ທີ່ ແຂວງ ອຸດົມໄຊ, ສູນບໍລິການ ວິສາຫະກິດຂະໜາດນ້ອຍ ແລະ ກາງ, ສຄອ ແຫ່ງຊາດລາວ,
ພາຍໃຕ້ການສະໜັບສະໜູນຈາກໂຄງການ ເຮວວີຕັດ ສະວິດເພື່ອການຮ່ວມມືສາກົນ ປະຈຳ ສປປລາວ ໄດ້ຈັດກອງປະຊຸມປຶກສາຫາຫລືການສົ່ງເສີມວິສາຫະກິດຂະໜາດນ້ອຍ-ກາງ ຕໍ່ການສົ່ງອອກ ໂດຍການເປັນປະທານຂອງ ທ່ານ ສາ ສິລິພົງ ຮອງຫົວໜ້າກົມສົ່ງເສີມວິສາຫະກິດຂະໜາດນ້ອຍ ແລະ ກາງ, ກະຊວງ ອຸດສາຫະກຳ ແລະ ການຄ້າ ແລະ ທ່ານ ທອງອິນ ຄຳສົມປອງ ຮອງປະທານ ສຄອ ແຂວງ ອຸດົມໄຊ
ຈຸດປະສົງ ກອງປະຊຸມຄັ້ງນີ້ ແມ່ນເພື່ອນຳສະເໜີ ແລະ ສ້າງຄວາມເຂົ້າໃຈ, ກົນໄກການປະສານງານ, ນະໂຍບາຍ ການສົ່ງເສີມຂອງພາກລັດຂັ້ນສູນກາງ ແລະ ທ້ອງຖິ່ນ ໂດຍສະເພາະລະບຽບການ ຂັ້ນຕອນ ສົ່ງເສີມຕໍ່ການເອື້ອອຳນວຍຄວາມສະດວກ ທາງດ້ານການຄ້າ, ການລົງທຶນ ແລະ ການສົ່ງອອກໃຫ້ແກ່ ວິສາຫະກິດຂະໜາດນ້ອຍແລະ ກາງ ເພື່ອສົ່ງສິນຄ້າ ແລະ ສົ່ງເສີມວຽກງານການຄ້າຊາຍແດນ ທີ່ຕິດພັນກັບຂໍ້ສະດວກ, ຫຸຍ້ງຍາກ ແລະ ທິດທາງການແກ້ໄຂໃຫ້ແກ່ຜູ້ປະກອບການ ເພື່ອປະກອບສ່ວນໃນການພັດທະນາເສດຖະກິດ-ສັງຄົມ ເພື່ອແນ່ໃສ່ການສົ່ງເສີມການສ້າງລາຍຮັບໃຫ້ແກ່ລັດກໍ່ຄືພາກທຸລະກິດ ຕໍ່ການພັດທະນາແບບຢືນຍົງ ແລະ ມີສ່ວນຮ່ວມ. ໃນທີ່ກອງປະຊຸມມີພາກສ່ວນທີ່ເຂົ້າຮ່ວມໄດ້ແກ່ ສຄອ ແຂວງ ຜົ້ງສາລີ, ຫຼວງນ້ຳທາ ແລະ ແຂວງ ອຸດົມໄຊ ແລະ ຕ່າງໜ້າຈາກພາກທຸລະກິດ ແລະ ເອກະຊົນ ໄດ້ແກ່ ພະແນກ ກະສິກຳ – ປ່າໄມ້, ພະແນກການຄ້າ ແຂວງ ມີຜູ້ເຂົ້າຮ່ວມທັງໝົດ 55 ທ່ານ.
ທີ່ມາ: ສະພາການຄ້າ ແລະ ອຸດສາຫະກຳແຫ່ງຊາດລາວ
