ກະຊວງ ຍທຂ ເປີດເຜີຍວ່າ: ຕາມການສັງລວມໜີ້ສິນຂອງ ກະຊວງ ຍທຂ ມາຮອດເດືອນກັນຍາ 2018 ຈໍານວນໜີ້ສິນທັງໝົດທີ່ຈະຕ້ອງໄດ້ສືບຕໍໍ່ແກ້ໄຂແມ່ນ 8.300 ກວ່າຕື້ກີບ.
ເຊິ່ງໝີ້ສິນແມ່ນມາຈາກສາເຫດຈາກການລະເມີດວິໄນແຜນການ ແລະ ການເງິນຄື: ການສ້າງແລະຄຸ້ມຄອງແຜນການລົງທຶນຂອງລັດໂດຍສະເພາະການຈັດໂຄງການເຂົ້າແຜນຍັງບໍ່ທັນມີການຢືນຢັນຈຸດທີ່ຊັດເຈນກວ່າເພື່ອບັນລຸຄາດໝາຍມະຫາພາກ ຂອງຂະແໜງການ, ການຄຸ້ມຄອງແຜນງົບປະມານບໍລິຫານ, ຫຼາຍພາກສ່ວນມີການນໍາໃຊ້ເງິນບໍລິຫານເກີນງົບປະມານທີ່ຕົນເອງໄດ້ຮັບຈິ່ງພາໃຫ້ເກີດໜີ້ສິນຄຸມເຄືອ,ສາເຫດແມ່ນເກີດຈາກຂຶ້ນແຜນນໍາໃຊ້ງົບປະມານບໍລິຫານທີ່ບໍ່ລະອຽດແລະບໍ່ມີປະສິດທີ ຜົນ.
ນອກນີ້ ຫຼາຍພາກສ່ວນບໍໍ່ມີແຜນຈັດຊື້ຈັດ-ຈັດຈ້າງແຕ່ຫົວທີ, ການລະເລີຍຕໍ່ບັນຫາການຢືມເງິນລ່ວງໜ້າຂອງບັນດາກົມກອງທີ່ບໍ່ປະກອບເອກະສານໃຊ້ແທນຄືນ, ການປະຕິບັດພາລະບົດບາດລະຫວ່າງພາກສ່ວນຮັບຜິດຊອບຂະແໜງການເງິນ ແລະ ຂະແໜງແຜນການ ຂອງກະຊວງ ຍທຂ ປົນເປກັນ.
ຕະຫຼອດຮອດການຕິດຕາມກວດກາ,ບໍ່ມີກົນໄກປະສານງານຢ່າງ ເປັນລະບົບເປັນລະບົບ ແລະໜີ້ສິນຂອງຂະແໜງການແມ່ນນັບມື້ນັບໜັກໜ່ວງຫຼາຍເນື່ອງຈາກໜີ້ ຈາກການພັດທະນາໂຄງລ່າງພື້ນຖານທີ່ຄ້າງຈ່າຍໃຫ້ບໍລິສັດຮັບເໝົາໂຄງການກໍ່ສ້າງກະທົບຕໍ່ການຊໍາລະສະສາງເງິນກູ້ຈາກທະນາຄານ ແລະ ເປັນຕ່ອງໂສ້ກະທົບຕໍ່ພາກທຸລະກິດພາຍໃນ ແລະ ສັງຄົມໂດຍລວມ.
ທີ່ມາ: ມີເດຍລາວ