ທ່ານ ນາງ ຈັນທະຈອນ ວົງໄຊ
ພິທີຖະແຫຼງຂ່າວ ງານວາງສະແດງ ຜະລິດຕະພັນລາວ ປີ 2019 ທີ່ ສຄອຊ
ໂດຍການເປັນປະທານໂດຍ ທ່ານ ນາງ ຈັນທະຈອນ ວົງໄຊ ຮອງປະທານ ສຄອ ແຫ່ງຊາດລາວ, ທ່ານ ໄຊສົມເພັດ ນໍລະສິງ ຫົວໜ້າກົມສົ່ງເສີມ ການຄ້າ, ກະຊວງ ອຸດສາຫະກຳ ແລະ ການຄ້າ, ທ່ານ ສີບຸນທຳ ສີບຸນມີ ຜູ້ອຳນວຍກການໃຫ່ຍ ບໍລິສັດ ລາວເວີນ ມະຫາຊົນ ແລະ ມີທ່ານ ຜູ້ຕ່າງໜ້າ ຈາກບໍໍລິສັດທີ່ໃຫ້ການສະໜັບສະໜູນ ແລະ ບັນດາສື່ມວນຊົນເຂົ້າຮ່ວມ.
ເພື່ອປະຕິບັດຕາມນະໂຍບາຍ ພັດທະນາເສດຖະກິດສັງຄົມ ຂອງ ພັກ – ລັດຖະບານ ຕໍ່ ກັບການຊຸກຍູ້ສົ່ງເສີມການຜະລິດເປັນສິນຄ້າພາຍໃນປະເທດ ແລະ ເພື່ອຊຸກຍູ້ສົ່ງເສີມ ສ້າງຄວາມເຂັ້ມແຂງໃຫ້ຜູ້ປະກອບການ, ສະພາການຄ້າ ແລະ ອຸດສາຫະກຳ ແຫ່ງຊາດລາວ ຮ່ວມກັບ ສະພາການຄ້າ ແລະ ອຸດສາຫະກຳ ແຂວງ, ສະມາຄົມ, ກຸ່ມທຸລະກິດ ແລະ ສູນການຄ້າ ລາວ – ໄອເຕັກ ຈະໄດ້ຈັດ ງານວາງສະແດງ ຜະລິດຕະພັນລາວ 2019, Made in Laos 2019, ເຊິ່ງຈະໄດ້ຈັດຂື້ນໃນລະຫວ່າງວັນທີ 10-19 ເດືອນ ພຶດສະພາ 2019 ທີ່ ສູນວາງສະແດງສິນຄ້າ ລາວ – ໄອເຕັກ ຕືກເກົ່າ.
ງານວາງສະແດງ Made in Laos 2019 ແມ່ນໄດ້ຈັດຂື້ນ ຄັ້ງທຳອິດ ໃນປີ 2011, ແລະໃນຄັ້ງນີ້ ແມ່ນເປັນຄັ້ງທີ 6, ງານໃນຄັ້ງນີ້ໄດ້ລະດົມຂົນຂວາຍຜູ້ປະກອບການ, ຜູ້ຜະລິດສິນຄ້າໃນທຸກຂະແໜງໃນທົ່ວປະເທດ ລວມເຖິງທຸລະກິດທີ່ຢູ່ໃນເຂດເສດຖະກິດພິເສດ ເພື່ອນຳເອົາຜະລິດຕະພັນເປັນເອກະລັກຂອງ ແຕ່ລະແຂວງມາວາງສະແດງ, ໂຄສະນາ ແລະ ຈຳໜ່າຍ ຫຼາຍກ່ວາ 250 ຫ້ອງວາງສະແດງ ເພື່ອແນ່ໃສ່ຍົກລະດັບການຜະລິດ – ການຈໍາໜ່າຍ ພາຍໃນໃຫ້ນັບມື້ນັບຂະຫຍາຍຕົວ, ມີຄຸນນະພາບ, ໄດ້ມາດຕະຖານ ແລະ ກ້າວຂື້ນສູ່ລະດັບສາກົນ ແລະ ເປັນການສ້າງຄວາມພາກພູມໃຈຕໍ່ສິນຄ້າ-ຜະລິດຕະພັນທີ່ຜະລິດໃນລາວ ແລະ ແມ່ນກິດຈະກຳໜື່ງຂອງພາກທຸລະກິດ ເພື່ອສະໜັບສະໜູນ ການດືງດູດນັກທ່ອງທ່ຽວ ແລະ ນັກລົງທຶນ ເຂົ້າມາລາວໃຫ້ນັບມື້ນັບຫຼາຍຂື້ນ.
- ກິດຈະກຳຫຼັກພາຍໃນງານປະກອບມີ:
- ງານວາງສະແດງ ແລະ ຂາຍສິນຄ້າ
- ສຳມະນາ ແລະ ພົບປະທຸລະກິດ
- ງານວາງສະແດງ ແລະ ຂາຍສິນຄ້າ
ງານວາງສະແດງໃນຄັ້ງນີ້ ຈະວາງສະແດງຫຼາກຫຼາຍຜະລິດຕະພັນທີ່ຜະລິດ ແລະ ປະກອບ ຢູ່ສປປ ລາວ ໂດຍຜູ້ປະກອບການທັງພາຍໃນ ແລະ ຕ່າງປະເທດເຂົ້າຮ່ວມວາງສະແດງ ເຊັ່ນ: ຂະແໜງຫັດຖະກຳ, ອຸດສາຫະກຳ, ອັນຍະມະນີ, ເຟີນີເຈີ້, ຕັດຫຍິບ, ການຢາ, ທ່ອງທ່ຽວ ແລະ ການບໍລິການ ແລະລວມເຖິງຜະລິດຕະພັນ ໜື່ງເມືອງໜື່ງຜະລິດຕະພັນ ແລະ ອື່ນໆ ຫຼາຍກວ່າ 250 ຫ້ອງວາງສະແດງ. ເຊິ່ງ ສຄອ ແຂວງ, ບັນດາກຸ່ມ, ສະມາຄົມທຸລະກິດ ກໍ່ຈະລະດົມສະມາຊິກຂອງຕົນນຳເອົາຜະລິດຕະພັນທີ່ໂດດເດັ່ນ ແລະ ເປັນເອກະລັກເຂົ້າຮ່ວມງານວາງສະແດງ ໃນຄັ້ງນີ້ອີກດ້ວຍ.
ສະມາຊິກຂອງ ສະພາການຄ້າ ແລະ ອຸດສາຫະກຳ ແຫ່ງຊາດລາວ, ສຄອແຂວງ ແລະ ສະມາຊິກຂອງ ສຄອ ແຂວງ, ສະມາຄົມ, ກຸ່ມ ແລະ ສະມາຊິກຂອງສະມາຄົມ, ກຸ່ມທຸລະກິດ ຕ່າງໆເຊີ່ງກວມເອົາບັນດາຂະແໜງ ການຄື:
- ຂະແໜງ ອຸດສາຫະກຳປຸງແຕ່ງ
- ຂະແໜງ ເງິນ, ຄຳ ວັດຖຸມີຄ່າ
- ຂະແໜງ ເຟີນິເຈີ້, ໄມ້ແກະສະຫຼັກ
- ຂະແໜງ ຈັກສານ, ຫວາຍ ແລະ ໄມ້ປ່ອງ
- ຂະແໜງ ປຸງແຕ່ງກະສິກຳ
- ຂະແໜງ ການຢາ
- ຂະແໜງ ໂຮງແຮມ, ຮ້ານອາຫານ ແລະ ເຄື່ອງດື່ມ
- ຂະແໜງ ຕັດຫຍິບ
- ຂະແໜງ ທ່ອງທຽ່ວ ແລະບໍລິການ
- ຂະແໜງ ກະສິກຳ
- ຂະແໜງ ທຸລະກິດການສຶກສາ
- ຂະແໜງ ສື່ສານມວນຊົນ
- ຂະແໜງ ສິນຄ້າໃຊ້ສອຍ
- ຂະແໜງ ອຸດສາຫະກຳຍານພາຫະນະ
- ຂະແໜງ logistic
- ຂະແໜງ ທະນາຄານ
- ຂະແໜງ ວັດສະດຸກໍ່ສ້າງ ( ເຫຼັກ, ສີມັງ, ສັງກະສີ, ສີແພກ, ທໍ່ນ້ຳ ແລະ ອື່ນໆ …. )
- ບໍລິສັດ ແລະ ຫ້າງຮ້ານໃນທົ່ວປະເທດ
- ງານວາງສະແດງ ແລະ ພົບປະທຸລະກິດ.
ກອງປະຊຸມສໍາມະນາ ແລະ ພົບປະນັກທຸລະກິດ ແມ່ນການຈັດກິດຈະກຳເພື່ອໃຫ້ຄວາມຮູ້ແກ່ຜູ້ ຜະລິດ ແລະ ຜູ້ຂາຍ ລວມໄປເຖີງ ທ່ານໃດທີ່ຕ້ອງການປະກອບທຸລະກິດຂອງຕົນເອງ, ກໍສາມາດເຂົ້າຮ່ວມກອງປະຊຸມສຳມະນາຄັ້ງນີ້ໄດ້, ໂດຍກອງປະຊຸມສໍາມະນາຈະດໍາເນີນໄປ ແຕ່ວັນທີ 13-18 ເປັນເວລາ 6 ວັນ . ເຊີ່ງມີຫົວທີ່ໜ້າສົນໃຈດັ່ງນີ:
- ສຳມະນາກ່ຽວກັບການແປຮູບ ສິນຄ້າກະສິກຳ
- Mini Training ( ILO-SSC)
- ສຳມະນາ ການກຽມຄວາມພ້ອມເຂົ້າຮ່ວມງານວາງສະແດງຢູ່ຕ່າງປະເທດ
- ການນຳສະເໜີຂອງບໍລິສັດທີ່ປະສົມຜົນສຳເລັດໃນການເຮັດທຸລະກິດໃນ ສປປ ລາວ
- ນໍາສະເໜີກ່ຽວກັບຜະລິດຕະພັນ ແລະ ການບໍລິການ ທີ່ທັນສະໄໝຂອງ ທະນາຄານພັດທະນາລາວ
- ເງື່ອນໄຂໃນການເຂົ້າຫາແຫລ່ງທຶນຂອງ ທະນາຄານພັດທະນາລາວ
ກອງປະຊຸມສຳມະນາດັ່ງກ່າວແມ່ນໄດ້ເຊື້ອເຊີນຜູ້ບັນຍາຍທີ່ມີປະສົບການ ທັງພາຍໃນ ແລະ ຕ່າງປະເທດ, ຄາດຄະເນຜູ້ຈະເຂົ້າຮ່ວມສຳມະນາທັງໝົດຫຼາຍກ່ວາ 500 ຄົນ ເຊິ່ງລວມມີຜູ້ປະກອບການ ແລະ ນັກສຶກສາ. ກອງປະຊຸມສຳມະນາດັ່ງກ່າວ ນອກຈາກຈະເປັນການສະໜອງຄວາມຮູ້ໃຫ້ແກ່ຜູ້ປະກອບການ ແລະ ນັກສຶກສາແລ້ວ ຍັງເປັນເວທີໜື່ງໃນການພົບປະແລກປ່ຽນບົດຮຽນ ລະຫວ່າງຜູ້ປະກອບກັນດ້ວຍກັນອີກດ້ວຍ.
ໃນນາມ ສະພາການຄ້າ ແລະ ອຸດສາຫະກຳ ແຫ່ງຊາດລາວ ຂໍເຊີນຊວນບັນດາທ່ານ, ຜູ້ປະກອບການ ເຂົ້າຮ່ວມວາງສະແດງ ແລະ ທ່ຽວຊົມໃນງານໃນຄັ້ງນີ້, ເຊິ່ງສາມາດສອບຖາມຂໍ້ມູນ ແລະ ລົງທະບຽນ ໄດ້ ທີ່ ຫ້ອງການ ສະພາການຄ້າ ແລະ ອຸດສາຫະກຳ ແຫ່ງຊາດລາວ, ສະພາການຄ້າ ແຂວງ, ສະມາຄົມ, ກຸ່ມທະລະກິດ ທີ່ ຂື້ນກັບ ສຄອ ແຫ່ງຊາດລາວ.
- ປະຈຸບັນ ມີບໍລິສັດສະມັກເຂົ້າຮ່ວມງານ 180 ຫ້ອງ, ເຊີ່ງແບ່ງອອກເປັນປະເພດສິນຄ້າດັ່ງນີ:
- ສຄອ ແຂວງ 18 ຫ້ອງວາງສະແດງ ( ເຊີ່ງຈະເນັ້ນ ສິນຄ້າທີ່ເປັນເອກະລັກຂອງແຂວງ)
- ປະເພດ ຜະລິດຕະພັນ ໂອດັອບ 35 ຫ້ອງາງສະແດງ
- ປະເພດ ຜະລິດຕະພັນ ຫັດຖະກຳຝ້າໃໝ່-ຜ້າຝ້າຍ 30 ຫ້ອງວາງສະແດງ
- ປະເພດ ຜະລິດຕະພັນ ຫັດຖະກຳເຄື່ອງເງີນ 10 ຫ້ອງາງສະແດງ
- ປະເພດ ຜະລິດຕະພັນ ອາຫານ 29 ຫ້ອງວາງສະແດງ
- ແລະ ປະເພດ ຜະລິດຕະພັນ ອື່ນໆ 58 ຫ້ອງ
ທີ່ມາ: ສະພາການຄ້າ ແລະ ອຸດສາຫະກຳ ແຫ່ງຊາດລາວ
Hits: 4
