ທ່ານທູດຝຣັ່ງຍັງໄດ້ຖືໂອກາດເດີນທາງມາຫຼວງພະບາງໃນຄັ້ງນີ້ ປະດັບຫຼຽນກາກຽດຕິຍົດຂອງຝຣັ່ງກໍ່ຄືຂອງກະຊວງວັດທະນະທຳຝຣັ່ງ ຂະແໜງສິນລະປະ ແລະ ອັກສອນສາດ ໃຫ້ແກ່ ດຣ. ນິດທະຄົງ ສົມສະນິດ ນັກສິນລະປະພື້ນເມືອງແຂວງຫຼວງພະບາງ.
ດຣ. ນິດທະຄົງ ສົມສະນິດ ໄດ້ຮັບການສິດສອນຖ່າຍທອດເຕັກນິກຕ່າງໆດ້ານສິນລະປະ ຈາກຄອບຄົວແຕ່ຕອນຍັງນ້ອຍ ເຊັ່ນ ການແຕ້ມຮູບ ແລະ ສິນລະປະປັກດິ້ງ.
ຕະຫຼອດຊີວິດຂອງ ດຣ. ນິດທະຄົງ ສົມສະນິດ, ທ່ານໄດ້ປົກປັກຮັກສາ ແລະ ພັດທະນາມໍລະດົກຫັດຖະກຳພື້ນເມືອງຫຼວງພະບາງດັ່ງກ່າວ ດ້ວຍການສ້າງສັນຜົນງານສິນລະປະປັກດິ້ງ ທີ່ມີການປະສົມປະສານລະຫວ່າງສິນລະປະແບບພື້ນເມືອງ ແລະ ທັນສະໄໝ.
ພາຍຫຼັງທີ່ໃຊ້ຊີວິດ ແລະ ສຶກສາຢູ່ປະເທດຝຣັ່ງ ເປັນໄລຍະເວລາ 20 ກວ່າປີ, ດຣ. ນິດທະຄົງ ສົມສະນິດ ໄດ້ຕັດສິນໃຈກັບຄືນມາປະເທດລາວໃນປີ 2002. ການສະແດງຜົນງານດ້ານສິນລະປະຊຶ່ງເປັນມໍລະດົກຂອງປະເທດລາວກໍ່ຄືຫຼວງພະບາງ ໄດ້ເຮັດໃຫ້ທ່ານກາຍເປັນນັກສິນລະປະທີ່ມີຊື່ສຽງໃນທົ່ວໂລກ ໂດຍສະເພາະໃນອາຊີ ຊຶ່ງທ່ານໄດ້ຮັບລາງວັນນັກສິນລະປະຫັດຖະກຳທີ່ດີທີ່ສຸດຂອງອາຊຽນ ຈາກ ມູນນີທິ SACSIT ໃນປີ 2016. ໃນປະຈຸບັນ, ດຣ. ນິດທະຄົງ ສົມສະນິດ ກໍ່ຍັງສືບຕໍ່ສົ່ງເສີມ ແລະ ຖ່າຍທອດສິນລະປະພື້ນເມືອງລາວ ໃຫ້ແກ່ຊາວໜຸ່ມຮຸ່ນໃໝ່.
ໃນປະຈຸບັນນີ້ ດຣ ນິທະຄົງ ສົມສະນິດ ເປັນຜູ້ຊ່ຽວຊານ ທີ່ເກັ່ງທີສຸດໃນປະເທດລາວໃນເລື່ອງການປັກດິ້ງ ກໍ່ວ່າໄດ້ ເພາະເພິ່ນສາມາດປັກແບບບໍ່ມີແຜນວາດ ປັກອອກມາຈາກໃຈເລີຍ..ສົມແລ້ວ ທີໄດ້ຫລຽນແຫ່ງກຽດຕິຍົດນີ້ .
ທີ່ມາ: ຂ່າວຫຼວງພະບາງ