ທ່ານນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງສຶກສາທິການ ແລະ ກິລາ ໄດ້ຕ້ອນຮັບການເຂົ້າຢ້ຽມພົບປະຂອງທ່ານ ຫງວຽນ ວັນຟຸກ ຮອງລັດຖະມົນຕີກະຊວງສຶກສາທິການ ແລະ ກໍ່ສ້າງ ສສ ຫວຽດນາມ, ເພື່ອຫາລື ແຜນການຮ່ວມມືຍົກສູງຄຸນນະພາບການສຶກສາລະຫວ່າງລາວ-ຫວຽດນາມ ໃຫ້ນັບມື້ດີຂຶ້ນ.
ໃນໂອກາດດັ່ງກ່າວ, ສອງຝ່າຍ ໄດ້ຫາລືແຜນຮ່ວມມື ຈັດງານວາງສະແດງຜົນງານການສຶກສາລະຫວ່າງ 2 ປະ ເທດ, ເປັນຕົ້ນແມ່ນ ການຈັດສໍາມະນາບັນຫາຕ່າງໆ ເພື່ອແນໃສ່ປັບປຸງຄຸນນະພາບການສຶກສາ ໂດຍສະເພາະ ການສ້າງບຸກຄະລາກອນຂອງລາວ ຢູ່ຫວຽດນາມ ແລະ ການສ້າງພະນັກງານ, ນັກສຶກສາຫວຽດນາມ ຢູ່ລາວ, ເຊິ່ງງານດັ່ງກ່າວຈະໄດ້ຈັດຂຶ້ນຢູ່ມະຫາວິທະຍາໄລແຫ່ງຊາດ.
ພ້ອມທັງ ທົບທວນຄືນການຮ່ວມມືໃນໄລຍະຜ່ານມາ ແລະ ແລກປ່ຽນກ່ຽວກັບໂຄງການຍົກສູງຄຸນນະພາບການສຶກສາລະຫວ່າງລາວ-ຫວຽດນາມ ທີ່ໄດ້ມີການວາງແຜນນໍາກັນມາແລ້ວແຕ່ປີ 2011-2020 ແລະ ໃນທ້າຍປິ 2019 ນີ້ ຈະໄດ້ສະເໜີໃຫ້ແຕ່ລະມະຫາວິທະຍາໄລແຕ່ງຕັ້ງອະນຸກໍາມະການຂອງຕົນ ເພື່ອສະຫຼຸບຖອດຖອນບົດ ຮຽນສິ່ງທີ່ເຮັດໄດ້ດີ, ສິ່ງທີ່ຍັງຄົງຄ້າງ, ທີ່ຈະຕ້ອງໄດ້ປັບປຸງແກ້ໄຂ ເພື່ອວາງແຜນຮ່ວມມືໃນໄລຍະ 2021-2030 ໃຫ້ມີປະສິດທິຜົນສູງຂຶ້ນ.
ໃນໂອກາດນີ້, ທ່ານນາງ ແສງເດືອນ ຫຼ້າຈັນທະບູນ ກໍໄດ້ ສະແດງຄວາມຊົມເຊີຍທີ່ຄະນະດັ່ງກ່າວ ຈະຈັດງານວາງສະແດງຢູ່ ມຊ , ພ້ອມທັງສະແດງຄວາມຂອບໃຈ ຕໍ່ລັດຖະບານ ຫວຽດນາມ ທີ່ໄດ້ໃຫ້ການຊ່ວຍເຫຼືອຮ່ວມ ມືທີ່ດີໃນການ ສ້າງຊັບພະຍາກອນຊ່ວຍລາວ ໃນແຕ່ລະປີ ແລະ ເຫັນພ້ອມທີ່ທັງສອງຝ່າຍຈະສືບຕໍ່ເພີ່ມທະວີການຍົກສູງ ຄຸນນະພາບການສຶກສາຂອງຕົນໃຫ້ ມີບາດກ້າວຂະຫຍາຍຕົວດີຂຶ້ນກວ່າເກົ່າ.
ແຫຼ່ງຂໍ້ມູນ: ໜັງສືພິມລາວພັດທະນາ