ກອງປະຊຸມສອງຝ່າຍປະຈໍາປີລະຫວ່າງທ່ານ ບຸນຈັນ ສິນທະວົງ ລັດຖະມົນຕີກະຊວງໂຍທາທິການ ແລະ ຂົນສົົ່ງແຫ່ງ ສປປ ລາວ ແລະ ທ່ານ ອາຄົມ ເຕີມພິດທະຍາໄພສິດ ລັດຖະມົນຕີວ່າການກະຊວງຄົມມະນາຄົມແຫ່ງຣາ ຊະອານາຈັກໄທ ໄດ້ມີຂຶ້ນເມື່ອບໍ່ດົນມານີ້ ທີ່ຈັງຫວັດໜອງຄາຍຣາຊະອານາຈັກໄທ.
ເພື່ອທົບທວນຄືນການປະຕິບັດວຽກງານການເຊື່ອມໂຍງດ້ານຄົມມະນາຄົມຂົນສົົ່ງ ທີ່ເປັນພື້ນຖານສໍາຄັນຂອງການພັດທະນາເສດຖະກິດ-ການຄ້າຂອງສອງປະເທດ, ໂດຍສະເພາະດ້ານພື້ນຖານໂຄງລ່າງຄົມມານາຄົມໃຫ້ກວ້າງຂວາງກວ່າເກົ່າຄື:
ການເຊື່ອມໂຍງຜ່ານຂົວມິດຕະພາບລາວ-ໄທ ໂດຍສອງຝ່າຍໄດ້ສໍາເລັດຮ່າງຂໍ້ຕົກລົງຈະສ້າງຂົວມິດຕະພາບແຫ່ງທີ 5 ຈຸດແຂວງບໍລິຄຳໄຊ-ຈັງຫວັດບຶງການ.
ເຊິ່ງຄາດວ່າຈະໄດ້ເຊັນສັນຍາຂໍ້ຕົກລົງດັ່ງກ່າວໃນເດືອນມິຖຸນາ 2019 ນີ້, ພ້ອມທັງຊຸກຍູ້ໃຫ້ມີການກໍ່ສ້າງຂົວມິດຕະພາບແຫ່ງທີ 6 ຈຸດແຂວງສາລະວັນ-ຈັງຫວັດອຸບົນຣາຊະທານີ, ເຊິ່ງໄດ້ສໍາເລັດການສຶກສາທາງດ້ານເສດ ຖະກິດ-ສັງຄົມ ແລະ ການສໍາຫລວດ-ອອກແບບລະອຽດແລ້ວ.
ນອກນັ້ນ, ສອງຝ່າຍໄດ້ເປັນເອກະພາບກັນໃນການສ້ອມແປງບໍາລຸງຮັກສາຂົວມິດຕະພາບແຫ່ງທີ 3 ແຂວງຄໍາມ່ວນ-ຈັງຫວັດນະຄອນພະນົມ ແລະ ຂົວມິດຕະພາບແຫ່ງທີ 4 ແຂວງບໍ່ແກ້ວ-ຈັງຫວັດຊຽງລາຍ, ພ້ອມທັງເພີ່ມມາດຕະການຄວບຄຸມນໍ້າໜັກຂອງລົດບັນທຸກຜ່ານຂົວຕາມຈຸດຕ່າງໆໃຫ້ລະອຽດຕື່ມອີກ.
ສໍາລັບການເຊື່ອມໂຍງທາງລົດໄຟລາວ-ໄທ ສອງຝ່າຍຈະຮ່ວມມືກັນສ້າງຂົວຂ້າມນໍ້າຂອງສະເພາະທາງລົດໄຟຈຸດນະຄອນຫລວງວຽງຈັນ-ຈັງຫວັດໜອງຄາຍ ແລະ ຈະກໍ່ສ້າງເສັ້ນທາງລົດໄຟນະຄອນຫລວງວຽງຈັນ-ຈັງຫວັດໜອງຄາຍໄລຍະສອງ ທີ່ມີຄວາມຍາວ 7,5 ກິໂລແມັດ ເຊິ່ງຄາດວ່າຈະໄດ້ລົງມືກໍ່ສ້າງໃນທ້າຍປີ 2019.
ສອງຝ່າຍໄດ້ປຶກສາຫາລືກ່ຽວກັບຄວາມເປັນໄປໄດ້ ການສ້າງທາງລົດໄຟເຊື່ອມຕໍ່ລະຫວ່າງແຂວງຈໍາປາສັກ-ຈັງຫວັດອຸບົນຣາດຊະທານີ ແລະ ລະຫວ່າງແຂວງຄໍາມ່ວນ-ຈັງຫວັດນະຄອນພະນົມ. ສໍາລັບການຮ່ວມມືດ້ານການຂົນສົົ່ງທາງລົດສອງຝ່າຍເຫັນດີປະຕິບັດການກວດກາຜ່ານແດນຮ່ວມກັນຢູ່ດ່ານສາກົນແຂວງສະຫວັນນະເຂດ-ຈັງຫວັດມຸກດາຫານ ແລະ ສົົ່ງເສີມໃຫ້ມີການບໍລິການໂດຍສານຜ່ານແດນລະຫວ່າງສາມປະເທດລາວ-ໄທ-ຫວຽດນາມ.
ນອກນີ້ຈະຊຸກຍູ້ໃຫ້ມີການກໍ່ສ້າງຍົກລະດັບທາງເລກ 11 ແຕ່ຂົວນໍ້າສັງ-ບ້ານໂນນສະຫວັນ-ບ້ານໂຄກເຂົ້າດໍ,ອີກຈຸດໜຶ່ງແມ່ນແຕ່ຊະນະຄາມ-ບ້ານໂນນສະຫວັນ ແລະ ທາງເລກ 12 ແຕ່ທ່າແຂກ-ດ່ານນາເພົ້າຊາຍແດນລາວ-ຫວຽດນາມຢູ່ແຂວງຄໍາມ່ວນ, ພ້ອມທັງປືກສາຫາລືການຮ່ວມມືພັດທະນາຊັບພະຍາກອນມະນຸດ ແລະ ວຽກງານອື່ນໆອີກ.
ແຫຼ່ງຂໍ້ມູນ: ໜັງສືພິມລາວພັດທະນາ