ບໍລິສັດລາວເວີນ ມະຫາຊົນ ຮ່ວມກັບ ສະພາການຄ້າ ແລະ ອຸດສາຫະກຳແຫ່ງຊາດລາວ ໄດ້ຈັດພິທີຖະແຫຼງຂ່າວ ກ່ຽວກັບການຈັດງານ ແລະ ເຫດການໄຟໄໝ້ ສູນການຄ້າລາວ-ໄອເຕັກ ຕຶຶກເກົ່າ ໂດຍໄດ້ຊີ້ແຈງກ່ຽວກັບເຫດການທີ່ເກີດຂຶ້ນ ແລະພ້ອມທີ່ຈະຫາລືເພື່ອຊົດເຊີຍຕໍ່ຜູ້ເສຍຫາຍເຫດໄຟໄໝ້ ສູນການຄ້າລາວ-ໄອເຕັກ ຕຶກເກົ່.
ທ່ານ ສີບຸນທຳ ສີບຸນມີ ຜູ້ອຳນວຍການໃຫຍ່ບໍລິສັດລາວເວີນ ມະຫາຊົນ ກ່າວວ່າ: ເຫດການທີ່ເກີດຂຶ້ນຢູ່ສູນວາງສະແດງສິນຄ້າ ລາວ-ໄອເຕັກ ຕຶກເກົ່າ ໃນຕອນເຊົ້າເວລາ 8:35 ມື້ນີ້ ພະນັກງານຂອງສູນການຄ້າພວກເຮົາໄດ້ໄປກວດກາ ແລະ ເປີດໄຟຟ້າ ແລະ ແອ ເພື່ອຮອງຮັບລູກຄ້າ ຫຼື ບັນດາແມ່ຄ້າຊາວຂາຍ ທີ່ຈະເຂົ້າມາໃນເວລາ 9:00 ແຕ່ເວລາທີ່ພວມໄປເປີດໄຟນັ້ນ ປະກົດວ່າເຫັນໄຟລຸກຢູ່ຈຸດຮ້ານຄ້າປະດັບລົດຍົນ ເຊິ່ງພະນັກງານ 5 ຄົນກໍ່ໄດ້ສຸມໃສ່ເອົາບັ້ງດັບເພີງໄປສີດໃສ່ ແຕ່ຍ້ອນມາປະເພດກະປ໋ອງເຄມີ ແລະ ເຄື່ອງຊັກນຳໄຟ ຈຶ່ງເຮັດໃຫ້ບໍ່ສາມາດຄວບຄຸມໄຟໄວ້ໄດ້ ຈາກນັ້ນກໍ່ໂທຂໍຄວາມຊ່ວຍເຫຼືອຈາກເຈົ້າໜ້າທີ່ດັບເພີງນະຄອນ ຫຼວງ ເຊິ່ງເພິ່ນກໍ່ມາ ແລະ ໃຊ້ເວລາດັບ 45 ນາທີ ກໍສາມາດຄວບ ຄຸມໄຟໄວ້ໄດ້.
ຜ່ານການກວດກາເບື້ອງຕົ້ນແມ່ນພວກເຮົາບໍ່ສາມາດສະຫຼຸບໄດ້ເທື່ອວ່າ ເພາະເຈົ້າໜ້າທີ່ກຳລັງເກັບຫຼັກຖານຈາກກ້ອງວົງຈອນປິດ ເພື່ອໄປກວດສອບຕົວຈິງ ແລະ ຈາກການສຳຫຼວດເບື້ອງຕົ້ນ: ມີ 24 ຮ້ານທີ່ໄດ້ຮັບຄວາມເສຍຫາຍຈາກຮ້ານຄ້າຈຳນວນທັງໝົດທີ່ມາຮ່ວມວາງສະແດງໃນງານ Made In Laos ມີ 382 ຮ້ານ ສ່ວນມູນຄ່າຄວາມເສຍຫາຍນັ້ນ ພວກເຮົາແມ່ນມີຄະນະກຳມະ ການຂອງບໍລິສັດ ຈະສົມທົບກັບ ພາກສ່ວນບໍລິສັດປະກັນໄພ ແລະ ເຈົ້າຂອງຮ້ານ ປະເມີນຕົວຈິງ ພວກເຮົາຈະມີການແກ້ໄຂບັນຫານີ້ແມ່ນພວກເຮົາແຕ່ງຕັ້ງຄະນະຮັບຜິດຊອບ ເພື່ອຮວບຮວມຂໍ້ມູນສົມທົບກັບເຈົ້າໜ້າທີ່ເພື່ອເອົາຂໍ້ມູນຄວາມຈິງ ຮ່ວມ ກັນປະເມີນຄວາມເສຍຫາຍຂອງແຕ່ລະພາກສ່ວນ ເລັ່ງສຸມທຶນຮອນເພື່ອຟື້ນຟູອາຄານ ຫຼື ຕຶກ ໃຫ້ໄວເທົ່າທີ່ຈະໄວໄດ້ ເຊິ່ງຕາມແຜນຄາດຄະເນແມ່ນຈະໃຊ້ເວລາ 1 ເດືອນກວ່າ ຄາດວ່າເດືອນກໍລະກົດ ຈະສາມາດເປີດໃຫ້ບໍລິການໄດ້ ແຕ່ຖ້າເປັນໄປໄດ້ແມ່ນຈະເລັ່ງໃຫ້ແລ້ວກ່ອນວັນທີ 1 ມິຖຸນາ.
ສໍາລັບການຊົດເຊີຍພວກເຮົາຈະຮ່ວມປຶກສາຫາລືກັນຕື່ມເນື່ອງຈາກວ່າສູນການຄ້າພວກເຮົາແມ່ນມີປະກັນໄພ ສ່ວນບັນດາສິນຄ້າຂອງຮ້ານຄ້າຕ່າງໆນັ້ນແມ່ນພວກເຮົາຈະບໍ່ທັນອະນຸຍາດໃຫ້ເອົາອອກເທື່ອ ສ່ວນສິນຄ້າທີ່ີຈະໃຫ້ນຳເອົາອອກແມ່ນສິນຄ້າທີ່ີຈະບູດເນົ່າ.
ທີ່ມາ: ໜັງສືພິມວຽງຈັນໃໝ່
