ສູນອົບຮົມແມ່ຍິງລາວ ໄດ້ຈັດຊຸດຝຶກອົບຮົມວິຊາຊີບການປຸງແຕ່ງອາຫານ, ຕັດຫຍິບ ແລະ ເສີມສວຍໃຫ້ສຳລັບແມ່ຍິງ ຜູ້ດ້ອຍໂອກາດ ຈຳນວນ 50 ຄົນ ໃນຂອບເຂດທົ່ວປະເທດ ແຕ່ວັນທີ 22 ພຶດສະພາ ຫາ 15 ສິງຫາ 2019 ເພື່ອໃສ່ສົ່ງເສີມ ການມີວຽກເຮັດ ງານທຳ ໃຫ້ແມ່ຍິງລາວ, ເຊິ່ງໄດ້ຮັບ ການສະໜັບສະໜູນ ຈາກກະຊວງ ສະເໝີພາບບົດບາດຍິງ-ຊາຍ ແລະ ຄອບຄົວ ສ.ເກົາຫລີ.
ທ່ານ ນາງ ສິລິກິດ ບຸບຜາ ຮອງປະທານ ຄະນະບໍລິຫານງານ ສູນກາງ ສະຫະພັນແມ່ຍິງລາວ ກ່າວໃນງານ ເປີດຊຸດຝຶກອົບ ຮົມຄັ້ງນີ້ວ່າ:
ຊຸດຝຶກອົບຮົມໃນຄັ້ງນີ້, ແມ່ນສ້າງຄວາມສາມາດ ດ້ານວິຊາຊີບ ໃຫ້ເອື້ອຍນ້ອງແມ່ຍິງ ເພື່ອຊ່ວຍໃຫ້ແມ່ຍິງລາວ ມີອາຊີບທີ່ໝັ້ນຄົງ, ສາມາດສ້າງລາຍຮັບໃຫ້ຕົນເອງ ແລະ ຄອບຄົວ, ເຮັດໃຫ້ມີຊີວິດການເປັນຢູ່ດີຂຶ້ນ ທັງເປັນການຍົກລະດັບດ້ານສີມືແຮງງານ ໃຫ້ໄດ້ຮັບການພັດທະນາ, ມີຄວາມສາມາດສົ່ງລູກຫລານເຂົ້າຮຽນ, ປະກອບສ່ວນສ້າງສາ ແລະ ພັດທະນາປະເທດຊາດ.
ນອກຈາກສ້າງອາຊີບທີ່ໝັ້ນຄົງ ໃຫ້ເອື້ອຍນ້ອງແມ່ຍິງແລ້ວ ຍັງຊ່ວຍໃຫ້ແມ່ຍິງ ບໍ່ຖືກຕົວະຍົວະຫລອກລວງ ຈາກກຸ່ມຄົນທີ່ບໍ່ຫວັງດີ ເປັນຕົ້ນແມ່ນການເຄື່ອນຍາຍແຮງງານ ຫລື ການຄ້າມະນຸດ ແລະ ອື່ນໆ.
ການຝຶກອົບຮົມໃນຄັ້ງນີ້, ປະກອບມີ 3 ຂະແໜງວິຊາຊີບ ຄື:
ວິຊາຊີບ ການປຸງ ແຕ່ງອາຫານ, ການຕັດຫຍິບ ແລະ ເສີມສວຍ, ເຊິ່ງແຕ່ລະຂະແໜງມີບາງວິຊາ ທີ່ຈະຕ້ອງໄດ້ຮຽນຮ່ວມກັນ, ສ່ວນວິຊາສະເພາະ ແມ່ນຈະໄດ້ລົງເລີກໄປຕາມແຕ່ລະຂະແໜງຂອງຕົນ ເຊັ່ນ: ວິຊາປຸງແຕ່ງອາຫານ ແມ່ນຈະໄດ້ລົງຝຶກງານຕົວຈິງ ຢູ່ບັນດາໂຮງແຮມຕ່າງໆ, ວິຊາຕັດຫຍິບຈະໄດ້ລົງຝຶກງານຕາມຮ້ານ ຕັດຫຍິບຕ່າງໆ ແລະ ສຳລັບວິຊາເສີມສວຍຈະໄດ້ລົງຝຶກງານຕາມບ້ານ ແລະ ໂຮງຮຽນ.
ທີ່ມາ: ສຳນັກຂ່າວສານປະເທດລາວ