ທ່ານ ຄໍາໄໝ ຈິນດາວົງ ປະທານບໍລິສັດ ສູນການຄ້າສາກົນ ຈໍາປາສັກ ຈໍາກັດ ໃຫ້ສໍາພາດໃນທ້າຍເດືອນພຶດສະ ພາ 2019 ທີ່ຜ່ານມານີ້ ວ່າ:
ບໍລິສັດພວກເຮົາ ຈະສ້າງສູນການຄ້າສາກົນ ຈໍາປາສັກຂຶ້ນ ຢູ່ບ້ານໜອງບົວທອງ ເມືອງບາຈຽງຈະເລີນສຸກ ແຄມເສັ້ນທາງເລກທີ 13 ໃຕ້ ປາກເຊ-ເວີນຄາມ ໃນເນື້ອທີ່ 10 ເຮັກຕາ ແລະ 7.556 ຕາແມັດ ເຊິ່ງເປັນເນື້ອທີ່ດິນຂອງຕົນເອງ, ມີທຶນຈົດທະບຽນວິສາຫະກິດ 100 ຕື້ກີບ, ເປັນການລົງທຶນພາຍໃນ 100%, ສ່ວນໜຶ່ງແມ່ນທຶນຄອບຄົວຕົນເອງ ແລະ ສ່ວນໜຶ່ງແມ່ນທຶນກູ້ຢືມຈາກທະນາຄານຮ່າໂນ້ຍ-ໄຊງ່ອນ ສາຂາ ປະເທດລາວ.
ສໍາລັບການດໍາເນີນກິດຈະການຂອງສູນການຄ້າສາກົນ ຈໍາປາສັກ ປະກອບມີກິດຈະການຂາຍ ແລະ ໃຫ້ເຊົ່າເຮືອນຫ້ອງແຖວທີ່ເປັນຂອງບໍລິສັດເອງ, ໃຫ້ເຊົ່າຫ້ອງຂາຍສິນຄ້າໃນຕະຫຼາດ ແລະ ສູນການຄ້າທີ່ທັນສະໄໝ, ບໍ ລິການຈຸດພັກສິນຄ້າ ແລະ ບໍລິການຄິວລົດນໍາອີກ.
ສ່ວນມາດຕະຖານທາງດ້ານເຕັກນິກຂອງການກໍ່ສ້າງສູນການຄ້າສາກົນ ຈໍາປາສັກ ນັ້ນ, ທ່ານ ຄໍາໄໝ ຈິນດາວົງ ກ່າວວ່າ:
ສູນການຄ້າທີ່ບໍລິສັດພວກເຮົາຈະດໍາເນີນການກໍ່ສ້າງນີ້ ອອກແບບໂດຍ ບໍລິສັດສະຖາປັດ ທີ່ປຶກສາ ສໍາຫຼວດ-ອອກແບບ ການກໍ່ສ້າງ ແລະ ຜ່ານການກວດກາຈາກພະແນກການມະຫາພາກທີ່ກ່ຽວຂ້ອງຂອງແຂວງ ຢ່າງລະ ອຽດຄັກແນ່ ທັງໄດ້ມາດຕະຖານສາກົນ ແລະ ຖືກຕ້ອງຕາມຂໍ້ກໍານົດ, ກົດລະບຽບຕ່າງໆທີ່ກ່ຽວຂ້ອງ, ຄາດວ່າຈະມີພິທີວາງສິລາລືກການກໍ່ສ້າງ ໃນທ້າຍເດືອນມິຖຸນາ 2019 ນີ້ ໂດຍແມ່ນບໍລິສັດ ມະຫາຈະເລີນ ກໍ່ສ້າງ ແລະ ທີ່ປຶກສາ ຂົວ-ທາງ ຈໍາກັດ ຜູ້ດຽວ ເປັນຜູ້ຮັບເໝົາກໍ່ສ້າງ ແລະ ຈະສູ້ຊົນກໍ່ສ້າງໃຫ້ສໍາເລັດ ພາຍໃນ 3 ປີ.
ສ່ວນການອະນຸຍາດໃນການດໍາເນີນກິດຈະການຕ່າງໆນັ້ນ ພາຍຫຼັງສໍາເລັດການກໍ່ສ້າງແລ້ວ ສູນການຄ້າພວກເຮົາ ຈະໄດ້ພົວພັນຫາຂະແໜງການທີ່ກ່ຽວຂ້ອງຂອງແຂວງ ເພື່ອຂໍອະນຸຍາດການດໍາເນີນກິດຈະການ ໃຫ້ຖືກ ຕ້ອງ ແລະ ສອດຄ່ອງກັບມາດຖານ-ເງື່ອນໄຂ ທີ່ກໍານົດໄວ້ໃນລະບຽບກົດໝາຍບ້ານເມືອງ.
ທ່ານ ຄໍາໄໝ ຈິນດາວົງ ກ່າວຕື່ມວ່າ:
ຈຸດປະສົງໃນການກໍ່ສ້າງສູນການຄ້າສາກົນ ຈໍາປາສັກ ແມ່ນເພື່ອຮັບຮອງກັບສະພາບການເຕີບໃຫຍ່ຂະຫຍາຍຕົວຂອງເສດຖະກິດ-ສັງຄົມ ໃນ 4 ແຂວງພາກໃຕ້ລາວ ເວົ້າລວມ, ເວົ້າສະເພາະແມ່ນແຂວງຈໍາປາສັກ ເພື່ອເຮັດໃຫ້ແຂວງຈໍາປາສັກ ມີສູນຄ້າທີ່ໄດ້ມາດຕະຖານລະດັບສາກົນ ບໍລິການແຂກຄົນທັງພາຍໃນ ແລະ ຕ່າງປະເທດ.
ນອກນີ້ ຍັງເປັນການປະກອບສ່ວນເຂົ້າໃນການພັດທະນາແຂວງຈໍາປາສັກ ກາຍເປັນໃຈກາງທາງດ້ານການຄ້າ, ການລົງທຶນ ແລະ ການທ່ອງທ່ຽວ ທັງຈະຊ່ວຍໃຫ້ປະຊາຊົນໃນທ້ອງຖິ່ນມີວຽກເຮັດງານທໍາ ແລະ ມີລາຍຮັບທີ່ແນ່ນອນ ເພາະວ່າສູນການຄ້າພວກເຮົາຕ້ອງການຊົມໃຊ້ແຮງງານພາຍໃນຈໍານວນຫຼາຍພັນຄົນ ທັງໃນໄລຍະດໍາເນີນການກໍ່ສ້າງ ແລະ ໄລຍະດໍາເນີນກິດຈະການ.
ແຫຼ່ງຂໍ້ມູນ: ເສດຖະກິດ-ສັງຄົມ