ສະມາຄົມເຟີນີເຈີລາວ ຮ່ວມກັບກົມສົ່ງເສີມການຄ້າ, ສະພາການຄ້າ ແລະ ອຸຸດສາຫະກຳ ແຫ່ງຊາດລາວ ແລະ ສູນການຄ້າ ລາວ-ໄອເຕັກ ກຽມຈັດງານວາງສະແດງເຄື່ອງເຮືອນລາວ ຄັ້ງທີ 4 ປະຈຳ ປີ 2019 ໃນລະຫວ່າງວັນທີ 6-14 ກໍລະກົດ ທີ່ຈະເຖິງນີ້.
ທີ່ສູນການຄ້າລາວ-ໄອເຕັກ (ຕຶກເກົ່າ), ເຊິ່ງໄດ້ລວມເອົາ ຜະລິດຕະພັນເຄື່ອງເຮືອນລາວ ທີ່ຜະລິດດ້ວຍໄມ້, ຫວາຍ, ໄມ້ປ່ອງ ແລະ ຈາກວັດສະດຸເສດເຫລືອຕ່າງໆ ນຳມາແປຮູບໃຫ້ມີຫລາກຫລາຍສີສັນ ຄາດວ່າ ຈະມີການຈໍລະຈອນ ຊື້-ຂາຍສິນຄ້າ ປະມານ 10 ຕື້ກີບ ແລະ ຈະມີຄົນເຂົ້າຊົມໃນງານ ປະມານ 200.000 ກວ່າຄົນ.
ທ່ານ ກອງມາລາ ພົມມາໄລ ຮອງປະທານສະມາຄົມເຟີນີເຈີລາວ ໄດ້ກ່າວໃນງານຖະແຫລງຂ່າວ ວາງສະແດງເຄື່ອງເຮືອນລາວ ຄັ້ງທີ 4 ໃນວັນທີ 11 ມິຖຸນາ ນີ້ວ່າ:
ງານວາງສະແດງໃນຄັ້ງນີ້, ໄດ້ເຊື້ອເຊີນເອົາບັນດາຫົວໜ່ວຍທຸລະກິດເຟີນີເຈີໄມ້ ໃນນະຄອນຫລວງ ແລະ ບັນດາແຂວງ ໃນຂອບເຂດທົ່ວປະເທດ ນຳເອົາຜະລິດຕະພັນຂອງຕົນເອງ ທີ່ຜະລິດດ້ວຍໄມ້, ຫວາຍ, ໄມ້ປ່ອງ ແລະ ຈາກວັດສະດຸເສດເຫລືອຕ່າງໆ ນຳມາແປຮູບເປັນເຄື່ອງເຟີນີເຈີ, ຜະລິດຕະພັນຫັດຖະກຳ, ເຄື່ອງແກະສະຫລັກ, ເຄື່ອງປະດັບຕົບແຕ່ງ ແລະ ເອ້ຢ້ອງພາຍໃນເຮືອນ, ອຸປະກອນການຮັບໃຊ້, ເຄື່ອງມື ແລະ ເຄື່ອງຈັກຕ່າງໆ ທີ່ກ່ຽວ ກັບການຜະລິດເຄື່ອງ ເຟີນີເຈີໄມ້ ແລະ ອື່ນໆ.
ນອກຈາກນີ້, ຍັງເປັນການສົ່ງເສີມການຊື້-ຂາຍສິນຄ້າ ແລະ ຊອກຫາລູກຄ້າ, ເປັນເວທີເປີດກວ້າງ ແລກປ່ຽນບົດ ຮຽນ ແລະ ປະສົບການລະຫວ່າງບັນດາ ຫົວໜ່ວຍທຸລະກິດດ້ວຍກັນ ແລະ ເປີດໂອກາດໃຫ້ຜູ້ຊື້ເຂົ້າເຖິງຜູ້ຜະລິດໂດຍກົງ.
ພາຍໃນງານຍັງມີກິດຈະກຳທີ່ໜ້າສົນໃຈຫລາຍຢ່າງ ເຊັ່ນ: ຝຶກອົບຮົມອອກແບບເຄື່ອງເຟີນີເຈີ ຈາກຊ່ຽວຊຽນຍີ່ປຸ່ນ, ສາທິດການຜະລິດເຄື່ອງເຟີນີເຈີໄມ້ ແລະ ແກະສະຫລັກໄມ້ເສດ, ປະກວດຮ້ອງເພງ ເຍົາວະຊົນສຽງດີລຸ້ນອາຍຸ 8-15 ປີ, ລຸ້ນອາຍຸ 16-25 ປີ, ຄອນເສິດລາວ-ໄທ ແລະ ອື່ນໆ.
ແຫຼ່ງຂໍ້ມູນ: ສຳນັກຂ່າວສານປະເທດລາວ
