະມານ 10 ກິໂລແມັດທີ່ກໍາລັງລົງມືກໍ່ສ້າງໃຫ້ສໍາເລັດຕາມແຜນການທີ່ວາງໄວ້ແຕ່ໂຄງການກໍ່ສ້າງເຂື່ອນດັ່ງກ່າວແມ່ນມີປະຊາຊົນ 2 ບ້ານທີ່ຂຶ້ນກັບເມືອງ ນອງ ແຂວງສະຫວັນນະເຂດທີ່ໄດ້ຮັບຜົນກະທົບຊຶ່ງປະຈຸບັນເຈົ້າຂອງໂຄງການກໍາລັງຂຸ້ນຂ້ຽວຍົກຍ້າຍປະຊາຊົນໄປຢູ່ບ້ານຈັດສັນໃໝ່ຄາດວ່າໃຫ້ສໍາເລັດສົມບູນໃນ ເດືອນພຶດສະພາ 2019 ນີ້.
ທ່ານ ແພງມາ ຈັນທິລະນອງ ຫົວໜ້າຫ້ອງການຊັບພະຍາກອນທໍາມະຊາດ ແລະສິ່ງແວດລ້ອມເມືອງນອງ ໄດ້ກ່າວວ່າ: ປະຊາຊົນທີ່ຖືກຜົນກະທົບຈາກໂຄງ ການກໍ່ສ້າງເຂື່ອນໄຟຟ້າເຊລະນອງໜຶ່ງແມ່ນມີ 2 ບ້ານຄື: ບ້ານລະເບົານໍ້າ ແລະບ້ານລ໋ອຍນ້ຳ ຫຼື ປາຈະຕຽນໃນນັ້ນມີທັງໝົດມີຈໍານວນ 88 ຄອບຄົວ, ພົນ ລະເມືອງ 487 ຄົນ, ຍິງ 249 ຄົນ, ມີເນື້ອທີ່ນາ 32,6 ເຮັກຕາ, ເນື້ອທີ່ສວນຢາງໂບງ, ກ້ວຍ 21 ເຮັກຕາ ແລະໜອງປາ, ສວນຕົ້ນໄມ້ໃຫ້ໝາກຈໍານວນໜຶ່ງມາຮອດປະຈຸບັນນີ້ທາງຄະນະກໍາມະການຍົກຍ້າຍຈັດສັນຂັ້ນເມືອງ, ຂັ້ນແຂວງ ແລະເຈົ້າຂອງໂຄງ ການພວມກໍາລັງເລັ່ງລົງມືກໍ່ສ້າງພື້ນຖານໂຄງລ່າງເປັນຕົ້ນກໍ່ສ້າງເສັ້ນທາງປູດິນແດງແຕ່ບ້ານປະຈະຕຽນເຂົ້າໄປຫາບ້ານຈັດສັນໃໝ່ມີຄວາມຍາວ 9 ກິໂລແມັດປະຈຸບັນວຽກງານທີ່ສໍາເລັດແລ້ວແມ່ນບຸກເບີກເນື້ອທີ່ບ່ອນຕັ້ງບ້ານຈັດສັນໃໝ່ 2 ບ້ານ, ດຶງຕາຂ່າຍໄຟຟ້າເຂົ້າຫາບ້ານ, ກໍ່ສ້າງນໍ້າປະປາຊຸມຊົນ, ໄດ້ແບ່ງດິນປຸກສ້າງໃຫ້ແຕ່ລະຄອບຄົວ ໃນ 2 ບ້ານຈໍານວນ 88 ຕອນ ຊຶ່ງໃນນັ້ນແຕ່ລະຄອບຄົວຈະໄດ້ຮັບເນື້ອທີ່ປູກສ້າງຢູ່ 800 ຕາແມັດ ສ່ວນການກໍ່ສ້າງ ເຮືອນນັ້ນແມ່ນກໍາລັງລົງມືກໍ່ສ້າງຢ່າງຂຸ້ນຂ້ຽວຈໍານວນ 88 ຫຼັງຄື: ບ້ານລະ ເບົານໍ້າ 56 ຫຼັງ, ບ້ານລ໋ອຍນໍ້າ ຫຼື ປາຈະ ຕຽນ 32 ຫຼັງ ມີ 4 ຂະໜາດ ໂດຍອີງໃສ່ ຈໍານວນພົນລະເມືອງຂອງແຕ່ລະຄອບຄົວຂະໜາດນ້ອຍ 40 ຕາແມັດ, ຂະໜາດໃຫຍ່ 120 ຕາແມັດ ເປັນເຮືອນໄມ້ເສົາຖອກດ້ວຍເບຕົງ, ມຸງດ້ວຍສັງກະສີແຂງມີຫ້ອງຄົວ, ຫ້ອງນໍ້າ ແລະຮົ້ວອ້ອມເຮືອນເນັ່ງດ້ວຍໜາມໝາກຈັບ.
ສຳລັບການກໍ່ສ້າງເຮືອນແມ່ນຈະໃຫ້ສໍາເລັດໃນທ້າຍເດືອນມີນາ 2019 ນີ້ນອກນັ້ນຍັງໄດ້ເລັ່ງລົງມືກໍ່ສ້າງພື້ນຖານໂຄງລ່າງທີ່ຈໍາເປັນໃຫ້ພໍ່ແມ່ປະຊາຊົນບ້າ ນຈັດສັນໃໝ່ເຊັ່ນ: ບຸກເບີກເນື້ອທີ່ສວນໃຫ້ຄອບຄົວລະ 3 ເຮັກຕາ, ກໍ່ສ້າງຝາຍ 2 ແຫ່ງ, ກໍ່ສ້າງໂຮງຮຽນອະນຸບານ, ໂຮງຮຽນປະຖົມ, ມັດທະຍົມໜຶ່ງແຫ່ງ, ກໍ່ສ້າງສຸກສະລາ, ຫ້ອງການບ້ານ ແລະ ຕະຫຼາດໜຶ່ງແຫ່ງຊຶ່ງຄາດວ່າການຍົກຍ້າຍຈັດສັນປະຊາຊົນ 2 ບ້ານທີ່ໄດ້ຮັບຜົນກະທົບອອກຈາກໂຄງການກໍ່ສ້າງເຂື່ອນໄຟຟ້າເຊລະນອງໜຶ່ງຈະໃຫ້ສໍາເລັດສົມບູນໃນທ້າຍເດືອນພຶດສະພາ 2019 ນີ້.
ທີ່ມາ: ນສພ ເສດຖະກິດ-ສັງຄົມ