ສຳນັກວັດປ່າໂພນເພົາວະນາຣາມ ຫຼວງພະບາງ ໄດ້ຄິດໄລ່ ແລະ ປະກາດວັນປີໃໝ່ລາວປີນີ້ ປິກຸນ ກັດໃຄ້ ເອກະສົກ ຈຸລະສັກກະຣາດ 1381 ຈັນທະຣະຄະຕິເປັນປົກກະຕິມາດ ປົກກະຕິວານ ທາງສຸລິຍະຄະຕິເປັນປົກກະຕິສຸລະທິນ.
(1) ວັນທີ 14 ເມສາ ເປັນວັນມະຫາສົງການ ກົງກັບວັນອາທິດ ຂຶ້ນ 10 ຄໍ່າ ເດືອນ 05 ພສ 2562 ເວລາ 15 ໂມງ 14 ນາທີ 24 ວິນາທີ;
(2) ນາງສັງຂານນາມວ່າ ທຸງສະເທວີ ຊົງພາຫຸລັດດອກທັບທິມ (ດອກພິລາ), ອາພອນແກ້ວປັດທະມະຣາດ (ແກ້ວພິລາ), ພັກສາຫານອຸທຸມພອນ (ໝາກເດື່ອ), ພະຫັດຂວາຊົງຈັກ, ພະຫັດຊ້າຍຊົງຫອຍສັງ ແລະ ສະເດັດນັ່ງມາເທິງຫຼັງຄຸດເປັນພາຫະນະ;
(3) ວັນທີ 16 ເມສາ ເວລາ 19:12 ໂມງ ປ່ຽນວັນຖະເຫຼີງສົກຂຶ້ນປີໃໝ່ ປ່ຽບຈຸນລະສັກກະຣາດ ເປັນ 1381:
1. ວັນຈັນເປັນທຸງໄຊ,
2. ວັນເສົາເປັນອະທິບໍດີ,
3. ວັນຈັນເປັນອຸບາດ ເປັນວັນໂລກາວິນາດ,
4. ວັນພະຫັດເປັນອະທິບໍດີ;
(4) ທຳນາຍຝົນ ນາກຫຼິ້ນນໍ້າ 03 ໂຕ:
1. ບັນດານໃຫ້ມີຝົນຕົກ 500 ຫ່າ,
2. ຕົກໃນຂອບຈັກກະວານ 200 ຫ່າ,
3. ຕົກໃນປ່າຫິມະພານ 150 ຫ່າ,
4. ຕົກໃນມະຫາສະໝຸດ 100 ຫ່າ ແລະ
5. ຕົກໃນໂລກມະນຸດ 50 ຫ່າ;
(5) ທຳນາຍເກນທັນຍາຫານ ຊື່ວ່າ ປາປະ:
1. ເຂົ້ານາຮົ້ວສວນຈະໄດ້ຮັບຜົນ 01 ສ່ວນ,
2. ເສຍໄປ 10 ສ່ວນ,
3. ຈະເກີດທຸບພິຂາໄພຕ່າງໆ,
4. ປະຊາຊົນຈະໄດ້ຮັບທຸກລຳບາກເພາະທັນຍາຫານແພງ.
