ເຊົ້າວັນທີ 14 ມີນານີ້ ທີ່ນະຄອນຫຼວງວຽງຈັນ, ກົມເສດຖະກິດ ກະຊວງການຕ່າງປະເທດ ໃນນາມກອງເລຂາແຫ່ງຊາດແມ່ນໍ້າຂອງ-ແມ່ນນໍ້າລ້ານຊ້າງ ຮ່ວມກັບສະຖານເອກອັກຄະລັດຖະທູດ ສປ ຈີນ ປະຈໍາລາວ ຈັດງານສັບປະດາ ແມ່ນໍ້າຂອງ-ແມ່ນໍ້າລ້ານຊ້າງ ໂດຍໃຫ້ກຽດເປັນປະທານຂອງທ່ານ ທອງຜ່ານ ສະຫວັນເພັດ ຮອງລັດຖະມົນຕີກະຊວງການຕ່າງປະເທດ, ທ່ານ ຈຽງ ຈາຍຕົງ ເອກອັກຄະລັດຖະທູດ ແຫ່ງ ສປ ຈີນ ປະຈໍາ ສປປ ລາວ, ມີບັນດາຕາງໜ້າຈາກປະເທດສະມາຊິກ ແມ່ນນໍ້າຂອງ-ແມ່ນໍ້າລ້ານຊ້າງ (ກຳປູເຈຍ, ຈີນ, ລາວ, ມຽນມາ, ໄທ ແລະຫວຽດນາມ ແລະກະຊວງຂະແໜງການທີ່ກ່ຽວຂ້ອງເຂົ້າຮ່ວມ.
ທ່ານ ທອງຜ່ານ ສະຫວັນເພັດ ໃຫ້ຮູ້ວ່າ: ການຈັດງານຄັ້ງນີ້ ເພື່ອເປັນການສືບຕໍ່ຈັດຕັ້ງປະຕິບັດຜົນງານຂອງກອງປະຊຸມຜູ້ນໍາແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 2, ເປັນການສະເຫຼີມສະຫຼອງວັນສ້າງຕັ້ງຂອບການຮ່ວມມື ແມ່ນໍ້າຂອງ-ແມ່ນໍ້າລ້ານຊ້າງ ຄົບຮອບ 3 ປີ ແລະທັງເປັນການເຜີຍແຜ່ຄວາມຮູ້ກ່ຽວກັບຂອບການຮ່ວມມືແມ່ນນໍ້າຂອງ-ແມ່ນໍ້າລ້ານຊ້າງ ໃຫ້ບັນດາກະຊວງຂະແໜງການ, ສະຖາບັນຄົ້ນຄວ້າ, ນັກສຶກສາ, ສື່ມວນຊົນ ແລະແຂກທີ່ເຂົ້າຮ່ວມ. ນອກນັ້ນ, ຍັງເປັນການເພີ່ມທະວີ ຮັດແໜ້າການພົວພັນຮ່ວມມື, ແລກປ່ຽນວັດທະນາທໍາ ແລະຊຸກຍູ້ການທ່ອງທ່ຽວລະຫວ່າງປະເທດສະມາຊິກແມ່ນໍ້າຂອງ-ແມ່ນໍ້າລ້ານຊ້າງ.
ໃນງານສັບປະດາ ແມ່ນໍ້າຂອງ-ແມ່ນໍ້າລ້ານຊ້າງ ຄັ້ງນີ້ ມີຫຼາຍກິດຈະກໍາຄື: ພິທິປະຖະກະຖາກ່ຽວກັບໂອກາດ ແລະສິ່ງທ້າທາຍຂອງຂອບການຮ່ວມື ແມ່ນໍ້າຂອງ-ແມ່ນໍ້າລ້ານຊ້າງ, ການປະກວດຮູບພາຍຖ່າຍກ່ຽວກັບວັດທະນາທໍາ ແລະເອກະລັກຂອງປະເທດສະມາຊິກ ແມ່ນໍ້າຂອງ-ແມ່ນໍ້າລ້ານຊ້າງ, ສາຍຮູບເງົາສາລະຄະດີເລື່ອງສັ້ນກ່ຽວກັບວັດທະນາທໍາ ແລະການທ່ອງທ່ຽວຂອງປະເທດສະມາຊິກ.