ພະແນກວິທະຍາສາດເຕັກໂນໂລຊີ ແຂວງສາລະວັນ ໄດ້ຈັດພິທີທໍາລາຍສິນຄ້າທີ່ມີເຄື່ອງຫມາຍການປອມແປງ ຂອງຮູບຊົງການຄ້າ ໃນນີ້ , ມີຊະນິດນ້ຳມັນເຄື່ອງຮອນດ້າ ແລະ ແປ້ງນົວກາຈອງທີ່ມີຜູ້ນໍາເຂົ້າມາຂາຍຍ່ອຍຢູ່ຕາມຕະຫຼາດ ແລະ ບັນດາຫ້າງຮ້ານພາຍໃນ ແຂວງສາລະວັນ ໂດຍສະເພາະຄະນະກໍາມະການຂັ້ນແຂວງ, ຂັ້ນເມືອງ ໄດ້ເຄື່ອນໄຫວກວດກາສິນຄ້າທີ່ມີເຄື່ອງຫມາຍລອກລຽນແບບ ເຊິ່ງກາຍເປັນການລະເມີດສິດຊັບສິນທາງປັນຍາຂອງ ບໍລິສັດ ນໍາເຂົ້າທໍາອິດ.
ການທໍາລາຍສິນຄ້າປອມແປງຄັ້ງນີ້, ພະແນກວິທະຍາສາດເຕັກໂນໂລຊີຂອງແຂວງກ່າວວ່າ :
ຄະນະກໍາມະການຂັ້ນແຂວງ, ຂັ້ນເມືອງ ໄດ້ມີການສົມທົບດ້ານວຽກງານວິຊາການ-ວິຊາສະເພາະຮ່ວມກັນກັບ ຫຼາຍພາກສ່ວນພາຍໃນແຂວງ ເພື່ອແນໃສ່ເຄື່ອນໄຫວກວດກາສິນຄ້າ ທີ່ມີການລະເມີດສິດ ແລະ ຊັບສິນທາງປັນຍາ ໂດຍສະເພາະສິນຄ້າທີ່ມີການປອມແປງຮູບຊົງເຄື່ອງຫມາຍການຄ້າ, ຊະນິດ, ກິ່ນ, ລົດຊາດ ແລະ ຄວາມເປັນອັນຕະລາຍ ຕໍ່ພາຫະນະ-ຮ່າງກາຍຂອງ ຜູ້ຊົມໃຊ້ນ້ໍາມັນເຄື່ອງຮອນດ້າ ແລະ ຜູ້ບໍລິໂພກແປ້ງນົວກາຈອງປອມ.
ພາຍຫຼັງເຄື່ອນໄຫວກວດກາກໍ່ສາມາດພົບພໍບຸກຄົນໃນຕະຫຼາດ ແລະ ຫ້າງຮ້ານຂາຍເຄື່ອງຍ່ອຍໄດ້ມີການວາງ ຂາຍນ້ໍາມັນເຄື່ອງ ແລະ ແປງນົວກາຈອງປອມ ລວມມີ 20 ຮ້ານ, ໃນນັ້ນຮ້ານທີ່ວາງຂາຍນ້ໍາມັນເຄື່ອງຮອນດ້າທີ່ມີ 18 ຮ້ານ ປະ ກອບມີ 470 ຕຸກ ສະເລ່ຍເປັນເງິນ 15 ລ້ານກວ່າກີບ, ຮ້ານທີ່ວາງຂາຍແປງນົວປອມມີ 2 ຮ້ານ ມີ 443 ຖົງ ກວມເອົາ 29.570 ກິໂລກຼາມ ແລະ ໄດ້ນໍາມາທໍາລາຍຖິ້ມ, ການລົງຈັດຕັ້ງປະຕິບັດວຽກງານຄັ້ງນີ້ ກໍເພື່ອແນໃສ່ຕອບ ສະຫນອງໃຫ້ວັນຊັບສິນທາງປັນຍາໂລກຄົບຮອບ 19 ຄື (ວັນທີ 26 ເມສາ 2000- ວັນທີ 26 ເມສາ 2019.)
ພິທີດັ່ງກ່າວໄດ້ມີຂຶ້ນໃນວັນທີ 23 ເມສາ 2013 ນີ້, ຢູ່ທີ່ສະຫນາມຖິ້ມຂີ້ເຫຍື້ອບ້ານຄັນທະລາດ ເມືອງສາລະວັນ, ເຂົ້າຮ່ວມໃນພິທີມີທ່ານ ແຫວນເພັດ ລັດດາວົງ ຫົວຫນ້າພະແນກວິທະຍາສາດເຕັກໂນໂລຊີແຂວງ, ມີຄະນະກໍາມະການຂັ້ນແຂວງ, ຂັ້ນເມືອງ ແລະ ພະແນກການອ້ອມຂ້າງທີ່ກ່ຽວຂ້ອງເຂົ້າຮ່ວມ.
ທີ່ມາ: ໜັງສືພິມຄວາມສະຫງົບ
