ພະແນກໄປສະນີ ໂທລະຄົມມະນາຄົມ ແລະ ການສື່ສານ ນະຄອນຫຼວງວຽງຈັນ (ປທສ ນວ) ຈັດກອງປະຊຸມສະຫຼຸບການເຄື່ອນໄຫວວຽກງານປີ 2018 ແລະ ທິດທາງແຜນການປີ 2019 ຢູ່ຫ້ອງວ່າການປົກຄອງ ນວ ເປັນປະທານຂອງທ່ານ ສີຄອນ ອ່ອນສີພັນລາ ຫົວໜ້າພະແນກ ປທສ ນວ ມີທ່ານ ແກ້ວພິລາວັນ ອາໄພລາດ ຮອງເຈົ້າຄອງ ນວ ພ້ອມດ້ວຍບັນດາກົມ ເມືອງ ພະແນກການ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ສີຄອນ ອ່ອນສີພັນລາ ກ່າວວ່າ: 1 ປີຜ່ານມາ ພະແນກ ປທສ ນວ ໄດ້ສຸມໃສ່ເຮັດພາລະບົດບາດໜ້າທີ່ຕາມການມອບໝາຍຢ່າງຕັ້ງໜ້າ ໂດຍສະເພາະ ການເສີມຂະຫຍາຍບົດບາດສຳຄັນຂອງວຽກງານຄຸ້ມຄອງດ້ານໄປສະນີ ໂທລະຄົມມະນາຄົມ ແລະ ເຕັກໂນໂລຊີສື່ສານ ຂໍ້ມູນຂ່າວສານ ຊຸກຍູ້ສົ່ງເສີມຜູ້ໃຫ້ບໍລິການໂທລະຄົມ ປັບປຸງ ແລະ ຂະຫຍາຍເຄືອຂ່າຍໂທລະສັບກວມທຸກບ້ານ ມີຜູ້ນຳໃຊ້ໂທລະສັບມືຖື 1.269.810 ເລກໝາຍ ເຄືອຂ່າຍບໍລິການອິນເຕີເນັດຄວາມໄວສູງກວມທຸກເມືອງ ເຮັດໃຫ້ຜູ້ຊົມໃຊ້ອິນເຕີເນັດເພີ່ມຂຶ້ນຢ່າງຫຼວງຫຼາຍ ມີຜູ້ລົງທະບຽນນຳໃຊ້ 515.160 ຊິມ ເທົ່າກັບ 60% ຂອງພົນລະເມືອງ ນວ ຫົວໜ່ວຍທຸລະກິດບໍລິການດ້ານໄອຊີທີ ໄດ້ຂະຫຍາຍຕົວເພີ່ມຂຶ້ນ ສ່ວນຫຼາຍເຄື່ອນໄຫວສອດຄ່ອງກັບລະບຽບກົດໝາຍ ປີ 2018 ນວ 655 ຫົວໜ່ວຍ ເກັບລາຍຮັບວິຊາການ 355,84 ລ້ານກີບ ລື່ນຄາດໝາຍ 29% ໄດ້ຮັບດຸນດ່ຽງຈາກ ນວ 810 ລ້ານກີບ ປະຕິບັດໄດ້ 100%.
ສຳເລັດການສ້າງໂຄງການລົງທຶນຂອງລັດສະເໜີເຂົ້າໃນແຜນງົບປະມານປີ 2019 ຈຳນວນ 4 ໂຄງການ ມູນຄ່າ 332,33 ລ້ານກີບ ຊຸກຍູ້ຕິດຕາມກວດກາຜູ້ບໍລິການດ້ານໄປສະນີໃຫ້ຫັນສູ່ລະບຽບກົດໝາຍ ຕໍ່ອະນຸຍາດດຳເນີນທຸລະກິດ 4 ຫົວໜ່ວຍ ເກັບກຳຫົວໜ່ວຍທີ່ເຮັດບໍລິການຄ້າຍຄືໄປສະນີທາງອອນລາຍບໍ່ມີອະນຸຍາດ 18 ຫົວໜ່ວຍ ຕິດຕາມກວດກາການນຳໃຊ້ສັນຍານໂທລະຄົມ ແລະ ອິນເຕີເນັດຈາກຕ່າງປະເທດ 2 ຄັ້ງ 5 ເມືອງ 34 ຈຸດ ພົບຜູ້ຊົມໃຊ້ສັນຍານຈາກຕ່າງປະເທດ 24 ຫົວໜ່ວຍ ແກ້ໄຂຊຸມສາຍໂທລະຄົມສຳເລັດ 7 ເສັ້ນທາງ ແກ້ໄຂຄຳຮ້ອງທຸກກ່ຽວກັບຊຸມສາຍບໍ່ເປັນລະບຽບ 15 ຄັ້ງ ຕິດຕາມການນຳໃຊ້ໂຟນີ 86 ພາກສ່ວນ ໃນນີ້ ມີອະນຸຍາດ 14 ພາກສ່ວນ ເກັບກຳສະຖິຕິປຸກສ້າງ ແລະ ຕິດຕັ້ງເສົາໂທລະສັບມືຖື 848 ເສົາ ອະນຸຍາດນຳເຂົ້າເຄື່ອງບິນບໍ່ມີຄົນຂັບ 15 ພາກສ່ວນອະນຸຍາດໃຫ້ບໍລິການ ISP 2,3 ຈຳນວນ 3 ຫົວໜ່ວຍ ສຳເລັດໂຄງການຄົ້ນຄວ້າຄວາມເປັນໄປໄດ້ ໃນການສ້າງນະຄອນວຽງຈັນອັດສະລິຍະ ຄຸ້ມຄອງ ຕິດຕາມກວດກາການບໍລິການໂທລະຄົມມະນາຄົມ ແລະ ໄອທີ 448 ຫົວໜ່ວຍ ອອກອະນຸຍາດໃໝ່ 234 ຫົວໜ່ວຍ ຂໍສືບຕໍ່ 209 ຫົວໜ່ວຍ ສ້າງໂປແກຣມເກັບກຳສະຖິຕິຫົວໜ່ວຍທຸລະກິດດ້ານໄປສະນີ ໂທລະຄົມມະນາຄົມ ແລະ ເຕັກໂນໂລຊີສື່ສານຂໍ້ມູນຂ່າວສານ ໂປແກຣມເອກະສານຂາອອກ-ຂາເຂົ້າ ປັດຈຸບັນກຳລັງທົດລອງໃຊ້ສ້າງລະບົບປະຊຸມທາງໄກ ສາມາດເຊື່ອມຕໍ່ກັບກະຊວງ ປທສ ແລະ ແຂວງທົ່ວປະເທດ.
ສຳລັບທິດທາງຕໍ່ໜ້າ ຈະສືບຕໍ່ຊຸກຍູ້ສົ່ງເສີມຫົວໜ່ວຍບໍລິການດ້ານໂທລະຄົມມະນາຄົມ ຂະຫຍາຍເຄືອຂ່າຍອິນເຕີເນັດໃຫ້ກວມທຸກບ້ານໃນ ນວ ເພື່ອໃຫ້ພົນລະເມືອງໄດ້ຊົມໃຊ້ຫຼາຍກວ່າ 60% ຄຸ້ມຄອງຫົວ ໜ່ວຍທຸລະກິດດ້ານໄປສະນີ ໂທລະຄົມມະນາຄົມ ແລະ ເຕັກໂນໂລຊີສື່ສານຂໍ້ມູນຂ່າວສານ ໃຫ້ດຳເນີນຖືກຕ້ອງໃຫ້ໄດ້ 80% ຂຶ້ນໄປ ຊຸກຍູ້ສົ່ງເສີມຂະແໜງການນຳໃຊ້ອຸປະກອນໄອຊີທີ ແລະ ປັບປຸງລະບົບບໍລິຫານລັດໃຫ້ທັນສະໄໝ ຊຸກຍູ້ທຸກພາກສ່ວນນຳໃຊ້ສູນຂໍ້ມູນແຫ່ງຊາດ ແລະ ລະຫັດອິນເຕີເນັດຂອງລາວ (La) ແລະ ການບໍລິການຂອງດາວທຽມລາວ ໃຫ້ເພີ່ມຂຶ້ນຢ່າງກວ້າງຂວາງ.
ທີ່ມາ: ວຽງຈັນໃໝ່