ເພື່ອເຮັດໃຫ້ການຄຸ້ມຄອງການຕິດຕາມ ແລະ ການກວດກາສາງສິນຄ້າ ນ້ຳມັນເຊື້ອໄຟ ແລະ ອາຍແກັສ ຖືກ ຕ້ອງຕາມລະບຽບກົດໝາຍ ແລະ ເປັນເງື່ອນໄຂອຳນວຍໃນການດຳເນີນທຸລະກິດ ການເກັບພັນທະພາສີອາກອນຕ່າງໆ ກົມສ່ວຍສາອາກອນ ກະຊວງການເງິນ ໄດ້ຈັດກອງປະຊຸມເຜີຍແຜ່ແຈ້ງການ ການຄຸ້ມຄອງສາງສິນຄ້າ ນ້ຳມັນເຊື້ອໄຟ ແລະ ອາຍແກັສ ຂຶ້ນຢູ່ກົມດັ່ງກ່າວ ໂດຍເປັນປະທານຂອງທ່ານ ບຸນໂຈມ ອຸບົນປະເສີດ ຮອງລັດ ຖະມົນຕີກະຊວງການເງິນ ມີ 26 ບໍລິສັດນ້ຳມັນເຊື້ອໄຟ 79 ບໍລິສັດຂາເຂົ້າ-ຂາອອກ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ພູທະນູເພັດ ໄຊສົມບັດ ຫົວໜ້າກົມສ່ວຍສາອາກອນ ກ່າວວ່າ:
ຫົວໜ່ວຍທຸລະກິດທີ່ດຳເນີນທຸລະກິດຂາອອກ-ຂາເຂົ້າຢູ່ໃນປະເທດ ທີ່ນຳເຂົ້າສິນຄ້າ ນ້ຳມັນເຊື້ອໄຟ ແລະ ອາຍແກັສ ເພື່ອຈຳໜ່າຍຂາຍຍົກ-ຂາຍຍ່ອຍ ລວມທັງຫົວໜ່ວຍທຸລະກິດທີ່ດຳເນີນການຜະລິດປຸງແຕ່ງຕ່າງໆ ຕ້ອງໄດ້ມີລະບົບສາງສິນຄ້າເປັນຂອງຕົນເອງ ຕ້ອງໄດ້ກວດນັບສິນຄ້າຢູ່ໃນສາງຢ່າງເປັນປົກກະຕິ ແລະ ຕ້ອງໄດ້ຖືບັນຊີສາງດ້ວຍລະບົບບັນທຶກດ້ວຍມື ຫຼື ລະບົບອີເລັກໂຕຣນິກ ທີ່ສາມາດກວດສອບໄດ້ທຸກເວລາ.
ໃນນີ້ ສິນຄ້ານ້ຳມັນເຊື້ອໄຟ ແລະ ອາຍແກັສ ເວລານຳອອກຈາກດ່ານພາສີ ຫຼື ສາງບ່ອນນຳເຂົ້າ ຕ້ອງມີໃບແຈ້ງພາສີເປັນລາຍລະອຽດ ມີເອກະສານກ່ຽວຂ້ອງຄັດຕິດ ແລະ ຜ່ານການກວດກາຂອງເຈົ້າໜ້າທີ່ພາສີ ກ່ອນຈະນຳອອກຈາກດ່ານພາສີ ດ້ວຍຫຼາຍຮູບແບບຕາມທີ່ໄດ້ກຳນົດໃນກົດໝາຍວ່າດ້ວຍພາສີ ເຖິງວ່າສິນຄ້າດັ່ງກ່າວຈະຖືກຍົກເວັ້ນ ຫຼື ງົດເກັບພາສີກໍຕາມ ການເຄື່ອນຍ້າຍສິນຄ້າ ນ້ຳມັນເຊື້ອໄຟ ແລະ ອາຍແກັສທຸກຄັ້ງ ຕ້ອງໄດ້ລະບຸເປົ້າໝາຍສາງສິນຄ້າທີ່ຈະເປັນບ່ອນລົງຢ່າງຈະແຈ້ງ ໂດຍມີເອກະສານເຄື່ອນຍ້າຍ.
ແຫຼ່ງຂໍ້ມູນ: ໜັງສືພິມວຽງຈັນໃໝ່