ເມື່ອບໍ່ດົນມານີ້, ສານປະຊາຊົນນະຄອນຫລວງວຽງຈັນ ໄດ້ຕັດສິນລົງໂທດ ທ້າວ ຮຸດສຸວັນ ອາຍຸ 33 ປີສັນຊາດກໍາປູເຈຍ ປະທານບໍລິສັດ ເອຊຽນເຟສ ໃຫ້ຈໍາຄຸກ 15 ປີພ້ອມປັບໃໝ 423.000 ໂດລາສະຫະລັດກັບ 10 ລ້ານກີບ ແລະ ຢຶດຊັບສີນສ່ວນຕົວ ແລະ ຂອງບໍລິສັດທັງໝົດ.
ເພື່ອປະກາດຂາຍນໍາເງິນມາໄຊ້ແທນໃຫ້ກັບໂຈດທາງແພ່ງ, ຕັດສີນລົງໂທດທ້າວ ສົມຊາຍ ອາຍຸ 26 ປີ ພະນັກ ງານບໍລິສັດ ຢູ່ບ້ານຫ້ວຍນໍ້າເຢັນເມືອງນາຊາຍທອງ ໃຫ້ຈໍາຄຸກ 2 ປີ ພ້ອມປັບໃໝ 5 ລ້ານກີບ, ຕັດສີນລົງໂທດທ້າວ ສຸລິວັນ ອາຍຸ 63 ປີທີ່ປຶກສາບໍລິສັດໃຫ້ຈໍາຄຸກ 2 ປີກັບ 2 ເດືອນ ພ້ອມປັບໃໝ 2 ລ້ານກີບ, ຕັດສິນລົງ ໂທດນາງ ເພັດສະຫວັນ ໃຫ້ຈໍາຄຸກ 2 ປີພ້ອມປັບໃໝ 5 ແສນກີບແຕ່ໃຫ້ຝາກໂທດໄວ້, ໂດຍທັງໝົດມີຄວາມຜິດໃນສະຖານສໍ້ໂກງຊັບພົນລະເມືອງ ແລະ ປັດຈຸບັນ, ຍັງມີພັກພວກຄົນກໍາປູເຈຍຈໍານວນໜຶ່ງທີ່ຮ່ວມຂະບວນການໄດ້ຫລົບໜີອອກນອກປະເທດແລ້ວ.
ບໍລິສັດ ເອຊຽນເຟສ ໄດ້ສ້າງຕັ້ງຂຶ້ນໃນປີ 2015 ເຄື່ອນໄຫວກ່ຽວກັບການຄ້າຂາຍກໍາມະສິດພາຫະນະ, ທີ່ດິນ ແລະ ເຮືອນ, ດ້ວຍການລະດົມໃຫ້ປະຊາຊົນໄປຮ່ວມລົງທຶນຈະໄດ້ຮັບດອກເບ້ຍສູງ, ໂດຍມີປະຊາຊົນໄປຮ່ວມລົງທຶນເປັນຈໍານວນຫລາຍຕົກເປັນມູນຄ່າກວ່າ 14 ລ້ານກວ່າໂດລາສະຫະລັດ.
ເມື່ອເປັນດັ່ງນັ້ນ ທະນາຄານແຫ່ງ ສປປ ລາວ ໄດ້ສັ່ງໃຫ້ຢຸດການເຄື່ອນໄຫວດັ່ງກ່າວ ແລະ ຖອນໃບທະບຽນວິສາຫາກິດ, ພ້ອມທັງໃຫ້ສົ່ງເງິນຄືນປະຊາຊົນ, ແຕ່ສຸດທ້າຍບໍມີເງິນຈ່າຍຈຶ່ງຖືກດໍາເນີນຄະດີຕາມລະບຽບກົດໝາຍດັ່ງກ່າວ.
ແຫຼ່ງຂໍ້ມູນ: ໜັງສືພິມຄວາມສະຫງົບ