ທ່ານ ນາງ ດາວອນ ມະນີວັນ ໄດ້ໃຫ້ສຳພາດຜ່ານມາໃຫ້ຮູ້ວ່າ ໂຮງຮຽນ ມສ ສໍາພັນໄຊ ຕັ້ງຢູ່ບ້ານສີບຸນເຮືອງ ເມືອງຄູນ ແຂວງຊຽງຂວາງ ມີອາຄານ4 ຫລັງ ມີຄູອາຈານ ທັງຫມົດ27 ຄົນ ຍິງ11ຄົນ ມີຈໍານວນນັກຮຽນທັງຫມົດ 402 ຄົນ.
ເປັນໂຮງຮຽນອີກແຫ່ງຫນຶ່ງທີ່ມີແຜນຈະປະກາດເປັນໂຮງຮຽນປອດສິ່ງເສບຕິດ , ໃນໂຮງຮຽນໄດ້ສຶກສາອົບຮົມ ໃຫ້ເດັກເປັນຄົນດີ ມີຄວາມຮູ້ ມີລະບຽບວິໄນ ມີຄວາມສາມັກຄີ ຮູ້ພັດທະນາ ຮັກສາສິ່ງເເວດລ້ອມທີ່ມີ ແລະ ພັດທະນາສິ່ງເເວດລ້ອມທີ່ຍັງບໍ່ທັນມີໃນໂຮງຮຽນ ເປັນຕົ້ນແມ່ນ ການປູກຕົ້ນໄມ້ໃຫ້ຮົມ ,ບົວລະບັດຮັກສາອະນາໄມໂຮງຮຽນໃຫ້ສະອາດ ແລະ ປາສະຈາກຈາກສິ່ງເສບຕິດເປັນຕົ້ນ.
ນອກຈາກນີ້ ຍັງໄດ້ປູກຈິດສໍານຶກໃຫ້ນັກຮຽນທຸກຄົນຫລິ້ນກິລາຫລັງເລີກຮຽນທຸກວັນ ເພື່ອຫລີກລ້ຽງຈາກຢາເສບຕິດ ແລະຍັງເຮັດໃຫ້ເດັກມີຄວາມເບີກບານມ່ວນຊື່ນ ມີການເຄື່ອນໄຫວ ແລະ ແຂ່ງຂັນຫ້ອງ/ຫ້ອງພາຍໃນໂຮງຮຽນ , ການເຮັດກິດຈະກຳດັ່ງກ່າວນີ້ເພື່ອໃຫ້ເດັກໄດ້ມີສຸຂະພາບເເຂງເເຮງແລ້ວ ຍັງເຮັດໃຫ້ພວກເຂົາຫ່າງ ຈາກສິ່ງເສບຕິດຕ່າງໆອີກ ເຊິ່ງທາງໂຮງຮຽນເຮົາກໍ່ກຽມປະກາດເປັນໂຮງຮຽນປອດສິ່ງເສບຕິດ.
ແຫຼ່ງຂໍ້ມູນ: Medialaos