ຫລາຍຄົນຈະຫນາຫູກັບຫາງສຽງຈົ່ມວ່າ ວິພາກວິຈານກັນໃນເລື່ອງ ຄຸນນະພາບຂອງການກໍ່ສ້າງຖະຫນົນຫົນທາງ ຢູ່ບ້ານເຮົາບ່ອນໃດກໍມີມູນຄ່າຢ່າງມະຫາສານແຕ່ຄຸນນະພາບພັດບໍ່ສົມນ້ໍາສົມຕ່ອນ, ລູກພໍ່ນາຫມາເຕົ່າໄປເຮັດວຽກ ຮັບເຫມົາກໍ່ສ້າງຂົວທາງ ແລະ ຊົນລະປະທານມາບໍ່ຮອດ 2 ໂຄງການກໍ່ກາຍເປັນເສດຖີ.
ຕໍ່ບັນຫານີ້. ກົມຂົນທາງກະຊວງໂຍທາທິການ ແລະ ຂົນສົ່ງໄດ້ອອກມາຊີ້ແຈງຕໍ່ກອງປະຊຸມຂະແຫນງການຂອງຕົນໃນທົ່ວ ປະເທດທີ່ຈັດຂຶ້ນເມື່ອທ້າຍເດືອນມີນາ ຜ່ານມານີ້ວ່າ: ຍ້ອນຫຍັງໂຄງການກໍ່ສ້າງຂົວທາງຈິ່ງມີລາຄາສູງເກີນເຫດແຕ່ຄຸນນະຕ່ໍ່າ, ສາເຫດຕົ້ນຕໍແມ່ນມາຈາກໂຄງການລົງທຶນກ່ອນ, ໂດຍບໍ່ໄດ້ຜ່ານການປະມູນ, ການສໍາຫລວດອອກ ແບບ, ເຊິ່ງທັງຫມົດແມ່ນຜູ້ລົງທຶນ ເປັນຜູ້ຈັດຕັ້ງເຮັດ ເອງທັງຫມົດ ໂດຍມີການສົມຮູ້ຮ່ວມຄິດກັບຜູ້ເປັນເຈົ້າຂອງ ໂຄງການຈໍານວນຫນຶ່ງ, ຕະຫລອດຮອດບໍລິສັດທີ່ປຶກສາ ແລະ ຜູ້ຄວບຄຸມເຕັກນິກ ການກໍ່ສ້າງກໍ່ ແມ່ນຜູ້ຮັບເຫມົາ ເລືອກເອງ,ຈ້າງເອງ ແລະ ການກວດກາຄຸນນະພາບການກໍ່ສ້າງກໍເຮັດແບບມະລຸມມະລວຍຜີບ້ານພ້ອມຜີປ່າແລ້ວກໍ່ “Ok” ຫລື ບາງໂຄງການທີ່ແຂວງສະເຫນີມາສ່ວນຫລາຍກໍ່ບໍ່ໄດ້.
ຜ່ານ ການສໍາຫລວດ-ອອກແບບລະອຽດ, ທັງເຮັດທັງອອກແບບໄປພ້ອມ, ບໍ່ໄດ້ຜ່ານການກວດກາຄິດໄລ່ຫົວຫນ່ວຍລາຄາຢ່າງລະອຽດຖີ່ຖ້ວນໃນລັກສະນະຂາດ ຄວາມຮັບຜິດຊອບເອງຜູ້ ເປັນເຈົ້າຂອງ ແລະ ອື່ນໆ.
ຄົນຮັ່ງຄົນລວຍແລ້ວ, ແຕ່ເບື້ອງລັດນັບມື້ນັບທຸກລົງ, ເພາະຈະຫາເງິນມາໃຊ້ຫນີ້ ຫລື ສ້ອມແປງໂຄງການທີ່ຂາດຄຸນນະພາບດັ່ງກ່າວ ກໍບໍ່ມີມື້ຊີ້ນສຸດ, ແຕ່ແລ້ວບັນດາໂຄງການເລົ່ານັ້ນ ກໍຍັງສືບຕໍ່ດໍາເນີນໄປຢ່າງບໍ່ມີໃຜເອົາໂທດໃຜ, ຈົນເຖິງຂັ້ນເກີດ ມີ ໂຄງການບໍ່ມີຕົນໂຕກໍ່ສາ ມາດມາຖອນ ເງິນງົບປະທານໄປແບ່ງກັນໃຊ້ຈ່າຍຢ່າງຟູມເຟືອຍ.
ລັດຖະບານຊຸດນີ້ເພິ່ນໄດ້ເຂັ້ມງວດກວດ ຂັ້ນເພື່ອສະກັດກັ້ນສິ່ງຫຍໍ້ທໍ້ ດັ່ງກ່າວ ແລະ ຜ່ານມາມໍ່ໆນີ້, ລັດຖະບານກໍ່ສາມາດເກັບກູ້ ເງິນຄືນມາໄດ້ຈາກໂຄງການທີ່ມີລາຄາແພງເກີນເຫດມາ ໄດ້ນັບເປັນ 5-6 ພັນຕື້ກີບ.
ຮຽບຮຽງຈາກ: ໜັງສືພິມລາວພັດທະນາ