ໃນວັນທີ 7-9 ພຶດສະພາ 2019 ທີ່ສູນເຝິກອົບຮົມສູນກາງແນວລາວສ້າງຊາດ ກົມພິມຈໍາໜ່າຍ ກະຊວງຖະແຫຼງຂ່າວ ວັດທະນະທໍາ ແລະ ທ່ອງທ່ຽວ ຮ່ວມກັບ ກົມພິມຈໍາໜ່າຍ ການພິມ ແລະ ການຈໍາໜ່າຍ ກະຊວງຖະແຫຼງຂ່າວ ແລະ ການສື່ສານ ສສ ຫວຽດນາມ ຈັດຊຸດເຝິກອົບຮົມວິຊາການພິມຈໍາໜ່າຍ ແລະ ການພິມໃຫ້ແກ່ພະນັກງານລາວ
ຊຸດເຝິກອົບຮົມຄັ້ງນີ້ ເພື່ອເປັນການຄຸ້ມຄອງຄຸນນະພາບຜະ ລິດຕະພັນການພິມ ບົດຮຽນຄວາມຄວາມແຕກຕ່າງ ການຜະລິດຢູ່ໃນວິສະຫະກິດການພິມ ການຄຸ້ມຄອງ ແລະ ການຈັດຕັ້ງ ຜະລິດວິສະຫະກິດການພິມ ເພື່ອຜົນສໍາເລັດໃຫ້ການພິມຈໍາໜ່າຍປຶ້ມໜຶ່ງຫົວໃນຍຸກດີຈິຕ໋ອນ ທິດທາງການຂະຫຍາຍຕົວວຽກງານພິມຈໍາໜ່າຍ ການກວດແກ້ ແລະ ຍົກລະດັບວຽກງານບັນນາທິການ ໂດຍແມ່ນວິທະຍາກອນ ຜູ້ຊ່ຽວຊານດ້ານພິມຈໍາໜ່າຍ ການພິມ ແລະ ການຈໍາໜ່າຍ ກະຊວງຖະແຫຼງຂ່າວ ແລະ ການສື່ສານ ແຫ່ງ ສສ ຫວຽດນາມ ທັງນີ້ກໍ່ແມ່ນສ້າງໄດ້ຄວາມສາມັກຄີແບບພິເສດ ລະຫວ່າງສອງຊາດ ໂດຍສະເພາະແມ່ນທັງສອງກະຊວງຖະແຫຼງຂ່າວ ຂອງ ສປປ ລາວ-ສສ ຫວຽດນາມ ສ້າງໄດ້ນັກວິຊາ ການດ້ານການພິມຈໍາໜ່າຍໃຫ້ແກ່ ສປປ ລາວ ເຮັດໃຫ້ວຽກງານພິມຈໍາໜ່າຍຂອງລາວມີການເຕີບໃຫຍ່ຂະຫຍາຍຕົວໃຫຍ່ເຂັ້ມແຂງທາງດ້ານປະລິມານ ແລະ ຄຸນນະພາບ.
ໂດຍການເປັນປະທານຂອງທ່ານ ບົວເງິນ ຊາພູວົງ ຮອງລັດຖະມົນຕີ ກະຊວງຖະແຫຼງຂ່າວ ວັດທະນະທໍາ ແລະ ທ່ອງທ່ຽວ ມີທ່ານ ນາງ ບົວໄຂ ເພັງພະຈັນ ຫົວໜ້າກົມກົມພິມຈໍາໜ່າຍ ກະຊວງຖະແຫຼງຂ່າວ ວັດທະນະທໍາ ແລະ ທ່ອງທ່ຽວ ທ່ານ ນາງ ມາຍທິເຮືອງ ຫົວໜ້າພະແນກຄຸ້ມຄອງການພິມຈໍາໜ່າຍ ການພິມ ແລະ ການຈໍາໜ່າຍ ກະຊວງຖະແຫຼງຂ່າວ ແລະ ການສື່ສານ ສສ ຫວຽດນາມ ພ້ອມດ້ວຍບັນດານັກວິທະຍາກອນຈາກ ສສ ຫວຽດນາມ ແລະ ນັກສໍາມະນາກອນຈາກໂຮງພິມ ຮ້ອນອອກແບບ ບໍລິສັດຈໍາໜ່າຍ ຮ້ານຈໍາໜ່າຍ ພະແນກການ ຫ້ອງການເມືອງອ້ອມຂ້າງນະຄອນຫຼວງເຂົ້າຮ່ວມ.