ທີ່ກະຊວງແຮງງານ ແລະສະຫວັດດີການສັງຄົມ (ຮສສ) ໄດ້ມີພິທີມອບ-ຮັບເງິນຊ່ວຍເຫຼືອໄພພິບັດນ້ຳຖ້ວມໃຫ້ແກ່ແຂວງອັດຕະປື ໂດຍການມອບຂອງບໍລິສັດ ອາມະຕະ ຄອບເປີເຣຊັນ ຈຳກັດ (ມະຫາຊົນ) ໃຫ້ກັບກະຊວງ, ຊຶ່ງຕາງໜ້າມອບແມ່ນທ່ານ ວະລົງ ຕັງປະພຶດກຸນ ຫົວໜ້າໂຄງການບໍລິສັດ ອາມະຕະ ຄອບເປີເຣຊັນ ຈຳກັດ ແລະຮັບໂດຍທ່ານ ຄຳແພງ ໄຊສົມແພງ ລັດຖະມົນຕີກະຊວງ ຮສສ, ພ້ອມນັ້ນຍັງມີຄະນະທັງສອງຝ່າຍເຂົ້າຮ່ວມ.
ທ່ານ ວະລົງ ຕັງປະພຶດກຸນ ກ່າວວ່າ: ອະມະຕະ ຄອບເປີເຣຊັນ ຈຳກັດ ເປັນບໍລິສັດໜຶ່ງທີ່ໄດ້ມີລົງທຶນຢູ່ ສປປລາວ, ຊຶ່ງພາຍຫຼັງທີ່ໄດ້ຮູ້ຂ່າວວ່າ ແຂວງອັດຕະປືຂອງລາວ ໄດ້ຮັບຜົນກະທົບຈາກໄພພິບັດ, ທາງກຸ່ມບໍລິສັດ ກໍໄດ້ປະກອບສ່ວນເປັນເຄື່ອງບໍລິໂພກ ໂດຍສົ່ງກົງມາຈາກປະເທດໄທ ລວມມູນຄ່າ 1,2 ແສນບາດ, ຕໍ່ມາກໍໄດ້ປະກອບສ່ວນໃນການກໍ່ສ້າງຫ້ອງນ້ຳໃຫ້ກັບສູນອົບພະຍົມ ຢູ່ເມືອງສະໜາມໄຊ ຈຳນວນ 2 ແຫ່ງ
ລວມມູນຄ່າຫຼາຍກວ່າລ້ານບາດ, ຊຶ່ງການຊ່ວຍເຫຼືອຂອງບໍລິສັດແມ່ນໄດ້ປະຕິບັດມາຢ່າງຕໍ່ເນື່ອງ ແລະມາໃນຄັ້ງນີ້ບໍລິສັດກໍມີຈິດໃຈຢາກຊ່ວຍໃນດ້ານຂອງການກໍ່ສ້າງ ແລະຟື້ນຟູ ລວມໄປເຖິງການຢຽວຢາຈິດໃຈຂອງຜູ້ປະສົບໄພ ຈຶ່ງໄດ້ນຳເງິນຈຳນວນ 5,22 ແສນບາດ ມາມອບໃຫ້ກັບກະຊວງ ຮສສ ເພື່ອນຳໄປຊ່ວຍເຫຼືອຜູ້ປະສົມໄພໃນເຂດດັ່ງກ່າວ ແນນໃສ່ເຮັດໃຫ້ຊີວິດການເປັນຢູ່ຂອງພວກເຂົາໄດ້ຮັບການປັບປຸງໃຫ້ດີຂຶ້ນເປັນກ້າວໆ.
ທ່ານ ຄຳແພງ ໄຊສົມແພງ ກໍໄດ້ກ່າວຂອບໃຈມາຍັງບໍລິສັດ ທີ່ໄດ້ໃຫ້ການຊ່ວຍເຫຼືອຜູ້ປະສົບໄພໃນ ສປປລາວ ມາໂດຍຕະຫຼອດ ໂດຍສະເພາະແມ່ນ ແຂວງອັດຕະປື, ຕາງໜ້າລັດຖະບານ ກໍຄື ກະຊວງ ຮສສ ຂໍຂອບໃຈມາຍັງຄະນະຂອງບໍລິສັດ ອາມະຕະ ຄອບເປີເຣຊັນ ອີກເທື່ອໜຶ່ງ, ພວກເຮົາ ຈະນຳເອົາເງິນຊ່ວຍເຫຼືອຈາກບໍລິສັດໃນຄັ້ງນີ້ ນຳໄປຈັດຕັ້ງຜັນຂະຫຍາຍໃຫ້ຮອດໃຫ້ເຖິງປະຊາຊົນຜູ້ທີ່ໄດ້ຮັບຜົນກະທົບ ແລະເຮັດໃຫ້ເຂົາເຈົ້າມີການພັດທະນາຂຶ້ນຢ່າງຕໍ່ເນື່ອງ