ງານວາງສະແດງເຟີນິເຈີວຽງຈັນຄັ້ງທີ 4 ໄດ້ເປີດຂຶ້ນຢ່າງເປັນທາງການ ໃນຕອນແລງວັນທີ25ມີນາ 2019 ທີ່ສູນການຄ້າລາວ-ໄອເຕັກ ໂດຍເຂົ້າຮ່ວມຂອງທ່ານພັນທອງພິດທຸມມາ ຮອງລັດຖະມົນຕີ ກະຊວງອຸດສາຫະກຳແລະການຄ້າ,ທ່ານກອງມາລາພົມມາໄລຮອງປະທານສະມາຄົມເຟີນິເຈີລາວ, ມີຜູ້ປະກອບທຸລະກິດເຟີນິເຈີແລະພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານກອງມາລາພົມມາໄລກ່າວວ່າ: ງານວາງສະແດງສິນຄ້າເຟີນິເຈີວຽງຈັນຄັ້ງທີ4ຖືວ່າມີຄວາມຫມາຍຄວາມສຳຄັນເປັນຢ່າງຍິ່ງຕໍ່ການຈະເລີນເຕີບໂຕຂອງຂະແຫນງທຸລະກິດເຟີນິເຈີ, ເປັນການເຕົ້າໂຮມເອົາຜົນງານຫລືຜະລິດຕະພັນເຟີນິເຈີທີ່ເປັນຫົວຄິດປະດິດສ້າງຂອງຄົນລາວເຂົ້າມາໂຮມກັນເພື່ອເປັນການໂຄສະນາແລະວາງຈຳຫນ່າຍຕໍ່ຊາວລາວແລະຊາວຕ່າງປະເທດໃຫ້ໄດ້ຮັບຮູ້ເຖິງຄວາມພ້ອມຂອງຜະລິດຕະພັນເຟີນິເຈີໄມ້ລາວທັງເປັນການຮອງຮັບກັບການແຂ່ງຂັນກັບພາກພື້ນແລະສາກົນ.
ນອກນັ້ນຍັງເປັນການສົ່ງເສີມໃຫ້ຜູ້ປະກອບການໄດ້ມີໂອກາດແລກປ່ຽນບົດຮຽນປະລົງສົບການດ້ວຍກັນແລະນຳເອົາບົດຮຽນດັ່ງກ່າວໄປປັບໃຊ້ເຂົ້າໃນຂະບວນການຜະລິດ, ການບໍລິການຂອງເຂົາເຈົ້າໃຫ້ເກີດດອກອອກຜົນ, ຊຸກຍູ້ໃຫ້ປະຊາຊົນລາວບັນດາເຜົ່າມີການຜະລິດສິນຄ້າໃຫ້ນັບມື້ນັບຫລາຍຂຶ້ນເປັນກ້າວໆທັງດ້ານປະລິມານແລະຄຸນນະພາບ, ທັງດປັນການດຶງດູດເອົາການລົງທຶນຈາກພາຍໃນແລະຕ່າງປະເທດໃຫ້ມາລົງທຶນໃນຂົງເຂດການຜະລິດເຟີນິເຈີໄມ້,ສ້າງມູນຄ່າເພີ່ມໃຫ້ແກ່ຜະລິດຕະພັນເຟີນິເຈີໄມ້ລາວໃຫ້ຫລາຍຂຶ້ນ,ປະກອບສ່ວນສ້າງສາພັດທະນາປະເທດຊາດໃຫ້ຈະເລີນຮຸ່ງເຮືອງທັງຍັງເປັນການສ້າງວຽກເຮັດງານທຳໃຫ້ກັບປະຊາຊົນລາວບັນດາເຜົ່າເພື່ອຫລຸດຜ່ອນໄພວ່າງງານຊຶ່ງສອດຄ່ອງກັບແຜນພັດທະນາເສດຖະກິດ-ສັງຄົມຂອງລັດຖະບານວາງອອກ.
ງານວາງສະແດງສິນຄ້າເຟີນິເຈີວຽງຈັນຄັ້ງທີ4ຈັດຂຶ້ນໃນລະຫວ່າງວັນທີ23-31 ມີນາ 2019 ມີທັງໝົດ 180ຫ້ອງໃນນີ້ມີ 20 ຫ້ອງສຳລັບຫົວໜ່ວຍທຸລະກິດໂອດັອບໂດຍຫົວໜ່ວຍທຸລະກິດທີ່ເຂົ້າຮ່ວມທັງໝົດມີ75ຫົວໜ່ວຍ, ມາຈາກຕ່າງແຂວງ 17ຫົວໜ່ວຍຈາກ 10 ແຂວງຊຶ່ງຄາດການຈໍລະຈອນຊື້-ຂາຍສິນຄ້າລວມທັງຫມົດໃນງານປະມານ20ຕື້ກີບແລະຄາດວ່າຈະມີການຊື້-ຂາຍໄດ້ປະມານ16ຕື້ກີບເທົ່າກັບ80%.