ທີ່ເມືອງອາເຫຼືອຍ ແຂວງເທື່ອທຽນເຫວ້ ສສ ຫວຽດນາມ ກະຊວງວັດທະນະທຳ ກີລາ ແລະ ທ່ອງທ່ຽວ ຄະນະພັກແຂວງ ຄະນະກຳມະການປະຊາຊົນແຂວງເທື່ອທຽນເຫວ້ ໄດ້ປະສານສົມທົບກັບບັນດາກະຊວງ ຄະນະກຳມະການ ຂະແໜງການຂັ້ນສູນກາງຄະນະກຳມະການປະຊາຊົນ ບັນດາແຂວງທີ່ມີຊາຍແດນຮ່ວມລາວ-ຫວຽດນາມ ເຂດພາກກາງ-ໄຕຫງວຽນ ຈັດງານພົບປະແລກປ່ຽນວັດທະນະທຳ ກີລາ ແລະ ທ່ອງທ່ຽວ ບັນດາເຜົ່າຕາມເຂດຊາຍແດນລະຫວ່າງລາວ ແລະ ຫວຽດນາມ.
ງານພົບປະແລກປ່ຽນວັດທະນະທຳ ກີລາ ແລະ ທ່ອງທ່ຽວ ຄັ້ງນີ້ ມີນັກສິລະປິນທີ່ມາຈາກລາວ ປະກອບມີກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ແຂວງສະຫວັນນະເຂດ ສາລະວັນ ອັດຕະປື ແລະ ເຊກອງ ແລະ 5 ແຂວງພາກກາງຫວຽດນາມຄື:
ແຂວງກວາງນາມ ກວາງຫງາຍ ກອນຕູມ ກວາງຈິ ແລະ ແຂວງເທື່ອທຽນເຫວ້ ເຂົ້າຮ່ວມ 500 ກວ່າຄົນ ແລະ 32 ລາຍການສະແດງທີ່ເປັນເອກະລັກຂອງແຕ່ລະເຜົ່າ ແລະ ຄວາມສາມັກຄີລະຫວ່າງລາວ-ຫວຽດນາມ.
ທ່ານ ບົວເງິນ ຊາພູວົງ ຮອງລັດຖະມົນຕີກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ກ່າວວ່າ:
ຄວາມສາມັກຄີທີ່ເປັນມູນເຊື້ອຄວາມສຳພັນແບບພິເສດ ແລະ ການຮ່ວມມືຮອບດ້ານລະຫວ່າງລາວ-ຫວຽດນາມ ແມ່ນຄວາມສຳພັນໜຶ່ງບໍ່ມີສອງຢູ່ໃນໂລກ ເຊິ່ງປະທານ ໂຮ່ຈີມິງ ປະທານ ໄກສອນ ພົມວິຫານ ປະທານ ສຸພານຸວົງ ທີ່ເຄົາລົບຮັກໄດ້ສ້າງຕັ້ງ ເພີ່ມພູນຄູນສ້າງ ພ້ອມກັບບັນດາການນຳຮຸ່ນຕໍ່ມາ ແລະ ປະຊາຊົນສອງຊາດລາວ-ຫວຽດນາມ ໄດ້ຄຽງບ່າຄຽງໄຫຼ່ກັນຕໍ່ສູ້ຕ້ານສັດຕູຜູ້ຮຸກຮານ ແລະ ພ້ອມກັນປົກປັກຮັກສາ ແລະ ສ້າງສາປະເທດຊາດໃຫ້ຈະເລີນສີວິໄລ.
ທ່ານນາງ ຈິ້ງຖິຖຸຍ ຮອງລັດຖະມົນຕີ ກະຊວງວັດທະນະທຳ ກີລາ ແລະ ທ່ອງທ່ຽວ ຫວຽດນາມ ກ່າວວ່າ:
ງານພົບປະແລກປ່ຽນວັດທະນະທຳ ກີລາ ແລະ ທ່ອງທ່ຽວ ບັນດາເຜົ່າຂອງບັນດາແຂວງເຂດຊາຍແດນຫວຽດນາມ-ລາວ ໃນເຂດພາກກາງ-ໄຕຫງວຽນ ແມ່ນກິດຈະກຳທາງດ້ານວັດທະນະທຳ ກີລາ ແລະ ທ່ອງທ່ຽວ ເພື່ອເປັນການຍົກສູງນຳສະເໜີເຜີຍແຜ່ຄຸນຄ່າ ມູນເຊື້ອວັດທະນະທຳທີ່ເປັນເອກະລັກຂອງປະຊາຊົນບັນດາເຜົ່າ ພ້ອມກັນນັ້ນ ກໍເປັນການເພີ່ມທະວີຄວາມສາມັກຄີ ມິດຕະພາບ ຄວາມຮ່ວມມື ແລະ ແລກປ່ຽນວັດທະນະທຳລະຫວ່າງບັນດາແຂວງເຂດຊາຍແດນຂອງສອງປະເທດຫວຽດນາມ-ລາວ ໃນໄລຍະແຫ່ງການຮ່ວມມື ແລະ ພັດທະນາ ເຊິ່ງງານຄັ້ງນີ້ເຕັມໄປດ້ວຍນ້ຳໃຈມິດຕະພາບອັນດູດດື່ມ ລະຫວ່າງປະຊາຊົນສອງຊາດລາວ-ຫວຽດນາມ ເວົ້າລວມ ເວົ້າສະເພາະ ປະຊາຊົນຕາມເຂດຊາຍແດນພາກກາງ-ໄຕຫງວຽນ.
ແຫຼ່ງຂໍ້ມູນ: ສຳນັກຂ່າວສານປະເທດລາວ
Hits: 1
