ເຈົ້າໜ້າທີ່ທະຫານຊາຍແດນ 324 ທີ່ຂື້ນກັບກອງບັນຊາການທະຫານແຂວງສະຫວັນນະເຂດ ໄດ້ອອກກວດກາລາດຕະເວນຕາມຂອບເຂດຄວາມຮັບພິຊອບຂອງຕົນເຊິ່ງນຳໂດຍ ສະຫາຍ ຮ້ອຍໂທ ຄອນພະວັນ ສຸກມາວັນ ຫົວໜ້າໜູ່ ພ້ອມດ້ວຍອ້າຍນ້ອງ 3 ສະຫາຍ.
ພໍຮອດເວລາ 5 : 30 ນາທີໄດ້ເຫັນເຮືອຈັກຂະໜາດໃຫ່ຍ 1 ລຳ ຄວາມແຮງ 4 ສູບ,ທີ່ແລ່ນລຽບຕາມລຳນຳ້ຂອງມາຈາກຕອນໃຕ້ ທີ່ບັນທຸກໄມ້ຜິດກົດໝາຍເຕັມລຳເຮືອ.
ເມື່ອເຫັນດັ່ງນັ້ນທາງເຈົ້າໜ້າທີ່ຈິ່ງໄດ້ເຂົ້າກັກເຮືອຈັກລຳດັ່ງກ່າວຈິ່ງໄດ້ພົບວ່າ ໄມ້ທີ່ບັນຈຸຢູ່ໃນເຮືອແມ່ນໄມ້ຂະຍຸງມີຈຳນວນ 195 ທອ່ນ.
ສ່ວນເຈົ້າຂອງຜູ້ຂັບເຮືອແມ່ນຫຼົບໜີໄປໄດ້ ດັ່ງນັ້ນທາງເຈົ້າໜ້າທີ່ທະຫານຊາຍແດນ 324 ຈິ່ງໄດ້ລາຍງານຫາຄະນະພັກ – ຄະນະບັນຊາກົມກອງຈາກນັ້ນຈິ່ງລາຍງານເຖິງຄະນະພັກ – ຄະນະບັນຊາກອງບັນຊາການທະຫານແຂວງສະຫວັນະເຂດ,ເພື່ອລົງກວດກາຕົວຈິງ.
ສະຫາຍ ພັນເອກ ຂັນທະລີ ທາທິລາດ ຮອງເລຂາຄະນະພັກ ຫົວໜ້າການທະຫານກອງບັນຊາການທະຫານແຂວງ ພ້ອມດ້ວຍພະແນກການທີ່ກ່ຽວຂ້ອງ ຈິ່ງໄດ້ລົງກວດກາເບິ່ງຕົວຈິງ,ແລະເຫັນວ່າເປັນມູນຄວາມຈິງແທ້.
ດັ່ງນັ້ນ ທາງເຈົ້າໜ້າທີ່ກອງບັນຊາການທະຫານແຂວງສະຫວັນະເຂດ,ຈິ່ງໄດ້ເຮັດບົດບັນທຶກໃນການຢືດໄມ້ໃນຄັ້ງນີ້ໄວ້ເປັນຫຼັກຖານ ແລະ ສະເໜີຂັ້ນເທີງເພື່ອແກ້ໄຂຕໍ່ໄປ.
ທີ່ມາ:
ວິທະຍຸກະຈາຍສຽງ ສະຫວັນນະເຂດ
