ທີ່ຫ້ອງວ່າການປົກຄອງນະຄອນຫຼວງວຽງຈັນ (ນວ) ຄະນະປະຈຳສະພາແຫ່ງຊາດ ນຳໂດຍທ່ານ ວິໄລວົງ ບຸດດາຄຳ ປະທານກຳມາທິການແຜນການ ການເງິນ ແລະ ສິ່ງແວດລ້ອມ ສະພາແຫ່ງຊາດ ໄດ້ລົງເຄື່ອນໄຫວຕິດຕາມກວດກາການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມຂອງ ນວ ມີທ່ານ ອາດສະພັງທອງ ສີພັນດອນ ຮອງເຈົ້າຄອງ ນວ ທ່ານນາງ ຄຳຟອງ ພູມວົງໄຊ ຮອງປະທານສະພາປະຊາຊົນ ນວ ແລະ ພາກສ່ວນກ່ຽວຂ້ອງເຂົ້າຮ່ວມ.
ຈຸດປະສົງ ເພື່ອຮັບຟັງລາຍງານສະພາບການຈັດຕັ້ງປະຕິບັດກົດໝາຍ ແລະ ບັນດານິຕິກຳລຸ່ມກົດໝາຍ ທີ່ຕິດພັນກັບການຈັດເກັບລາຍຮັບຂອງບັນດາຂະແໜງການໃນ ນວ ແລະ ເປັນການເກັບກຳຂໍ້ມູນໃຫ້ຄະນະປະຈຳ ສພຊ ໃນການຄົ້ນຄວ້າພິຈາລະນາເນື້ອໃນເອກະສານສຳຄັນຂອງລັດຖະບານ ທີ່ຈະນຳເຂົ້າພິຈາລະນາໃນກອງປະຊຸມສະໄໝສາມັນເທື່ອທີ 7 ຂອງ ສພຊ ພ້ອມທັງເປັນການປະຕິບັດຕາມມາດຕາ 15 ຂອງກົດໝາຍວ່າດ້ວຍການຕິດຕາມກວດກາແຕ່ລະຂະແໜງການຂອງ ສພຊ ໃຫ້ປາກົດຜົນເປັນຈິງ.
ການລົງເຄື່ອນໄຫວຄັ້ງນີ້ ຄະນະໄດ້ຮັບຟັງລາຍງານການຈັດຕັ້ງປະຕິບັດ ວຽກງານຈາກຂະແໜງການກ່ຽວຂ້ອງຕ່າງໆຂອງ ນວ ເປັນຕົ້ນ ຂະແໜງການເງິນ ພະລັງງານ ແລະ ບໍ່ແຮ່ ໂຍທາທິການ ແລະ ຂົນສົ່ງ ອຸດສາຫະກຳ ແລະ ການຄ້າ ຊັບພະຍາກອນທຳມະຊາດ ແລະ ສິ່ງແວດລ້ອມ ສະເພາະໃນດ້ານຂະແໜງຊັບພະຍາກອນໄລຍະຜ່ານມາ ການຈັດຕັ້ງປະຕິບັດ ການຈັດເກັບລາຍຮັບເຂົ້າງົບປະມານ ໄດ້ປະຕິບັດຕາມກົດໝາຍວ່າດ້ວຍທີ່ດິນມາດຕາ 60 ທີ່ໄດ້ກຳນົດໃນຂໍ້ 5 ວ່າດ້ວຍການເສຍຄ່າທຳນຽມກ່ຽວກັບທີ່ດິນ ແລະ ຂໍ້ 6 ວ່າດ້ວຍການປະຕິບັດພັນທະທີ່ດິນເຊັ່ນ:
ພາສີທີ່ດິນ ອາກອນຈາກການມອບໂອນ ອາກອນລາຍໄດ້ຈາກການໃຫ້ເຊົ່າ ອາກອນສືບມູນມໍລະດົກ ຄ່າທຳ ນຽມໂອນຊື່ ຄ່າຈົດທະບຽນນິຕິກຳທີ່ດິນຕາມກຳນົດເວລາສຳລັບຜູ້ທີ່ນຳໃຊ້ທີ່ດິນ ແລະ ອື່ນໆ ສ່ວນຂະແໜງພະລັງງານ ແລະ ບໍ່ແຮ່ ກົນໄກການເກັບລາຍຮັບການປະຕິບັດ ໄດ້ອີງໃສ່ລັດຖະບັນຍັດວ່າດ້ວຍຄ່າທຳນຽມ ແລະ ຄ່າບໍລິການ ເລກທີ 003/ປປທ (ສະບັບປັບປຸງ) ໝວດທີ III ຂອງຂະແໜງພະລັງງານ ແລະ ບໍ່ແຮ່ ເຊິ່ງຜ່ານມາແຕ່ລະຂັ້ນ ໄດ້ປະຕິບັດຕາມຂໍ້ກຳນົດຂອງຂັ້ນເທິງວາງອອກຢ່າງເຂັ້ມງວດ ເພື່ອປະຕິບັດແຜນການເກັບລາຍຮັບໃຫ້ບັນລຸຕາມແຜນການທີ່ວາງໄວ້.
ແຫຼ່ງຂໍ້ມູນ: ໜັງສືພິມວຽງຈັນໃໝ່
