ເພື່ອເປັນການຄຳນັບຮັບຕ້ອນວັນປູກຕົ້ນໄມ້ແຫ່ງຊາດ ວັນທີ 1 ມິຖຸນາ ທັງເປັນການປູກໄມ້ເພີ່ມເນື້ອທີ່ປ່າສີຂຽວ ໃນປີນີ້ ທາງເມືອງໄຊທານີ ນະຄອນຫຼວງວຽງຈັນ ໄດ້ມີແຜນປູກໄມ້ໃນເນື້ອທີ່ 100 ເຮັກຕາ.
ທ່ານ ທອງສຸກ ບົວລີຂັນ ຫົວໜ້າຫ້ອງການກະສິກຳປ່າໄມ້ ເມືອງໄຊທານີ ໄດ້ໃຫ້ສຳພາດວັນທີ 14 ພຶດສະພາ 2019 ວ່າ:
ເພື່ອເປັນການສະເຫຼີມສະຫຼອງວັນປູກຕົ້ນໄມ້ແຫ່ງຊາດ ທັງເປັນການເພີ່ມເນື້ອທີ່ປ່າປົກຫຸ້ມໃຫ້ມີເນື້ອທີ່ເພີ່ມຂຶ້ນ ເຊິ່ງໃນປີນີ້ ເມືອງໄຊທານີມີແຜນປູກໄມ້ໃນເນື້ອທີ່ 100 ເຮັກຕາ ນຳໃຊ້ເບ້ຍໄມ້ ຈຳນວນ 5 ແສນເບ້ຍ ປະກອບມີ ໄມ້ແຕ້ຂ່າ ໄມ້ຂະຍຸງ ໄມ້ດູ່ລາຍ ໄມ້ໃຫ້ໝາກ ແລະ ໄມ້ປະດັບອື່ນໆ,
ໃນນັ້ນ ອຳນາດການປົກຄອງເມືອງ ກໍຄື ຫ້ອງການກະສິກຳປ່າໄມ້ເມືອງ ສະໜອງເບ້ຍໄມ້ຈຳນວນ 200.000 ເບ້ຍ ສ່ວນທີ່ເຫຼືອແມ່ນໄດ້ມອບໃຫ້ຫ້ອງການອ້ອມຂ້າງເມືອງ ບ້ານ ກຸ່ມບ້ານ ປະຊາຊົນ ແລະ ພາກເອກະຊົນຮັບຜິດຊອບຕາມນະໂຍບາຍຂອງຂັ້ນເທິງ ຕ້ອງປະຕິບັດໃຫ້ໄດ້ຢ່າງໜ້ອຍປູກຄົນລະ 2 ເບ້ຍຕໍ່ຄົນຕໍ່ປີ .
ສຳລັບປີນີ້, ເມືອງໄຊທານີແມ່ນໄດ້ເລີ່ມປູກໄມ້ທົດແທນຈຳນວນໜຶ່ງແລ້ວ ໂດຍໄດ້ປູກຢູ່ຂອບທາງຖະໜົນ 450 ປີ ໄລຍະ 3 ກິໂລແມັດ ປະກອບມີ ໄມ້ຫຳງົວ ຕົ້ນແຄນ ຈຳນວນ 50 ຕົ້ນ ຕົ້ນຈຳປາ 200 ຕົ້ນ ແລະ ໄມ້ປະດັບອື່ນໆ ມູນຄ່າ 30 ລ້ານກີບ.
ແຕ່ການປູກຄັ້ງນີ້ກໍເຫັນວ່າຍັງບໍ່ພຽງພໍ ເຊິ່ງທາງເມືອງໄຊທານີຍັງມີຄວາມຕ້ອງການເບ້ຍດອກເຈ້ຍຈຳນວນຫຼາຍເພື່ອນຳມາປູກໃສ່ຂອບຄູກາງທາງ ຈິ່ງຮຽກຮ້ອງມາຍັງພາກສ່ວນຕ່າງໆນຳເອົາເບ້ຍດອກເຈ້ຍມາປະກອບສ່ວນປູກເພື່ອເປັນການປະດັບປະດາໃຫ້ຖະໜົນ 450 ປີ ມີຄວາມຈົບງາມ.
ສ່ວນກິດຈະກຳປູກໄມ້ສະເຫຼີມສະຫຼອງວັນປູກຕົ້ນໄມ້ແຫ່ງຊາດເປັນທາງການນັ້ນແມ່ນຈະໄດ້ຈັດໃນວັນທີ 31 ພຶດສະພາ 2019 ທີ່ແຫຼ່ງທ່ອງທ່ຽວຕາດຊອຍວອຍ ປູກໃນເນື້ອທີ່ 3 ເຮັກຕາ ສ່ວນເນື້ອທີ່ທີ່ເຫຼືອແມ່ນໄດ້ມອບໃຫ້ຫ້ອງການອ້ອມຂ້າງ ບ້ານ ກຸ່ມບ້ານ ປະຊາຊົນ ແລະ ພາກເອກະຊົນສືບຕໍ່ປູກໃຫ້ສຳເລັດ.
ເຊີ່ງປີນີ້ຄາດວ່າຈະສາມາດປູກໄດ້ຕາມເປົ້າໝາຍທີ່ວາງໄວ້ ເພາະມາເຖິງປັດຈຸບັນທາງຫ້ອງການກະສິກຳປ່າໄມ້ເມືອງໄດ້ລົງສົມທົບກັບອຳນາດການປົກຄອງບ້ານແຕ່ລະບ້ານ ໂດຍສະເພາະ ແມ່ນ 5 ກຸ່ມບ້ານເຂດນອກທີ່ຍັງມີເນື້ອທີ່ຫວ່າງສຳລັບປູກໄມ້ ໃຫ້ພ້ອມກັນປູກໃຫ້ສຳເລັດ ນອກຈາກນັ້ນ ຍັງໄດ້ສົມທົບກັບບໍລິສັດຮັບເໝົາກໍ່ສ້າງທາງດອນໜູນ ຫາ ທ່າງ່ອນ ປູກໄມ້ແຄນ ແລະ ໄມ້ອື່ນໆ.
ສ່ວນສະພາບການປູກໄມ້ໃນປີ 2018 ສາມາດປູກໄມ້ໄດ້ພຽງ 89% ຂອງເນື້ອທີ່ແຜນການ 100 ເຮັກຕາ ເຊິ່ງເກີດຈາກຫຼາຍສາເຫດ ໂດຍສະເພາະ ການຈັດສັນພື້ນທີ່ປູກບໍ່ສາມາດເຮັດໄດ້ 100% ໄປພ້ອມກັບການປຸກລະດົມປະຊາຊົນ ແລະ ພາກເອກະຊົນເຂົ້າຮ່ວມແມ່ນບໍ່ທັນມີຂະບວນທີ່ແຂງແຮງ.
ທີ່ມາ: ໜັງສືພິມວຽງຈັນໃໝ່
