ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ແຫ່ງ ສປປ ລາວ ຮ່ວມກັບກະ ຊວງວັດທະນະທຳ ແຫ່ງ ຣາຊະອານາຈັກໄທ ສາຍຮູບເງົາແອນິເມຊັນ “ຣາມມະກຽນ ຈາກຈິດຕະກຳ ຣອບພຣະຣະບຽງພຣະອຸໂບ ສົດວັດພຣະສີຣັດຕະນະສາດດາຣາມ ຕອນຣາມາວະຕາຣ“.
ເນື່ອງໃນໂອກາດສະເຫຼີມສະຫຼອງ ປີແລກປ່ຽນວັດທະນະທຳອາຊຽນ-ໄທ, ເມື່ອວັນທີ 29 ພຶດສະພາ ຜ່ານມານີ້ ທີ່ຫໍວັດທະນະທຳແຫ່ງຊາດ ນະຄອນຫຼວງວຽງຈັນ ໂດຍໃຫ້ກຽດເຂົ້າຮ່ວມຂອງທ່ານ ບໍ່ແສງຄຳ ວົງດາລາ ລັດຖະ ມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ທ່ານ ວີຣະ ໂຣດພະຈົນຣັດ ລັດຖະມົນຕີວ່າການກະ ຊວງວັດທະນະທຳ ແຫ່ງຣາຊະນາອາຈັກໄທ ບັນດາທູຕານຸທູດ, ອົງການຈັດຕັ້ງສາກົນປະຈຳລາວ, ແຂກຖືກເຊີນ ແລະ ມວນຊົນເຂົ້າຮ່ວມຊົມຢ່າງຫຼວງຫຼາຍ.
ທ່ານ ກຽດຕິຄຸນ ຊາດປະເສີດ ເອກອັກຄະລາຊະທູດໄທປະຈຳລາວ ກ່າວວ່າ: ກະຊວງວັດທະນະທຳ ແຫ່ງຣາຊະ ອານາຈັກໄທ ສາຍຮູບເງົາແອນິເມຊັນ “ຣາມມະກຽນ ຈາກຈິດຕະກຳຣອບພຣະຣະບຽງພຣະອຸໂບສົດວັດພຣະສີຣັດຕະນະສາດດາຣາມ ຕອນຣາມາວະຕາຣ” ທີ່ກ່າວເຖິງການອາວະຕາຣຂອງພຣະນະລາຍເປັນພຣະລາມ ເພື່ອປາບທົດສະກັນ ຊຶ່ງເປັນສື່ນະວັດຕະກຳຮູບແບບໃໝ່ທີ່ໄດ້ນຳພາບຕົວລະຄອນຈາກຈິດຕະກຳຝາຜະໜັງຣອບລະ ບຽງວັດມາສ້າງ ສັນໃຫ້ເຄື່ອນໄຫວມີຊີວິດ.
ເພື່ອໃຫ້ຜູ້ຊົມສາມາດເຂົ້າໃຈເນື້ອຫາສາລະໄດ້ງ່າຍຂຶ້ນ, ມີຄວາມສະໜຸກສະໜານເພີດ ເພີນຢ່າງສອດຄ່ອງກັບຍຸກສະໄໝ ແລະ ເປັນການອະນຸລັກ ແລະ ພັດທະນາມໍລະດົກພູມປັນຍາ ຊຶ່ງເປັນຫົນທາງວັດທະນະທຳໃຫ້ມີຄຸນຄ່າຫຼາກຫຼາຍ ຍິ່ງໆຂຶ້ນ, ທ່ານກ່າວຕື່ມວ່າ:
ໃນນາມລັດຖະບານ ແລະ ປະ ຊາຊົນຊາວໄທ ສະແດງຄວາມຂອບໃຈກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຫ່ງ ສປປ ລາວ ທີ່ໄດ້ໃຫ້ກຽດເປັນເຈົ້າພາບຮ່ວມ ໃນການຈັດສາຍຮູບເງົາດັ່ງກ່າວ ແລະ ຫວັງເປັນຢ່າງຍິ່ງວ່າ ທຸກທ່ານທີ່ໄດ້ຊົມຮູບເງົາເລື່ອງນີ້ຈະໄດ້ສາລະຄວາມຮູ້ ແລະ ຄວາມສະໜຸກສະໜານ ແລະ ຄວາມເພີດເພີນເປັນຢ່າງດີ.
ແຫຼ່ງຂໍ້ມູນ: ໜັງສືພິມປະຊາຊົນ